മോദിക്ക് ലഭിച്ച സമ്മാനങ്ങൾ ലേലത്തിന്; അഞ്ഞൂറ് രൂപ മുതൽ ലേലത്തുക
നമാമി ഗംഗ എന്ന പേരിൽ ഗംഗാനദി ശുചീകരണ പ്രവർത്തനങ്ങൾക്കായിരിക്കും ഇങ്ങനെ ലഭിക്കുന്ന തുക ഉപയോഗിക്കുന്നത്. അഞ്ഞൂറ് രൂപയാണ് ഇവയുടെ അടിസ്ഥാന വില.
ദില്ലി: പ്രധാനമന്ത്രി മോദിക്ക് വിവിധ സ്വീകരണങ്ങളിൽ ലഭിച്ച സമ്മാനങ്ങൾ നാഷണൽ ഗാലറി ഓഫ് മോഡേൺ ആർട്ടിൽ ലേലത്തിന് വയ്ക്കുന്നു. തലപ്പാവുകൾ, ഷാളുകൾ, കോട്ടുകൾ. ചിത്രങ്ങൾ, പ്രതിമകൾ എന്നിവയാണ് സമ്മാനങ്ങളിലുള്ളത്. നമാമി ഗംഗ എന്ന പേരിൽ ഗംഗാനദി ശുചീകരണ പ്രവർത്തനങ്ങൾക്കായിരിക്കും ഇങ്ങനെ ലഭിക്കുന്ന തുക ഉപയോഗിക്കുന്നത്. അഞ്ഞൂറ് രൂപയാണ് ഇവയുടെ അടിസ്ഥാന വില. 1800 ലേറെ സമ്മാനങ്ങൾ സ്വന്തമാക്കാനുള്ള അവസരമാണ് ഇത്തരത്തിൽ പൊതുജനങ്ങൾക്ക് ലഭിക്കുക.
ഓൺലൈൻ വിൽപനയ്ക്ക് ശേഷം വരുന്ന സമ്മാനങ്ങളാണ് ലേലത്തിന് വച്ചിരിക്കുന്നത്. ഇതിന് മുമ്പ് ഈ സമ്മാനങ്ങൾ നാഷണൽ ഗാലറിയിൽ പ്രദർശനത്തിന് വച്ചിരുന്നു. ഇതിന് പിന്നാലെയാണ് വിൽപനയക്ക് വയ്ക്കാൻ തീരുമാനിച്ചിരിക്കുന്നത്. 15 ദിവസങ്ങൾക്കുള്ളിൽ ലേലം പൂർത്തിയാകുമെന്നും ഈ തുക മുഴുവൻ ഗംഗാനദി ശുചീകരണ പ്രവർത്തനങ്ങൾക്ക് ഉപയോഗിക്കുമെന്നും കേന്ദ്ര സാംസ്കാരിക വകുപ്പ് മന്ത്രി മനീഷ് ശർമ്മ പറഞ്ഞു.