ഒൻപത് പരിശോധനാ ഫലങ്ങളും നെഗറ്റീവ് വ്യാജവാർത്ത പ്രചരിപ്പിച്ച എട്ട് പേരെക്കൂടി അറസ്റ്റ് ചെയ്തു
കോഴിക്കോട്: നിപയില് ഇന്ന് ലഭിച്ച ഒൻപത് പരിശോധനാ ഫലങ്ങളും നെഗറ്റീവ്. 9 പേര് നിപ രോഗലക്ഷണങ്ങളോടെ ചികിത്സയില് കഴിയുകയാണ്. 2503 പേർ വീടുകളിൽ നിരീക്ഷണത്തിലാണ്. അതിനിടെ വ്യാജവാർത്ത പ്രചരിപ്പിച്ച എട്ട് പേരെക്കൂടി അറസ്റ്റ് ചെയ്തു. ഇതോടെ ഇതുവരെ വ്യാജ വാര്ത്ത പ്രചരിപ്പിച്ച 22 പേർ അറസ്റ്റിലായി.
സ്ഥിതി വിലയിരുത്താനും ശുചീകരണ പ്രവർത്തനങ്ങൾ ഏകോപിപ്പിക്കാനുമായി ഈ മാസം 10 ന് കോഴിക്കോട് വീണ്ടും സർവ്വകക്ഷിയോഗം ചേരും. രണ്ടാംഘട്ടത്തിൽ ആശങ്കപ്പെട്ട രീതിയിലുള്ള രോഗവ്യാപനം ഉണ്ടായിട്ടില്ലെന്ന ആശ്വാസത്തിലാണ് ആരോഗ്യവകുപ്പ്. രോഗ ലക്ഷണങ്ങളോടെ നിരീക്ഷണത്തിലുള്ളവരുടെ വീടുകളിൽ സപ്ലൈക്കോയുടെ സൗജന്യ റേഷൻ കിറ്റ് വിതരണം ചെയ്തു. ജില്ലയിൽ മറ്റ് പകർച്ച വ്യാധികൾക്കെതിരെയുള്ള മുൻകരുതലും ശക്തമാക്കിയതായി ആരോഗ്യവകുപ്പ് അറിയിച്ചു.
മാലിന്യസംസ്കരണവുമായി ബന്ധപ്പെട്ട് നിലനിൽക്കുന്ന പ്രശ്നങ്ങൾ സർവ്വകക്ഷിയോഗത്തിലൂടെ പരിഹരിക്കുമെന്ന് മന്ത്രി ടി.പി രാമകൃഷ്ണൻ പറഞ്ഞു. വൈറസിന്റെ ഉറവിടം കണ്ടെത്താനുള്ള ശ്രമങ്ങളും ഊർജിതമാണ്. കേന്ദ്രത്തിൽ നിന്നുള്ള 3 സംഘം ജില്ലയിൽ ക്യമ്പ് ചെയ്യുന്നുണ്ട്. ഭീതി ഒഴിയുമ്പോഴും ജൂൺ 30 വരെ കനത്ത ജാഗ്രത തുടരാനാണ് ആരോഗ്യവകുപ്പ് നൽകുന്ന നിർദ്ദേശം.
