അത് നിർമ്മലാ സീതാരാമന്റെ മകളല്ല, പതിവുപോലെ സോഷ്യൽ മീഡിയ നിർമ്മിച്ച വ്യാജവാർത്ത
'ഇതാ ആദ്യമായി ഒരു കേന്ദ്രമന്ത്രിയുടെ മകൾ പ്രതിരോധ വകുപ്പിൽ ജോലി നേടിയിരിക്കുന്നു, ഇതാണ് രാജ്യസേവനം' എന്ന അടിക്കുറിപ്പോടെയാണ് നിർമ്മലാ സീതാരാമന്റെയും പ്രതിരോധ വകുപ്പ് ഉദ്യോഗസ്ഥയുടെയും ഫോട്ടോ സമൂഹമാധ്യമങ്ങളിൽ പ്രചരിച്ചുകൊണ്ടിരിക്കുന്നത്. എന്നാൽ സോഷ്യൽ മീഡിയ പടച്ചുവിടുന്ന അനേകം വ്യാജവാർത്തകളിൽ ഒന്ന് മാത്രമാണിതെന്ന് ഔദ്യോഗിക റിപ്പോർട്ട്.
ദില്ലി: നല്ല വാർത്തകളേക്കാളുപരി വ്യാജവാർത്തകളായിരിക്കും ഒരു പക്ഷേ സോഷ്യൽ മീഡിയയിൽ ഏറ്റവും കൂടുതൽ വേഗത്തിൽ പ്രചരിക്കുക. അത്തരത്തിലുള്ള പ്രചാരണമാണ് കേന്ദ്രമന്ത്രി നിർമ്മലാ സീതാരാമന്റെ ഫോട്ടോയ്ക്കും ലഭിച്ചിരിക്കുന്നത്. ഇതാ ആദ്യമായി ഒരു കേന്ദ്രമന്ത്രിയുടെ മകൾ പ്രതിരോധ വകുപ്പിൽ ജോലി നേടിയിരിക്കുന്നു, ഇതാണ് രാജ്യസേവനം എന്ന അടിക്കുറിപ്പോടെയാണ് നിർമ്മലാ സീതാരാമന്റെയും പ്രതിരോധ വകുപ്പ് ഉദ്യോഗസ്ഥയുടെയും ഫോട്ടോ സമൂഹമാധ്യമങ്ങളിൽ പ്രചരിച്ചുകൊണ്ടിരിക്കുന്നത്. എന്നാൽ സോഷ്യൽ മീഡിയ പടച്ചുവിടുന്ന അനേകം വ്യാജവാർത്തകളിൽ ഒന്ന് മാത്രമാണിതെന്ന് ഔദ്യോഗിക റിപ്പോർട്ട്.
നികിത വീരയ്യ എന്ന സൈനിക ഉദ്യോഗസ്ഥയുടെ ചിത്രമാണ് നിർമ്മല സീതാരാമന്റെ മകൾ എന്ന പേരിൽ പ്രചരിക്കുന്നതെന്ന് സൈനിക വൃത്തങ്ങൾ വെളിപ്പെടുത്തുന്നു. ഔദ്യോഗിക സന്ദർശന വേളയിൽ മന്ത്രിയുടെ സഹായിയായി നിയോഗിച്ച യുവസൈനികയാണ് നികിത വീരയ്യ എന്നാണ് വിശദീകരണം. ഔദ്യോഗിക രേഖകൾ പ്രകാരം വാങ്മയി എന്നാണ് നിർമ്മലാ സീതാരാമന്റെ മകളുടെ പേര്. മകൾക്കൊപ്പമുള്ള യഥാർത്ഥ ചിത്രങ്ങളും വീഡിയോകളും പരിശോധിച്ചാൽ ഇക്കാര്യം വ്യക്തമാകും. ബിജെപി അനുകൂല ഫേസ്ബുക്ക് പേജുകളിലൂടെയാണ് ഈ വ്യാജവാർത്ത പ്രചരിച്ചത്.
