സഹകരണ ബാങ്കിൽ കള്ളപ്പണം ഉണ്ടെന്ന ബിജെപി സംസ്ഥാന നിലപാടിനെ തള്ളി ആർഎസ്എസ്സിന്‍റെ സഹകരണ മേഖലയിലെ സംഘടനയായ സഹകാർ ഭാരതി രംഗത്ത്. കേരളത്തിലെ സഹകരണ സംഘങ്ങളിൽ കള്ളപ്പണം ഇല്ലെന്ന് സഹകാർ ഭാരതി നേതാക്കൾ വ്യക്തമാക്കി.

കേരളത്തിലെ സഹകരണ ബാങ്കുകളിൽ കള്ളപ്പണം ഉണ്ടെന്ന ബിജെപി സംസ്ഥാന നേതാക്കളുടെ അഭിപ്രായത്തെ പാടെ തള്ളുകയാണ് സഹകാർ ഭാരതി. ബിജെപിയുടെ നിലപാട് അനുകൂലിക്കാൻ കഴിയില്ല. നോട്ട് അസാധുവാക്കിയ നടപടി അംഗീകരിക്കുന്നുണ്ടെന്നും സഹകരണ മേഖലയെ പ്രതിസന്ധിയിലേക്ക് തള്ളി വിട്ടത് സംസ്ഥാന സർക്കാരിന്‍റെ തെറ്റായ നയങ്ങളാണന്നും നേതാക്കൾ പറഞ്ഞു.

റിസർവ്വ് ബാങ്ക് ആവശ്യപ്പെടുന്ന വിവരങ്ങളും രേഖകളും നൽകാൻ സഹകരണ സ്ഥാപനങ്ങൾ തയ്യാറാകണം. പ്രശ്ന പരിഹാരത്തിന് സഹകരണ രജിസ്ട്രാർ മുൻകൈ എടുക്കണമെന്നും സഹകാർ ഭാരതി ആവശ്യപ്പെടുന്നു. വിഷയത്തിൽ സംസ്ഥാന സർക്കാരിന്‍റെ നിലപാടിനെതിരെ പ്രതിഷേധ പരിപാടികൾ സംഘടിപ്പിക്കുമെന്നും സഹകാർ ഭാരതി നേതാക്കൾ വ്യക്തമാക്കി. 150 ഓളം സഹകരണ സംഘങ്ങളിലാണ് സംസ്ഥാന സഹകാർ ഭാരതിക്ക് സ്വാധീനമുള്ളത്.