കെജ്രിവാൾ പല്ലില്ലാത്ത കടുവയെന്ന് ശിവസേന മുഖപത്രം
- രാജ്യതലസ്ഥാനത്ത് നടക്കുന്ന ഇൗ പൊറാട്ട് നാടകങ്ങൾ എന്ന് തീരുമെന്നും സാമ്ന ചോദിക്കുന്നു.
മുംബൈ: ദില്ലി മുഖ്യമന്ത്രി അരവിന്ദ് കെജ്രിവാളിനെ പല്ലില്ലാത്ത കടുവയെന്ന് വിശേഷിപ്പിച്ച് ശിവസേന മുഖപത്രം സാമ്ന. ദില്ലിയിൽ നടക്കുന്നത് ബിജെപി-ആം ആദ്മി നാടകമാണെന്ന് സാമ്ന കുറ്റപ്പെടുത്തുന്നു. രാജ്യതലസ്ഥാനത്ത് നടക്കുന്ന ഇൗ പൊറാട്ട് നാടകങ്ങൾ എന്ന് തീരുമെന്നും സാമ്ന ചോദിക്കുന്നു.
ദില്ലി ലെഫ്.ഗവർണറെ കാണുന്നതിനായി കഴിഞ്ഞ എട്ട് ദിവസമായി അരവിന്ദ് കെജ്രിവാളും സഹമന്ത്രിമാരും ദില്ലി രാജ്ഭവനിൽ കാത്തിരിക്കുകയാണ്. സംസ്ഥാനത്തെ ഐ.എ.എസ് ഉദ്യോഗസ്ഥർ നടത്തി വരുന്ന നിസഹകരണസമരം അവസാനിപ്പിക്കണമെന്നും ആപ്പ് സർക്കാർ കൊണ്ടുവന്ന പദ്ധതികൾക്ക് അനുവാദം നൽകണമെന്നും ആവശ്യപ്പെട്ടാണ് കെജ്രിവാൾ രാജ്ഭവനിൽ കുത്തിയിരക്കുന്നത്.
കഴിഞ്ഞ ദിവസം നടന്ന നീതി ആയോഗ് യോഗത്തിനിടയിൽ കേരള മുഖ്യമന്ത്രി പിണറായി വിജയൻ, കർണാടക മുഖ്യമന്ത്രി എച്ച്.ഡി.കുമാരസ്വാമി, ബംഗാൾ മുഖ്യമന്ത്രി മമതാ ബാനർജി, ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡു എന്നിവർ പ്രധാനമന്ത്രിയെ കണ്ട് പ്രശ്നം പരിഹാരിക്കാൻ ഇടപെടണം എന്നാവശ്യപ്പെട്ടിരുന്നു.
