ശോഭയാത്രയില് കുട്ടിയെ കെട്ടിയിട്ട സംഭവം: ബാലാവകാശ കമ്മീഷന് കേസെടുത്തു
കണ്ണൂർ: പയ്യന്നൂരിൽ ശ്രീകൃഷ്ണജയന്തി ദിനത്തില് നടന്ന ശോഭായാത്രയിലെ നിശ്ചല ദൃശ്യത്തിൽ പിഞ്ചുകുഞ്ഞിനെ മണിക്കൂറുകളോളം കെട്ടിയിട്ട സംഭവത്തിൽ സംസ്ഥാന ബാലാവകാശ കമ്മീഷൻ സ്വമേധയ കേസെടുത്തു. സമൂഹമാധ്യമത്തിലൂടെ പ്രചരിച്ച ചിത്രത്തിന്റെ അടിസ്ഥാനത്തിലാണ് കേസ്. ഇക്കാര്യത്തിൽ ആഭ്യന്തര സെക്രട്ടറി, ഡിജിപി, കളക്ടർ, ജില്ലാ പോലീസ് മേധാവി, ജില്ലാ ശിശുസംരക്ഷണ ഓഫിസർ എന്നിവരോട് രണ്ടാഴ്ചയ്ക്കകം വിശദീകരണം നൽകാനും കമ്മീഷൻ ആവശ്യപ്പെട്ടു.
മൂന്നരവയസ് മാത്രം പ്രായതമുള്ള കുഞ്ഞിനെ മണിക്കൂറുകളോളം വെയിലത്ത് കെട്ടിയിട്ടെന്നാണ് ആരോപണം. ശ്രീകാന്ത് ഉഷ പ്രഭാകരന് എന്നയാളാണ് ഇതു സംബന്ധിച്ച വിവരം ഫേസ്ബുക്കിലൂടെ പുറത്തുവിട്ടത്.
ആലിലയിലുറങ്ങുന്ന കൃഷ്ണന്റെ പ്രതീകാത്മക രൂപം സൃഷ്ടിക്കാന് ആലിലയുടെ രൂപത്തിലുണ്ടാക്കിയ ചെരിഞ്ഞ പ്ലാറ്റ്ഫോമില് ശ്രീകൃഷ്ണ വേഷം ധരിച്ച കുട്ടിയെ കെട്ടിയിടുകയായിരുന്നു. കുട്ടിയുടെ അരഭാഗം ഇലയില് കെട്ടിവച്ചിരിക്കുകയായിരുന്നു. ഉച്ചയ്ക്ക് പയ്യന്നൂര് പുതിയ ബസ് സ്റ്റാന്ഡ് പരിസരത്ത് നിന്നുമാണ് ഘോഷയാത്ര ആരംഭിച്ചത്.