പത്തനംതിട്ടയില് നടക്കുന്ന ബിജെപി പൊതു സമ്മേളനത്തില് ആദിത്യനാഥ് പങ്കെടുക്കും. ഫെബ്രുവരി 12നാണ് സമ്മേളനം
തിരുവനന്തപുരം: പ്രധാനമന്ത്രി നരേന്ദ്രമോദിക്ക് പിന്നാലെ തെരഞ്ഞെടുപ്പ് പ്രചാരണത്തിന് ഉത്തര്പ്രദേശ് മുഖ്യമന്ത്രി യോഗി ആദിത്യനാഥ് കേരളത്തിലേക്ക്. പത്തനംതിട്ടയില് നടക്കുന്ന ബിജെപി പൊതു സമ്മേളനത്തില് ആദിത്യനാഥ് പങ്കെടുക്കും. ഫെബ്രുവരി 12നാണ് സമ്മേളനം. രണ്ടാഴ്ചയ്ക്കിടെ രണ്ട് തവണ മോദി കേരളം സന്ദര്ശിച്ചിട്ടും കേരള ബിജെപിയില് തെരഞ്ഞെടുപ്പ് ഒരുക്കങ്ങള് ചൂടുപിടിച്ചിട്ടില്ല. ഈ പശ്ചാത്തലത്തിലാണ് സംസ്ഥാന ഘടകത്തെയും അണികളെയും ചൂടുപിടിക്കാന് യോഗിയുടെ രംഗപ്രവേശം.
ഇടത്-വലത് മുന്നണികളെ കടന്നാക്രമിച്ച മോദി ബിജെപിയുടെ തെരഞ്ഞെടുപ്പ് അജണ്ട ശബരിമല തന്നെയെന്ന് ആവർത്തിച്ചു വ്യക്തമാക്കിയിരുന്നു. സംസ്ഥാന അധ്യക്ഷൻ പി എസ് ശ്രീധരൻ പിള്ളയുടെ ഭാഷയിൽ പറഞ്ഞാൽ ശബരിമല എന്ന സുവർണാവസരം മുന്നിലുണ്ടായിട്ടും സംസ്ഥാന ബിജെപിയിൽ തെരഞ്ഞെടുപ്പ് ഒരുക്കങ്ങൾ തണുത്ത് തന്നെയാണ്.
Read More: അടിപിടിയും തമ്മിൽ തല്ലും; മോദി വന്ന് പോയിട്ടും തെരഞ്ഞെടുപ്പ് ചൂടില്ലാതെ സംസ്ഥാന ബിജെപി
സീറ്റ് വിഭജനത്തിലും സ്ഥാനാർത്ഥി നിർണ്ണയത്തിലും ഇപ്പോഴും അവ്യക്തത തുടരുകയാണ്. പ്രധാനഘടകകക്ഷി ബിഡിജെഎസ്സുമായുള്ള സീറ്റ് വിഭജന തർക്കമാണ് ഒരു പ്രശ്നം. ആറ് ചോദിച്ചെങ്കിലും പരമാവധി നാല് സീറ്റേ കൊടുക്കാൻ കഴിയൂ എന്നാണ് ബിജെപി നേതൃത്വത്തിന്റെ നിലപാട്. നാളെ ചേരുന്ന ബിഡിജെഎസ് സംസ്ഥാന കമ്മിറ്റി തർക്കം ചർച്ച ചെയ്യും.
