ടി47 വിഭാഗത്തിൽ 10.72 സെക്കൻഡിൽ ഫിനിഷ് ചെയ്ത ബാസിലിന്റെ പ്രകടനം ഗെയിംസ് റെക്കോർഡായി റിപ്പോർട്ട് ചെയ്യപ്പെട്ടിട്ടുണ്ട്.
ഐച്ചി-നഗോയ: ജപ്പാനിലെ ഐച്ചി-നഗോയയിൽ നടക്കുന്ന ഏഷ്യൻ പാരാ ഗെയിംസ് 2026-ൽ പുരുഷന്മാരുടെ 100 മീറ്റർ ടി47 വിഭാഗത്തിൽ വെള്ളിമെഡൽ നേടി ഇന്ത്യയുടെ അഭിമാനമായി സായ് നാഷണൽ സെന്‍റർ ഓഫ് എക്സലൻസ് തിരുവനന്തപുരം താരമായ മുഹമ്മദ് ബാസിൽ. 10.72 സെക്കൻഡിൽ ഫിനിഷ് ചെയ്താണ് ബാസിൽ വെള്ളിമെഡൽ സ്വന്തമാക്കിയത്. ഇന്ത്യയ്ക്ക് അഭിമാനകരമായ നേട്ടം സമ്മാനിച്ച മത്സരത്തിൽ സഹതാരം ദിലീപ് ഗവിത് മഹാദു 10.69 സെക്കൻഡിൽ ഫിനിഷ് ചെയ്ത് സ്വർണമെഡൽ നേടി. ഇരുവരുടെയും മികവുറ്റ പ്രകടനത്തിലൂടെ ഇന്ത്യയ്ക്ക് സ്വർണവും വെള്ളിയും സ്വന്തമാക്കാനായി.
ടി47 വിഭാഗത്തിൽ 10.72 സെക്കൻഡിൽ ഫിനിഷ് ചെയ്ത ബാസിലിന്റെ പ്രകടനം ഗെയിംസ് റെക്കോർഡായി റിപ്പോർട്ട് ചെയ്യപ്പെട്ടിട്ടുണ്ട്. മത്സരത്തിന്‍റെ ഹീറ്റ്സിൽ 10.79 സെക്കൻഡിൽ ഫിനിഷ് ചെയ്ത് ബാസിൽ നേരത്തെയും മികച്ച പ്രകടനം കാഴ്ചവെച്ചിരുന്നു. കഠിനാധ്വാനത്തിന്‍റെയും അർപ്പണബോധത്തിന്‍റെയും സ്ഥിരമായ പരിശീലനത്തിന്‍റെയും ഫലമാണ് ബാസിലിന്റെ ഈ നേട്ടം. അന്താരാഷ്ട്ര കായികവേദിയിൽ ഇന്ത്യൻ പാരാ അത്‌ലറ്റുകളുടെ വളർന്നുവരുന്ന മികവിന്റെ മറ്റൊരു തെളിവുകൂടിയാണ് ഈ മെഡൽ.
സായ് എൻ.സി.ഒ.ഇ തിരുവനന്തപുരം കേന്ദ്രത്തെ സംബന്ധിച്ചിടത്തോളം ഏറെ അഭിമാനകരമായ ഈ നേട്ടം രാജ്യത്തെ വളർന്നുവരുന്ന പാരാ അത്‌ലറ്റുകൾക്ക് വലിയ പ്രചോദനമാണ്. ശാസ്ത്രീയ പരിശീലനവും മികച്ച പിന്തുണയും ലഭിക്കുമ്പോൾ അന്താരാഷ്ട്ര തലത്തിൽ മികവ് കൈവരിക്കാൻ ഇന്ത്യൻ താരങ്ങൾക്ക് കഴിയുമെന്നതിന്‍റെ ഉദാഹരണം കൂടിയാണ് ബാസിലിന്റെ വിജയം. കേരളത്തിലെ മലപ്പുറം ജില്ലയിലെ പൊന്നാനിക്ക് സമീപമുള്ള പള്ളപ്രം സ്വദേശിയായ മുഹമ്മദ് ബാസിൽ, T47 വിഭാഗത്തിൽ മത്സരിക്കുന്ന പാറ ശ്രദ്ധേയനായ പാരാ സ്പ്രിന്‍റർമാരിൽ ഒരാളാണ്. വലത് കൈ ഇല്ലാതെ ജനിച്ച ബാസിൽ സ്കൂൾ കാലഘട്ടത്തിലാണ് തന്‍റെ കായിക കഴിവുകൾ തിരിച്ചറിഞ്ഞത്. ആദ്യം ഫുട്ബോളിൽ സജീവമായിരുന്ന ബാസിൽ പിന്നീട് അത്‌ലറ്റിക്സിലേക്ക് മാറുകയായിരുന്നു.
സ്കൂൾ തലത്തിൽ തന്നെ മികച്ച വേഗത പ്രകടിപ്പിച്ച ബാസിൽ സി. ബി.എസ്.ഇ അത്ലറ്റിക്സ് മത്സരങ്ങളിൽ ശ്രദ്ധേയമായ പ്രകടനങ്ങൾ കാഴ്ചവെച്ചു. പിന്നീട് പാരാ അത്‌ലറ്റിക്സിലേക്ക് മാറിയതോടെ ബാസിലിന്റെ കരിയറിൽ നിർണായകമായ മുന്നേറ്റമുണ്ടായി. സായ് പരിശീലന സംവിധാനത്തിന്റെ ഭാഗമായതോടെ തിരുവനന്തപുരത്തെ ഉയർന്ന നിലവാരത്തിലുള്ള പരിശീലനവും കായികശാസ്ത്ര പിന്തുണയും ബാസിലിന്റെ പ്രകടനം കൂടുതൽ മെച്ചപ്പെടുത്താൻ സഹായിച്ചു.
2025-ൽ പാരീസിൽ നടന്ന വേൾഡ് പാരാ അത്ലറ്റിക്സ് ഗ്രാൻഡ് പ്രിക്സിൽ പുരുഷന്മാരുടെ 100 മീറ്റർ T47 വിഭാഗത്തിൽ സ്വർണം നേടിയതാണ് ബാസിലിന്റെ പ്രധാന അന്താരാഷ്ട്ര നേട്ടങ്ങളിലൊന്ന്. അതേ വർഷം ഖേലോ ഇന്ത്യ പാരാ ഗെയിംസിലും 100 മീറ്ററിൽ സ്വർണം നേടി ബാസിൽ തന്‍റെ മികവ് തെളിയിച്ചു. 2026-ൽ ബാസിൽ തന്‍റെ കരിയറിലെ മറ്റൊരു നിർണായക നേട്ടത്തിലേക്ക് എത്തി. 10.63 സെക്കൻഡിന്റെ വ്യക്തിഗത മികച്ച സമയം കുറിച്ച് അദ്ദേഹം കോമൺവെൽത്ത് ഗെയിംസിനുള്ള ഇന്ത്യൻ ടീമിൽ സ്ഥാനം നേടി. തുടർന്ന് ഗ്ലാസ്ഗോ 2026 കോമൺവെൽത്ത് ഗെയിംസിൽ പുരുഷന്മാരുടെ 100 മീറ്റർ T47 വിഭാഗത്തിൽ 10.83 സെക്കൻഡിൽ വെള്ളി മെഡൽ നേടി ബാസിൽ ശ്രദ്ധേയ പ്രകടനം നടത്തി. ഈ ഇനത്തിൽ ഇന്ത്യയ്ക്ക് സ്വർണവും വെള്ളിയും ലഭിച്ച ചരിത്രപരമായ ഒന്നും - രണ്ടും ഫിനിഷിനും ബാസിൽ ഭാഗമായിരുന്നു.
ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക
