ഒമാനിൽ വരും ദിവസങ്ങളിൽ താപനില 50 ഡിഗ്രി സെൽഷ്യസ് വരെ ഉയർന്നേക്കാമെന്ന് സിവിൽ ഏവിയേഷൻ അതോറിറ്റി മുന്നറിയിപ്പ് നൽകി. അന്തരീക്ഷമർദ്ദവും വരണ്ട കാറ്റുമാണ് ഇതിന് കാരണം. പൊതുജനങ്ങൾ, പ്രത്യേകിച്ച് പുറംജോലിക്കാർ, സൂര്യപ്രകാശം ഏൽക്കുന്നത് ഒഴിവാക്കാനും ധാരാളം വെള്ളം കുടിക്കാനും നിർദ്ദേശമുണ്ട്.
മസ്കറ്റ്: ഒമാനിൽ വരും ദിവസങ്ങളിൽ ചൂട് കൂടുമെന്ന് സിവിൽ ഏവിയേഷൻ അതോറിറ്റിയുടെ മുന്നറിയിപ്പ്. തിങ്കളാഴ്ച മുതൽ രാജ്യത്തിന്റെ വിവിധ ഭാഗങ്ങളിൽ താപനില കുത്തനെ ഉയർന്നേക്കുമെന്നും ചിലയിടങ്ങളിൽ ഇത് 50 ഡിഗ്രി സെൽഷ്യസ് വരെ എത്തിയേക്കാമെന്നും അധികൃതർ വ്യക്തമാക്കി. വരണ്ടതും കഠിനവുമായ കാലാവസ്ഥ വരും ദിവസങ്ങളിൽ ശക്തമാകും.
നാഷണൽ മൾട്ടി-ഹസാർഡ് ഏർലി വാണിംഗ് സെന്റർ പുറപ്പെടുവിച്ച ജാഗ്രതാ നിർദ്ദേശം അനുസരിച്ച് ഒമാൻ കടലിനോട് ചേർന്നുള്ള തീരപ്രദേശങ്ങളിൽ വരും ദിവസങ്ങളിൽ കടുത്ത ചൂട് അനുഭവപ്പെടും. ഇവിടെ താപനില 40-ന് മുകളിലും ചിലയിടങ്ങളിൽ 50 ഡിഗ്രി വരെയുമായിരിക്കും. അന്തരീക്ഷത്തിന്റെ മുകൾഭാഗത്തുണ്ടാകുന്ന ഉയർന്ന വായുമർദ്ദവും വടക്ക്-പടിഞ്ഞാറ് ദിശയിൽ നിന്ന് വീശുന്ന വരണ്ട കാറ്റുമാണ് ചൂട് ഇത്രയധികം വർധിക്കാൻ കാരണം. രാജ്യത്തെ മറ്റ് ഗവർണറേറ്റുകളിലും ചൂട് കഠിനമായിരിക്കുമെങ്കിലും അൽ വുസ്ത, ദോഫാർ എന്നീ തീരദേശ മേഖലകളിൽ ഒമാന്റെ വടക്കൻ-ഉൾനാടൻ പ്രദേശങ്ങളെ അപേക്ഷിച്ച് താരതമ്യേന ഭേദപ്പെട്ട കാലാവസ്ഥയായിരിക്കും.
തീവ്രമായ ചൂട് കണക്കിലെടുത്ത് സ്വദേശികളും പ്രവാസികളും പുറംജോലികളിൽ ഏർപ്പെടുന്നവരും കടുത്ത ജാഗ്രത പാലിക്കണമെന്ന് അതോറിറ്റി ആവശ്യപ്പെട്ടു. സൂര്യപ്രകാശം നേരിട്ട് ഏൽക്കരുത്, ഉച്ചസമയങ്ങളിൽ, പ്രത്യേകിച്ച് ചൂട് അതിന്റെ പരമാവധിയിൽ എത്തുമ്പോൾ നേരിട്ട് വെയിൽ കൊള്ളുന്നത് പൂർണ്ണമായി ഒഴിവാക്കുക, ധാരാളം വെള്ളം കുടിക്കുക എന്നിവയാണ് നിർദ്ദേശങ്ങൾ. നിർജ്ജലീകരണവും മറ്റും മൂലമുണ്ടാകുന്ന മറ്റ് ശാരീരിക അസ്വസ്ഥതകളും ഒഴിവാക്കാൻ ആവശ്യത്തിന് വെള്ളം കുടിക്കുക.
Related Articles
ജോലി സമയങ്ങളിൽ ക്രമീകരണം
- കഠിനമായ ഔട്ട്ഡോർ ജോലികൾ ചൂട് കൂടിയ സമയങ്ങളിൽ നിന്ന് മാറ്റി മറ്റ് സമയങ്ങളിലേക്ക് ക്രമീകരിക്കാൻ തൊഴിലുടമകൾ ശ്രദ്ധിക്കണം.
- തണലുള്ള ഇടങ്ങൾ ഉറപ്പാക്കുക: തൊഴിലാളികൾക്ക് വിശ്രമിക്കാൻ തണലുള്ളതോ തണുപ്പുള്ളതോ ആയ സൗകര്യങ്ങളും കുടിവെള്ള ലഭ്യതയും ഉറപ്പുവരുത്തണം.
വർഷത്തിലെ ഏറ്റവും ചൂടേറിയ കാലയളവിലൂടെയാണ് ഒമാൻ കടന്നുപോകുന്നത് എന്നതിനാൽ കാലാവസ്ഥാ വ്യതിയാനങ്ങൾ കൃത്യമായി നിരീക്ഷിക്കണമെന്നും അധികൃതർ കൂട്ടിച്ചേർത്തു.
