റിയാദ്​: റിയാദ് ഇന്ത്യൻ എംബസിയുടെ പേരിൽ സമൂഹ മാധ്യമ, ഇമെയിൽ അക്കൗണ്ടുകൾ വ്യാജമായി ഉണ്ടാക്കി പണപ്പിരിവ് നടത്തുന്നതായി ശ്രദ്ധയിൽപ്പെട്ടിട്ടുണ്ടെന്നും സൗദിയിലെ ഇന്ത്യക്കാർ കരുതിയിരിക്കണമെന്നും എംബസി വാർത്താക്കുറിപ്പിൽ അറിയിച്ചു. 

നാട്ടിലേക്ക് യാത്ര തരപ്പെടുത്തി തരാമെന്ന് അറിയിച്ച് @SupportindianEmbassy എന്ന വ്യാജ ട്വിറ്റർ അക്കൗണ്ടിൽ നിന്നും indianhighcommission20@yahoo.com എന്ന ഈമെയിലിൽ നിന്നും സന്ദേശം അയച്ചാണ് തട്ടിപ്പ് നടത്തുന്നത്. എന്നാൽ ഇത്തരം സന്ദേശങ്ങൾക്ക് ഇന്ത്യൻ എംബസിയുമായി യാതൊരു ബന്ധവുമില്ലെന്നും എംബസിയുമായി ബന്ധപ്പെട്ട എല്ലാ ഇടപാടുകൾക്കും https://www.eoiriyadh.gov.in എന്ന വെബ്സൈറ്റിൽ നൽകിയിരിക്കുന്ന ട്വിറ്റർ, ഫേസ്ബുക്ക്, ഇമെയിൽ ഐഡികളും ടെലിഫോൺ നമ്പറുകളും മാത്രമേ ഉപയോഗിക്കാവൂ എന്നും എംബസി വാർത്താകുറിപ്പിൽ  അറിയിച്ചു. എംബസിയുടെ ഔദ്യോഗിക ഇമെയിലുകളെല്ലാം @mea.gov.in എന്ന പേരിലായിരിക്കും അവസാനിക്കുക എന്നും എംബസി അറിയിച്ചു.