കള്ളന്മാരെ കൊണ്ട് രക്ഷയില്ല; നിര്‍ദേശങ്ങളുമായി കുവൈത്ത് പൊലീസ്
കൂടുതൽ ദിവസങ്ങൾ വീട്ടിൽനിന്ന് മാറിനിൽക്കുന്ന സാഹചര്യത്തിൽ അടുത്തുള്ള പൊലീസ് സ്റ്റേഷനിൽ വിവരം അറിയിക്കണമെന്നും ആഭ്യന്തര മന്ത്രാലയത്തിന്റെ അറിയിപ്പിൽ വ്യക്തമാക്കുന്നു
കുവൈത്ത് സിറ്റി: കവർച്ച സംഘങ്ങൾക്കെതിരെ വീട്ടുടമകൾ ജാഗ്രത പുലർത്തണമെന്ന് കുവൈത്ത് പൊലീസ്. താമസ കേന്ദ്രങ്ങളിൽ അപരിചിതരെ കണ്ടാൽ പൊലീസിൽ വിവരം നൽകണമെന്ന് മുന്നറിയിപ്പും നൽകി. മോഷണക്കേസുകൾ കൂടുന്നുവെന്ന പരാതിയെ തുടർന്നാണ് ആഭ്യന്തര മന്ത്രാലയത്തിന്റെ നടപടി.
വീട് പൂട്ടി പോകുന്ന ഘട്ടങ്ങളിൽ വിലപിടിപ്പുള്ള സാധനങ്ങൾ ബാങ്ക് ലോക്കറിൽ സൂക്ഷിക്കണമെന്നു പൊലീസ് പുറപ്പെടുവിച്ച നിർദ്ദേശത്തിൽ പറയുന്നു. കൂടുതൽ ദിവസങ്ങൾ വീട്ടിൽനിന്ന് മാറിനിൽക്കുന്ന സാഹചര്യത്തിൽ അടുത്തുള്ള പൊലീസ് സ്റ്റേഷനിൽ വിവരം അറിയിക്കണമെന്നും ആഭ്യന്തര മന്ത്രാലയത്തിന്റെ അറിയിപ്പിൽ വ്യക്തമാക്കുന്നു.
കൂടുതൽ ദിവസങ്ങൾ വീട് അടച്ചിടുന്ന സന്ദർഭങ്ങളിൽ ജല ടാപ്പുകൾ പൂട്ടിയിടുകയും വീടിന് പരിസരത്ത് ചെറിയ വെളിച്ചം തെളിയിക്കുകയും വേണം. അടിയന്തര സാഹചര്യങ്ങളിൽ സഹായത്തിനായി 112 എന്ന ഹോട്ട്ലൈൻ നമ്പറിൽ ബന്ധപ്പെടാം. വീടുകൾക്കും താമസ കേന്ദ്രങ്ങൾക്കും സമീപം സംശയകരമായ സാഹചര്യത്തിൽ ആരെയെങ്കിലും കണ്ടാൽ പൊലീസിനെ അറിയിക്കണമെന്നും അധികൃതർ നിർദേശിച്ചു.
താമസ കേന്ദ്രങ്ങളിൽ കൂടുതൽ പട്രോളിങ് വാഹനങ്ങൾ ഏർപ്പെടുത്താനും സുരക്ഷാ പരിശോധനക്കുള്ള ചെക് പോയിന്‍റുകള്‍ വർധിപ്പിക്കാനും മന്ത്രാലയത്തിന് പദ്ധതിയുള്ളതായി ആഭ്യന്തര അണ്ടർ സെക്രട്ടറി ഇസാം അൽ നയീം വ്യക്തമാക്കി.
