കുവൈത്തില് ലഹരിമരുന്നും ആയുധങ്ങളുമായി ആഭ്യന്തര മന്ത്രാലയത്തിലെ ജീവനക്കാരന് പിടിയില്. മയക്കുമരുന്ന് ഗുളികകൾ, ഹാഷിഷ്, മയക്കുമരുന്ന് ഉപയോഗത്തിനുള്ള ഉപകരണങ്ങൾ, ഒരു 9 എംഎം. തോക്ക്, നിരവധി വെടിയുണ്ടകൾ, ഒരു മാഗസിൻ, വെടിക്കോപ്പുകൾ എന്നിവ കണ്ടെടുത്തു.
കുവൈത്ത് സിറ്റി: മയക്കുമരുന്നും തോക്കും വെടിയുണ്ടകളുമായി ആഭ്യന്തര മന്ത്രാലയത്തിലെ ഒരു ജീവനക്കാരൻ കുവൈത്തിൽ പിടിയിലായി. ജഹ്റ എമർജൻസി വിഭാഗമാണ് ഇയാളെ അറസ്റ്റ് ചെയ്തത്. നഈം ഏരിയയിൽ വാഹനാപകടം നടന്നതായും ആളുകൾക്ക് പരിക്കേറ്റതായും എമർജൻസി കോൾ (112) ലഭിച്ചതിനെ തുടർന്നാണ് ഉദ്യോഗസ്ഥർ സ്ഥലത്തെത്തിയത്. അപകടത്തിൽ ഉൾപ്പെട്ടവരിൽ ഒരാൾ അസ്വാഭാവികമായ അവസ്ഥയിലാണെന്ന് സുരക്ഷാ ഉദ്യോഗസ്ഥർ കണ്ടെത്തി.
പരിശോധനയിൽ ഇയാൾ ആഭ്യന്തര മന്ത്രാലയത്തിലെ ജീവനക്കാരനാണെന്ന് സ്ഥിരീകരിച്ചു. ഇയാളുടെ വാഹനത്തിൽ നടത്തിയ പരിശോധനയിൽ, 'ലൈറിക' ഇനത്തിൽപ്പെട്ട മയക്കുമരുന്ന് ഗുളികകൾ, ഒരു കഷണം ഹാഷിഷ്, മയക്കുമരുന്ന് ഉപയോഗത്തിനുള്ള ഉപകരണങ്ങൾ, ഒരു 9 എംഎം. തോക്ക്, നിരവധി വെടിയുണ്ടകൾ, ഒരു മാഗസിൻ, മറ്റ് വിവിധതരം വെടിക്കോപ്പുകൾ എന്നിവ കണ്ടെടുത്തു. തുടർന്ന് പ്രതിക്കെതിരെ നിയമനടപടികൾ ആരംഭിക്കുകയും ഇയാളെയും വാഹനവും നഈം പൊലീസ് സ്റ്റേഷനിലേക്ക് കൈമാറുകയും ചെയ്തു. കൂടുതൽ അന്വേഷണങ്ങൾക്കായി പിന്നീട് കേസ് ജനറൽ ഡിപ്പാർട്ട്മെന്റ് ഫോർ ഡ്രഗ് കൺട്രോളിന് കൈമാറി.
