വിദേശ തൊഴിലാളികൾക്ക് കൃത്യസമയത്ത് ശമ്പളം നൽകാത്ത പതിനായിരത്തോളം കമ്പനികൾക്കെതിരെ കുവൈത്ത് കർശന നടപടി സ്വീകരിക്കുന്നു. ശമ്പള വിതരണത്തിലെ ക്രമക്കേടുകൾ, മനുഷ്യക്കടത്ത് എന്നിവ തടയുന്നതിനൊപ്പം വിദേശികളുടെ എണ്ണം പരിമിതപ്പെടുത്താനും സർക്കാർ പദ്ധതിയിടുന്നു. നിയമലംഘനം നടത്തുന്ന കമ്പനികളുടെ ഫയലുകൾ മരവിപ്പിക്കുമെന്നും അധികൃതർ മുന്നറിയിപ്പ് നൽകി.
കുവൈത്ത് സിറ്റി: വിദേശ തൊഴിലാളികളുടെ ശമ്പളം കൃത്യസമയത്ത് നൽകാത്ത പതിനായിരത്തോളം കമ്പനികൾക്കെതിരെ കർശന നടപടിയുമായി കുവൈത്ത്. രാജ്യത്ത് ആരെയും അനീതിക്കിരയാക്കില്ലെന്നും നിയമലംഘനങ്ങൾ വെച്ചുപൊറുപ്പിക്കില്ലെന്നും പ്രഥമ ഉപപ്രധാനമന്ത്രിയും ആഭ്യന്തര മന്ത്രിയുമായ ശൈഖ് ഫഹദ് അൽ-യൂസഫ് വ്യക്തമാക്കി. അഞ്ച് ജീവനക്കാരിലധികം ഉള്ള പതിനായിരത്തോളം കമ്പനികൾ മാസങ്ങളായി തൊഴിലാളികളുടെ ശമ്പളം നൽകുന്നില്ലെന്ന് അദ്ദേഹം വെളിപ്പെടുത്തി.
ശമ്പള വിതരണവുമായി ബന്ധപ്പെട്ട് നിരവധി ക്രമക്കേടുകളാണ് അധികൃതർ കണ്ടെത്തിയിരിക്കുന്നത്. രേഖകളിൽ 3,000 ദിനാർ ശമ്പളമുള്ള ഒരു പൗരന് യഥാർത്ഥത്തിൽ ലഭിക്കുന്നത് 180 ദിനാർ മാത്രമാണെന്ന വിവരവും അദ്ദേഹം പുറത്തുവിട്ടു. സ്റ്റേറ്റ് സെക്യൂരിറ്റിയുടെ അന്വേഷണ പരിധിയിൽ കള്ളപ്പണ ഇടപാട് കേസുകൾ വർദ്ധിച്ചതായും ശൈഖ് ഫഹദ് അൽ-യൂസഫ് മുന്നറിയിപ്പ് നൽകി. എല്ലാ മാസവും 20-ാം തീയതിക്ക് മുൻപ് കമ്പനികൾ ജീവനക്കാരുടെ ശമ്പളം നൽകിയിരിക്കണമെന്ന് പ്രഥമ ഉപപ്രധാനമന്ത്രി പ്രഖ്യാപിച്ചു. നിയമം എല്ലാവർക്കും ഒരുപോലെ ബാധകമാണെന്നും കമ്പനി ഉടമകളുടെ സ്വാധീനമൊന്നും നടപ്പില്ലെന്നും അദ്ദേഹം ഓർമ്മിപ്പിച്ചു.
ശമ്പളം വൈകിപ്പിക്കുന്നത്, മനുഷ്യക്കടത്ത്, കള്ളപ്പണ വെളുപ്പിക്കൽ എന്നിവ കുവൈത്തിന്‍റെ പ്രതിച്ഛായയെയാണ് തകർക്കുന്നത്. കഴിഞ്ഞ രണ്ട് ആഴ്ചയ്ക്കിടെ 300 ഡെലിവറി തൊഴിലാളികളെ പിരിച്ചുവിട്ടതായും വിവിധ പിഴകളുടെ പേരിൽ തൊഴിലാളികളുടെ കൂലിയിൽ നിന്നും തുക വെട്ടിക്കുറയ്ക്കുന്നത് അംഗീകരിക്കാനാകില്ലെന്നും അദ്ദേഹം വ്യക്തമാക്കി. ഡെലിവറി തൊഴിലാളികളെ 18 മണിക്കൂർ വരെ ജോലി ചെയ്യിക്കുന്നത് നിർത്തലാക്കണമെന്നും അദ്ദേഹം ആവശ്യപ്പെട്ടു.
Related Articles
കമ്പനികളിൽ ഓരോ രാജ്യക്കാരായ തൊഴിലാളികളുടെ ശതമാനം 30 ശതമാനം മുതൽ 40 ശതമാനം വരെയായി പരിമിതപ്പെടുത്തുന്ന കാര്യം പരിഗണനയിലാണെന്ന് ശൈഖ് ഫഹദ് അൽ-യൂസഫ് അറിയിച്ചു. ഇത് മറികടക്കുന്ന കമ്പനികളിൽ നിന്ന് അധിക ഫീസ് ഈടാക്കും. ആർട്ടിക്കിൾ 20 വിസയിലുള്ള ഗാർഹിക തൊഴിലാളികളുടെ റെസിഡൻസി പെർമിറ്റ് സ്വകാര്യ മേഖലയിലേക്ക് മാറ്റുന്നതിനുള്ള അനുമതിയും സർക്കാരിന്റെ സജീവ പരിഗണനയിലാണ്.
തൊഴിൽ വകുപ്പിന്‍റെ കണക്കുകൾ
പബ്ലിക് അതോറിറ്റി ഫോർ മാൻപവർ ഡയറക്ടർ ജനറൽ എൻജിനീയർ റബാബ് അൽ-ഓസൈമി യോഗത്തിൽ വിശദാംശങ്ങൾ അവതരിപ്പിച്ചു. ശമ്പളം നൽകാൻ വീഴ്ച വരുത്തുന്ന കമ്പനികളുടെ ഫയലുകൾ മരവിപ്പിക്കുമെന്ന് അവർ വ്യക്തമാക്കി. 2026 ജൂൺ വരെയുള്ള കണക്ക് പ്രകാരം ശമ്പളം നൽകാത്തതിനെ തുടർന്ന് 8,849 കമ്പനി ഫയലുകൾ മരവിപ്പിച്ചിട്ടുണ്ട്. കർശന നടപടികളുടെ ഫലമായി ശമ്പള വിതരണത്തിലെ അനുസരണ നിരക്ക് 2025 ജൂലൈയിലെ 38.7 ശതമാനത്തിൽ നിന്ന് 2026 ജൂലൈയിൽ 75.6 ശതമാനം ആയി ഉയർന്നു. 2026 ജനുവരി മുതൽ സെപ്റ്റംബർ വരെയുള്ള കാലയളവിൽ ശമ്പള ശേഖരണ സംവിധാനത്തിലൂടെ 93,865 അപേക്ഷകളാണ് ലഭിച്ചത്. ഇതിൽ 93,852 അപേക്ഷകൾ അംഗീകരിച്ചു. തൊഴിലാളികളുടെ അവകാശങ്ങൾ സംരക്ഷിക്കുന്നതിനും തൊഴിൽ വിപണിയിൽ കൂടുതൽ സുതാര്യത ഉറപ്പാക്കുന്നതിനുമുള്ള ശക്തമായ നടപടികളുമായി മുന്നോട്ട് പോകാനാണ് കുവൈത്ത് സർക്കാരിന്റെ തീരുമാനം.
