കുവൈത്ത് അന്താരാഷ്ട്ര വിമാനത്താവളത്തിൽ കസ്റ്റംസ് നടത്തിയ പരിശോധനയിൽ വിദേശത്ത് നിന്നെത്തിയ രണ്ട് യാത്രക്കാർ മയക്കുമരുന്നുമായി പിടിയിലായി. ടെർമിനൽ 4-ൽ നിന്ന് ബെനിൻ സ്വദേശിനിയായ ഗാർഹിക തൊഴിലാളിയും ടെർമിനൽ 5-ൽ നിന്ന് ഒരു ഇന്ത്യൻ പൗരനുമാണ് അറസ്റ്റിലായത്. ഇവരിൽ നിന്ന് കഞ്ചാവും ഹെറോയിനും പിടിച്ചെടുത്തു.
കുവൈത്ത് സിറ്റി: മയക്കുമരുന്ന് കടത്ത് തടയുന്നതിന്റെ ഭാഗമായി ജനറൽ അഡ്മിനിസ്ട്രേഷൻ ഓഫ് കസ്റ്റംസ് കുവൈത്ത് അന്താരാഷ്ട്ര വിമാനത്താവളത്തിൽ നടത്തിയ പരിശോധനയിൽ വിദേശത്ത് നിന്നും മയക്കുമരുന്നുമായി എത്തിയ രണ്ട് യാത്രക്കാർ പിടിയിലായി. ടെർമിനൽ 4 വഴി എത്യോപ്യയിലെ അഡിസ് അബാബയിൽ നിന്ന് എത്തിയ വനിതാ യാത്രക്കാരിയുടെ ലഗേജിൽ നിന്നാണ് വൻതോതിൽ കഞ്ചാവ് പിടിച്ചെടുത്തത്.
സംശയാസ്പദമായ സാഹചര്യത്തിൽ കസ്റ്റംസ് ഉദ്യോഗസ്ഥർ നടത്തിയ പരിശോധനയിലാണ് ടെർമിനൽ 4-ൽ വെച്ച് ഇവർ പിടിയിലായത്. വിൽപ്പനയ്ക്കായി പാക്കറ്റുകളിലാക്കി സൂക്ഷിച്ചിരുന്ന 564 ചെറിയ പാക്കറ്റുകളിലായി 1.763 കിലോഗ്രാം കഞ്ചാവാണ് ഇവരുടെ കൈവശം ഉണ്ടായിരുന്നത്. ബെനിൻ പൗരത്വമുള്ള ഈ യുവതി രാജ്യത്ത് ഗാർഹിക തൊഴിലാളിയായി ജോലി ചെയ്തുവരികയായിരുന്നു.
മറ്റൊരു സംഭവത്തിൽ, ടെർമിനൽ 5-ൽ നടത്തിയ പരിശോധനയിൽ ഇന്ത്യൻ പൗരനായ മറ്റൊരു യാത്രക്കാരനും പിടിയിലായി. ഇയാളുടെ കൈവശം 2 ഗ്രാം ഹെറോയിൻ അടങ്ങിയ 7 ചെറിയ കവറുകളും, 8 ഗ്രാം കഞ്ചാവും കണ്ടെടുത്തു. തുടർനടപടികൾക്കായി പിടിച്ചെടുത്ത വസ്തുക്കൾ സഹിതം രണ്ട് പ്രതികളെയും ബന്ധപ്പെട്ട സുരക്ഷാ വിഭാഗത്തിന് കൈമാറി.
