പുതുവത്സര ദിനത്തില് ഷാര്ജയില് സൗജന്യ പാര്ക്കിങ്
നുവരി രണ്ട് ചൊവ്വാഴ്ച മുതല് പെയ്ഡ് പാര്ക്കിങ് പുനരാരംഭിക്കുമെന്ന് ഷാര്ജ മുന്സിപ്പാലിറ്റി അറിയിച്ചു.
![Sharjah announces free parking on new year holiday Sharjah announces free parking on new year holiday](https://static-ai.asianetnews.com/images/01eea0e3pwq11mca4pcce2k05h/sharjah-parking-png_363x203xt.jpg)
ഷാര്ജ: പുതുവത്സര ദിനമായ ജനുവരി ഒന്ന് തിങ്കളാഴ്ച ഷാര്ജയില് സൗജന്യ പാര്ക്കിങ് പ്രഖ്യാപിച്ചു. ഷാര്ജ മുന്സിപ്പാലിറ്റിയാണ് ഇക്കാര്യം അറിയിച്ചത്. ജനുവരി രണ്ട് ചൊവ്വാഴ്ച മുതല് പെയ്ഡ് പാര്ക്കിങ് പുനരാരംഭിക്കുമെന്ന് ഷാര്ജ മുന്സിപ്പാലിറ്റി അറിയിച്ചു.
അതേസമയം നീല നിറത്തില് അടയാളപ്പെടുത്തിയിരിക്കുന്ന പാര്ക്കിങ് ഏരിയകളില് തിങ്കളാഴ്ചയും പെയ്ഡ് പാര്ക്കിങ് തന്നെയാകും. ഔദ്യോഗിക, പൊതു അവധി ദിവസങ്ങളിലടക്കം ആഴ്ചയില് ഏഴ് ദിവസവും ഇവിടെ പെയ്ഡ് പാര്ക്കിങാണ് ഉള്ളത്.
പുതുവത്സര ദിനമായ ജനുവരി ഒന്ന് തിങ്കളാഴ്ച ദുബൈയിലും സൗജന്യ പാര്ക്കിങ് പ്രഖ്യാപിച്ചിട്ടുണ്ട്. റോഡ് ഗതാഗത അതോറിറ്റിയാണ് ഇക്കാര്യം അറിയിച്ചത്. മള്ട്ടി ലെവല് പാര്ക്കിങുകള് ഒഴികെയുള്ള സ്ഥലങ്ങളിലാണ് സൗജന്യ പാര്ക്കിങ് ലഭിക്കുക. ഞായറാഴ്ചകളില് സൗജന്യ പാര്ക്കിങ് നിലവിലുള്ളതിനാല് തുടര്ച്ചയായി രണ്ടു ദിവസമാണ് ദുബൈയിലെ താമസക്കാര്ക്ക് സൗജന്യ പാര്ക്കിങ് ലഭിക്കുക. അതേസമയം പുതുവത്സര ദിനത്തില് യുഎഇയിലെ സ്വകാര്യ മേഖലാ ജീവനക്കാര്ക്ക് ശമ്പളത്തോട് കൂടിയ അവധി പ്രഖ്യാപിച്ചിട്ടുണ്ട്.
2024 ജനുവരി ഒന്നിന് അവധി ദിനമായിരിക്കുമെന്ന് മാനവവിഭവശേഷി സ്വദേശിവത്കരണ മന്ത്രാലയം അറിയിച്ചു. എക്സ് പ്ലാറ്റ്ഫോമിലൂടെയാണ് മന്ത്രാലയം ഇക്കാര്യം അറിയിച്ചത്. വാരാന്ത്യ അവധി ദിവസങ്ങള്ക്ക് പിന്നാലെയാണ് യുഎഇയില് സ്വകാര്യ മേഖലയ്ക്ക് പുതുവത്സരം ആഘോഷിക്കാന് തിങ്കളാഴ്ചയും അവധി നല്കുന്നത്. അതിനാല് ആകെ മൂന്ന് ദിവസത്തെ അവധിയാണ് വരാനിരിക്കുന്നത്. ഫെഡറല് സര്ക്കാര് സ്ഥാപനങ്ങള്ക്ക് ഫെഡറല് അതോറിറ്റി ഫോര് ഗവണ്മെന്റ് ഹ്യൂമന് റിസോഴ്സസ് പുതുവത്സര അവധി പ്രഖ്യാപിച്ചിരുന്നു.
Read Also - വാഹന വിൽപന നടപടികൾ ‘അബ്ഷിർ’വഴി പൂർത്തിയാക്കാനാകുമെന്ന് ട്രാഫിക് വകുപ്പ്
ഗ്രാന്ഡ് മോസ്കില് രാത്രികാലങ്ങളിലും സന്ദര്ശനത്തിന് അനുമതി
അബുദാബി: ശൈഖ് സായിദ് ഗ്രാന്ഡ് മോസ്കില് രാത്രികാലങ്ങളില് സന്ദര്ശനത്തിന് അനുമതി. ഇതോടെ 24 മണിക്കൂറും പൊതുജനങ്ങള്ക്ക് മോസ്ക് സന്ദര്ശിക്കാനാകും. രാത്രി 10 മുതല് രാവിലെ ഒമ്പത് വരെയാണ് സന്ദര്ശന സമയം.
ശൈഖ് സായിദ് മസ്ജിദിന്റെ പതിനാറാം വാര്ഷികത്തോടനുബന്ധിച്ചാണ് സൂറ ഈവനിങ് കള്ചറല് ടൂര്സ് എന്ന പേരില് രാത്രി സന്ദര്ശനം ആരംഭിച്ചത്. രാത്രിയിലെ യാത്ര എന്നാണ് സൂറ എന്ന അറബിക് പദത്തിന്റെ അര്ഥം. 14 ഭാഷകളില് മള്ട്ടിമീഡിയ ഗൈഡ് ഡിവൈസ് സന്ദര്ശകര്ക്ക് ഉപയോഗപ്പെടുത്താം. അന്ധര്ക്കും ബധിരര്ക്കും കൂടി പ്രയോജനപ്പെടുന്ന രീതിയിലാണ് ഇത് തയാറാക്കിയിരിക്കുന്നത്. 20 ദിര്ഹമാണ് പ്രവേശന ഫീസ്. wwws.zgmc.gov.ae എന്ന വെബ്സൈറ്റിലൂടെ ടിക്കറ്റ് ബുക്ക് ചെയ്യാം. ശനി മുതല് വ്യാഴം വരെ രാവിലെ ഒമ്പതു മുതല് രാത്രി 10 വരെയും വെള്ളി രാവിലെ ഒമ്പതു മുതല് ഉച്ചക്ക് 12 വരെയും വൈകീട്ട് മൂന്ന് മുതല് രാത്രി 10 വരെയുമാണ് മറ്റു സന്ദർശന സമയം.
ഏഷ്യാനെറ്റ് ന്യൂസ് ലൈവ് യുട്യൂബില് കാണാം...