ബ്ലാക്ക്പിങ്ക് താരം ലിസയുടെ ഈ വർഷത്തെ ഹാലോവീൻ കോസ്റ്റ്യൂം ഒരു സാധാരണ വേഷമായിരുന്നില്ല, മറിച്ച്, ആനിമേഷൻ ലോകത്തെയും ഫാഷൻ ലോകത്തെയും ഒരുപോലെ വിസ്മയിപ്പിച്ച ഒരു 'വിഷ്വൽ മാസ്റ്റർപീസ്' ആയിരുന്നു.
ഓരോ ഹാലോവീനും ലോകമെമ്പാടുമുള്ള സെലിബ്രിറ്റികൾക്ക് തങ്ങളുടെ സർഗ്ഗാത്മകത പുറത്തെടുക്കാനുള്ള വേദിയാണ്. എന്നാൽ ഈ വർഷം, കെ-പോപ്പ് ലോകത്ത് നിന്ന് ബ്ലാക്ക്പിങ്ക് താരം ലിസ അവതരിപ്പിച്ച വേഷം എല്ലാവരെയും അമ്പരപ്പിച്ചു. നെറ്റ്ഫ്ലിക്സ് ആനിമേറ്റഡ് സീരീസായ 'ലവ്, ഡെത്ത് + റോബോട്ട്സ്' വോളിയം 3-യിലെ ജിബാരോ എന്ന എപ്പിസോഡിലെ സൈറൺ കഥാപാത്രത്തെയാണ് ലിസ പുനരവതരിപ്പിച്ചത്.
അമാനുഷിക ശക്തിയുള്ള ഒരു ജലദേവതയാണ് സൈറൺ. അവളുടെ നിലവിളി കേൾക്കുന്നവരെയെല്ലാം അവൾ ആകർഷിക്കുകയും നശിപ്പിക്കുകയും ചെയ്യുന്നു. ലവ്, ഡെത്ത് + റോബോട്ട്സ് സീരീസിലെ ഏറ്റവും ചർച്ച ചെയ്യപ്പെട്ട എപ്പിസോഡണ് 'ജിബാരോ'. ഈ എപ്പിസോഡ് അത്യാഗ്രഹം, കാമം, ഭ്രാന്തമായ അഭിനിവേശം എന്നി പ്രമേയങ്ങൾ ഉൾക്കെള്ളുന്നതാണ്.
ജിബാരോയുടെ ലുക്ക് വളരെ സങ്കീർണ്ണമാണ്. അത്യാഗ്രഹത്തിൻ്റെ പ്രതീകമായ ഈ ജലദേവതയുടെ ശരീരം മുഴുവൻ സ്വർണ്ണാഭരണങ്ങളും രത്നക്കല്ലുകളും കൊണ്ട് അലങ്കരിച്ചതാണ്. കഥാപാത്രത്തിൻ്റെ സൗന്ദര്യാത്മകത ഒട്ടും ചോരാതെയാണ് ലിസ ഈ വേഷപ്പകർച്ച പൂർത്തിയാക്കിയത്.
Related Articles
തല മുതൽ പാദം വരെ സ്വർണ്ണ ചെയിനുകളും മുത്തുകളും കൊണ്ട് പൊതിഞ്ഞും വലിയൊരു ഹെഡ്പീസും കട്ടിയുള്ള ആഭരണങ്ങളും ചേർന്നതോടെ ലിസ അക്ഷരാർത്ഥത്തിൽ ഒരു 'ഗോൾഡൻ സൈറൺ' ആയി മാറുകയായിരുന്നു. കഥാപാത്രത്തിൻ്റെ ഏറ്റവും വലിയ പ്രത്യേകത കണ്ണുകളാണ്. ലിസയുടെ മേക്കപ്പ് ആ കണ്ണുകൾക്ക് കൂടുതൽ തിളക്കം നൽകി. കടും നിറങ്ങളിലുള്ള ഐഷാഡോയും, നീല നിറത്തിലുള്ള പുരികങ്ങളും, ലിപ്സ്റ്റിക്കിൽ പതിപ്പിച്ച റൈൻസ്റ്റോണുകളും ഈ ലുക്കിനെ പൂർണ്ണമാക്കി.
ഫാഷൻ ലോകത്തെ പുതിയ ട്രെൻഡുകൾക്ക് തുടക്കമിടുന്ന ലിസ, തന്റെ ഹാലോവീൻ വേഷം വളരെ രഹസ്യമായാണ് സൂക്ഷിച്ചിരുന്നത്. ഈ അപ്രതീക്ഷിത വേഷപ്പകർച്ച കണ്ട് ആരാധകർ അക്ഷരാർത്ഥത്തിൽ അമ്പരന്നുപോയി.
തന്റെ ഇൻസ്റ്റാഗ്രാം അക്കൗണ്ടിലൂടെ ലിസ ചിത്രങ്ങൾ പങ്കുവെച്ചതോടെ നിമിഷങ്ങൾക്കകം തന്നെ അത് വൈറലായി. നിരവധി ആരാധകരും സെലിബ്രിറ്റികളും ഈ വേഷപ്പകർച്ചയെ ഏറ്റെടുത്തുകഴിഞ്ഞു.
