ജോഹന്നാസ്ബര്ഗ്: ഇംഗ്ലീഷ് പേസ് ബൗളര് ജെയിംസ് ആന്ഡേഴ്സണെ കുഴക്കിയ ബാറ്റ്സ്മാന്മാരുടെ പട്ടികയില് ഇന്ത്യന് ബാറ്റിംഗ് ഇതിഹാസം സച്ചിന് ടെന്ഡുല്ക്കറില്ല. ആന്ഡേഴ്സണ് ഏറ്റവും വെല്ലുവിളി ഉയര്ത്തിയ ബാറ്റ്സ്മാന്മാര് ദക്ഷിണാഫ്രിക്കന് താരം ഹാഷിം അംലയും ഓസീസിന്റെ മുന് ക്യാപ്റ്റന് റിക്കി പോണ്ടിങ്ങുമാണ്. ഐ.പി.എല്ലിനിടെ ഷെയ്ന് വോണുമായി നടത്തിയ ടെലിവിഷന് പരിപാടിയിലാണ് ആന്ഡേഴ്സണ് ഇക്കാര്യം പറഞ്ഞത്.
പോണ്ടിങ്ങിനെതിരെ പന്തെറിയാന് പ്രയാസമാണ്.പ്രത്യേകിച്ച് ഓസ്ട്രേലിയയില് നടക്കുന്ന കളിയില്. ടെസ്റ്റ് ക്രിക്കറ്റില് ഹാഷിം അംലക്കെതിരെയും പന്തെറിയാന് പ്രയാസമാണ്. ഇരുവരും നിലയുറപ്പിച്ചാല് പിന്നെ പുറത്താക്കാന് ഏറ്റവും പ്രയാസകരമാണെന്നും ആന്ഡേഴ്സണ് പറയുന്നു. അന്താരാഷ്ട്ര ക്രിക്കറ്റില് 122 ടെസ്റ്റുകള് കളിച്ചിട്ടുളള ആന്ഡേഴ്സണ് 28.50 ശരാശരിയില് 467 വിക്കറ്റുകള് വീഴ്ത്തിയിട്ടുണ്ട്. ഇംഗ്ലണ്ടിന്റെ ഏറ്റവും അധികം വിക്കറ്റ് നേടിയിട്ടുളള താരമാണ് ആന്ഡേഴ്സണ്.
എന്നാല് ഷെയ്ന് വോണിനെ വെള്ളംകുടിപ്പിച്ച ബാറ്റ്സ്മാന്മാരുടെ പട്ടികയില് സച്ചിന് ടെന്ഡുല്ക്കറുണ്ട്. ബ്രയാന് ലാറ, ജാക്ക് കാലിസ്, കെവിന് പീറ്റേഴ്സണ്, ഗ്രഹാം ഗൂച്ച് എന്നീ ബാറ്റ്സ്മാന് തന്റെ ടെസ്റ്റ് കരിയറില് ഒരുപാട് കുഴക്കിയിട്ടുണ്ടെന്ന് വോണ് പറയുന്നു.
