ഇന്ത്യ 250ന് പുറത്ത്; ഓസീസിനും ആദ്യ വിക്കറ്റ് നഷ്ടം
ഓസ്ട്രേലിയക്കെതിരായ ആദ്യ ടെസ്റ്റിന്റെ ഒന്നാം ഇന്നിങ്സില് ഇന്ത്യ 250ന് എല്ലാവരും പുറത്തായി. തലേദിവസ സ്കോറിനോട് ഒരു റണ്പോലും കൂട്ടിച്ചേര്ക്കാന് ഇന്ത്യക്ക് സാധിച്ചില്ല. രണ്ടാം ദിവസത്തെ ആദ്യ പന്തില് തന്നെ മുഹമ്മദ് ഷമി (6) ഓസീസ് പേസര് ജോഷ് ഹേസല്വുഡിന് വിക്കറ്റ് നല്കി മടങ്ങി.
അഡ്ലെയ്ഡ്: ഓസ്ട്രേലിയക്കെതിരായ ആദ്യ ടെസ്റ്റിന്റെ ഒന്നാം ഇന്നിങ്സില് ഇന്ത്യ 250ന് എല്ലാവരും പുറത്തായി. തലേദിവസ സ്കോറിനോട് ഒരു റണ്പോലും കൂട്ടിച്ചേര്ക്കാന് ഇന്ത്യക്ക് സാധിച്ചില്ല. രണ്ടാം ദിവസത്തെ ആദ്യ പന്തില് തന്നെ മുഹമ്മദ് ഷമി (6) ഓസീസ് പേസര് ജോഷ് ഹേസല്വുഡിന് വിക്കറ്റ് നല്കി മടങ്ങി. ഓസീസിന് വേണ്ടി ഹേസല്വുഡ് മൂന്ന് വിക്കറ്റ് വീഴ്ത്തി. പാറ്റ് കമ്മിന്സ്, മിച്ചല് സ്റ്റാര്ക്ക്, നഥാന് ലിയോണ് എന്നിവര്ക്ക് രണ്ട് വിക്കറ്റുണ്ട്. മറുപടി ബാറ്റിങ് ആരംഭിച്ച ഓസീസിന് ആദ്യ വിക്കറ്റ് നഷ്ടമായി. ഓപ്പണര് ആരോണ് ഫിഞ്ചിനെ റണ്സെടുക്കും മുന്പെ ഇശാന്ത് ശര്മ മടക്കിയയച്ചു. എട്ടോവര് പിന്നിടുമ്പോള് ഓസീസ് 19ന് ഒന്ന് എന്ന നിലയിലാണ്.
ഇന്നലെ ഇന്ത്യന് താരം ചേതേശ്വര് പൂജാരയുടെ തകര്പ്പന് സെഞ്ചുറിയാണ് ഇന്ത്യയുടെ മുഖം രക്ഷിച്ചത്. ഒരുവശത്ത് വിക്കറ്റ് കൊഴിയുമ്പോള് പ്രതിരോധിച്ച് കളിച്ച പൂജാര ഓസ്ട്രേലിയന് മണ്ണില് തന്റെ 'റിയല് ക്ലാസ്' കാട്ടുകയായിരുന്നു. മൂന്നാമനായി ഇറങ്ങി 231 പന്തില് ആറ് ബൗണ്ടറിയും ഒരു സിക്സും സഹിതമാണ് പൂജാര 16-ാം ടെസ്റ്റ് സെഞ്ചുറി തികച്ചത്. ടോസ് നേടി ബാറ്റിംഗ് ആരംഭിച്ച ഇന്ത്യ തുടക്കത്തില് 19 റണ്സിന് മൂന്ന് വിക്കറ്റ് വലിച്ചെറിഞ്ഞിരുന്നു. രണ്ട് റണ്സ് മാത്രമെടുത്ത ഓപ്പണര് ലോകേഷ് രാഹുലിനെ രണ്ടാം ഓവറിലെ അവസാന പന്തില് പേസര് ജോഷ് ഹെയ്സല്വുഡ് ഫിഞ്ചിന്റെ കൈകളിലെത്തിച്ചു. സഹ ഓപ്പണര് മുരളി വിജയി 11 റണ്സുമായി ഏഴാം ഓവറില് സ്റ്റാര്ക്കിന് കീഴടങ്ങി. നാലാമനായെത്തിയ നായകന് വിരാട് കോലിയെ മൂന്ന് റണ്സില് നില്ക്കേ ഖവാജയുടെ പറക്കും ക്യാച്ചില് കമ്മിണ്സ് ഡ്രസിംഗ് റൂമിലേക്ക് മടക്കി.
മധ്യനിരയില് പ്രതിരോധക്കോട്ടെ കെട്ടുമെന്ന് കരുതിയ രഹാനെയെ(13) ഹെയ്സല്വുഡ് പുറത്താക്കിയതോടെ ആദ്യ സെഷനില് നാലിന് 56 റണ്സെന്ന നിലയില് ഇന്ത്യ പ്രതിരോധത്തിലായി. എന്നാല് രണ്ടാം സെഷനില് ആക്രമിച്ച് കളിച്ചുതുടങ്ങിയ രോഹിത് ശര്മ്മയ്ക്ക് ആവേശമാണ് വിനയായത്. 38-ാം ഓവറിലെ രണ്ടാം പന്തില് ലിയോണെ രോഹിത് സിക്സര് പറത്തി. തൊട്ടടുത്ത പന്തിലും സിക്സിനുള്ള ഹിറ്റ്മാന്റെ ശ്രമം ഹാരിസിന്റെ കൈകളില് അവസാനിച്ചു. 61 പന്തില് 37 റണ്സാണ് രോഹിത് നേടിയത്.
മിന്നും വേഗത്തില് തുടങ്ങിയ റിഷഭ് പന്തിനും അധിക സമയം പിടിച്ചുനില്ക്കാനായില്ല. ലിയോണിന്റെ പന്തില് വിക്കറ്റ് കീപ്പര് പെയ്നിന് ക്യാച്ച് നല്കി പന്ത് മടങ്ങി. 38 പന്തില് പന്ത് നേടിയത് 25 റണ്സ്. ഇതോടെ ഇന്ത്യ ആറ് വിക്കറ്റിന് 127 റണ്സ് എന്ന നിലയിലായി. എന്നാല് പൊരുതിനിന്ന പൂജാര പിന്നാലെ അര്ദ്ധ സെഞ്ചുറി തികയ്ക്കുകയായിരുന്നു. പിന്നാലെ അശ്വിനെ കൂട്ടുപിടിച്ചായി പൂജാരയുടെ രക്ഷാപ്രവര്ത്തനം. എന്നാല് 76 പന്തില് 25 റണ്സെടുത്ത അശ്വിനെ 74-ാം ഓവറില് കമ്മിണ്സ് പുറത്താക്കിയത് തിരിച്ചടിയായി.
ഇശാന്തിനും തിളങ്ങാനായില്ല. 20 പന്തില് നാല് റണ്സെടുത്ത താരത്തെ സ്റ്റാര്ക് ബൗള്ഡാക്കി. എട്ട് വിക്കറ്റ് നഷ്ടപ്പെടുമ്പോള് 210 റണ്സാണ് ഇന്ത്യക്കുണ്ടായിരുന്നത്. എന്നാല് ഇതിന് പിന്നാലെ പൂജാര സെഞ്ചുറി തികച്ചു. സെഞ്ചുറിക്ക് ശേഷം വേഗമാര്ജിച്ച പൂജാര 123ല് നില്ക്കേ റണ് ഔട്ടായതോടെ ഒന്നാം ദിനം കളിയവസാനിപ്പിക്കുകയായിരുന്നു.