ന്യൂസീലന്ഡിനെതിരായ ആദ്യ ടി20യില് 220 റണ്സ് വിജയലക്ഷ്യം പിന്തുടരുന്ന ഇന്ത്യയുടെ തുടക്കം തകര്ച്ചയോടെ. അക്കൗണ്ടില് 18 റണ്സ് കൂട്ടിച്ചേര്ക്കുന്നതിനിടെ ഇന്ത്യക്ക് ആദ്യ വിക്കറ്റ് നഷ്ടമായി
വെല്ലിങ്ടണ്: ന്യൂസീലന്ഡിനെതിരായ ആദ്യ ടി20യില് 220 റണ്സ് വിജയലക്ഷ്യം പിന്തുടരുന്ന ഇന്ത്യയുടെ തുടക്കം തകര്ച്ചയോടെ. അക്കൗണ്ടില് 18 റണ്സ് കൂട്ടിച്ചേര്ക്കുന്നതിനിടെ ഇന്ത്യക്ക് ആദ്യ വിക്കറ്റ് നഷ്ടമായി. അഞ്ച് പന്തില് ഒരു റണ്സെടുത്ത നായകന് രോഹിത് ശര്മ്മയെ ഫെര്ഗൂസന്റെ കൈകളില് സൗത്തി അവസാനിപ്പിച്ചു. നാല് ഓവര് പൂര്ത്തിയാകുമ്പോള് ഒരു വിക്കറ്റിന് 29 റണ്സെന്ന നിലയിലാണ് ഇന്ത്യ.
ടോസ് നഷ്ടപ്പെട്ട് ആദ്യം ബാറ്റ് ചെയ്ത കിവികള് സീഫര്ട്ടിന്റെ വെടിക്കെട്ട് ബാറ്റിംഗില് നിശ്ചിത 20 ഓവറില് ആറ് വിക്കറ്റ് നഷ്ടത്തില് 219 റണ്സെടുത്തിരുന്നു. കോളിന് മണ്റോയും ടിം സിഫര്ട്ടും കിവീസിന് മികച്ച തുടക്കം നല്കി. ഇരുവരും ഒന്നാം വിക്കറ്റില് 86 റണ്സ് കൂട്ടിച്ചേര്ത്തു. മണ്റോ 20 പന്തില് 34 റണ്സെടുത്തു. പിന്നെകണ്ടത് സീഫര്ട്ടിന്റെ അടിപൂരം. 43 പന്തില് ഏഴ് ബൗണ്ടറിയും ആറ് സിക്സും സഹിതം 84 റണ്സെടുത്തു സിഫര്ട്ട്.
വില്യംസണ് 24 പന്തില് 34, ടെയ്ലര് 14 പന്തില് 23 എന്നിങ്ങനെ പിന്നാലെ വന്നവരും അവസരം മുതലാക്കി. ഏഴ് പന്തില് 20 റണ്സുമായി സ്കോട്ട് അവസാന ഓവറുകളില് അഞ്ഞടിച്ചതോടെ ന്യൂസീലന്ഡ് 200 കടന്നു. സ്കോട്ടിനൊപ്പം സാന്റ്നര് ഏഴ് റണ്സുമായി പുറത്താകാതെ നിന്നു. ഇന്ത്യക്കായി ഹര്ദിക് രണ്ടും ഭുവിയും ഖലീലും ക്രുണാലും ചാഹലും ഓരോ വിക്കറ്റുകളും വീഴ്ത്തി. ചാഹലും ക്രുണാലും മാത്രമാണ് 10ല്താഴെ ശരാശരിയില് പന്തെറിഞ്ഞത്.
