പൂനെ: ബല്‍വാഡി സ്റ്റേഡിയത്തിലെ ഗോള്‍ വര്‍ഷത്തില്‍ ദില്ലി ഡൈനമോസിന് വിജയം. പൂനെയുടെ സിറ്റിയുടെ ഹോം ഹ്രൗണ്ടില്‍ നടന്ന ആവേശകരമായ മത്സരത്തില്‍ രണ്ടിനെതിരെ മൂന്ന് ഗോളുകള്‍ക്കാണ് ഡൈനമോസ് വിജയിച്ചത്. ആദ്യ പകുതിയില്‍ ഒരു ഗോള്‍ പിറന്നപ്പോള്‍ ബാക്കി നാല് ഗോളുകളും രണ്ടാം പകുതിയിലായിരുന്നു. 

46-ാം മിനുറ്റില്‍ പൗളിഞ്ഞോയിലൂടെ ദില്ലി ഗോള്‍വേട്ടക്ക് തുടക്കം കുറിച്ചു. രണ്ടാം പകുതിയില്‍ 54-ാം മിനുറ്റില്‍ ലാലൈന്‍സ്വാലയും 65-ാം മിനുറ്റില്‍ മത്തിയാസും വലകുലുക്കി ദില്ലിക്ക് ഏകപക്ഷീയമായ മൂന്ന് ഗോളുകളുടെ ലീഡ് സമ്മാനിച്ചു. എന്നാല്‍ പൊരുതിക്കളിച്ച പുനെ രണ്ട് മിനുറ്റുകള്‍ക്ക് ശേഷം ആദ്യ ഗോള്‍ നേടി. 

90 മിനുറ്റ് പൂര്‍ത്തിയായപ്പോള്‍ 1-3ന് പിന്നിലായിരുന്നു പുനെ സിറ്റി. റഫറി അഞ്ച് മിനുറ്റ് അധികസമയം അനുവദിച്ചതോടെ കളി കനത്തു. എന്നാല്‍ 93-ാം മിനുറ്റില്‍ ലഭിച്ച ഫ്രീകിക്ക് കളഞ്ഞുകുളിച്ചതോടെ പുനൈ ആരാധകര്‍ നിരാശരായി. പെടുന്നനെ മത്സരം അവസാനിക്കാന്‍ ഒരു മിനുറ്റ് മാത്രം ശേഷിക്കേ മാര്‍ക്കോസ് വലകുലുക്കിയെങ്കിലും പുനെ 2-3ന് അടിയറവുപറഞ്ഞു.