മെസിക്കരുത്ത് തുണ; സ്പാനിഷ് ലീഗില് ബാഴ്സലോണയ്ക്ക് ജയം
വയ്യാഡോളിഡിനെ ഏകപക്ഷീയമായ ഒരു ഗോളിന് ബാഴ്സലോണ തോൽപ്പിച്ചു. നാൽപ്പത്തിമൂന്നാം മിനിറ്റിൽ പെനാൽറ്റിയിലൂടെ ലിയോണൽ മെസിയാണ് ഗോൾ നേടിയത്.
ബാഴ്സലോണ: സ്പാനിഷ് ലീഗ് ഫുട്ബോളിൽ ബാഴ്സലോണ ഏകപക്ഷീയമായ ഒരു ഗോളിന് വയ്യാഡോളിഡിനെ തോൽപ്പിച്ചു. നാൽപ്പത്തിമൂന്നാം മിനിറ്റിൽ പെനാൽറ്റിയിലൂടെ നായകൻ ലിയോണൽ മെസിയാണ് ഗോൾ നേടിയത്. ലീഗിൽ 24 മത്സരങ്ങളിൽ നിന്ന് 54 പോയിന്റ് ഉള്ള ബാഴ്സയാണ് ഒന്നാമത്. വയ്യാഡോളിഡ് 15-ാം സ്ഥാനത്താണ്.
മറ്റൊരു മത്സരത്തിൽ അത്ലറ്റിക്കോ മാഡ്രിഡ് ഏകപക്ഷീയമായ ഒരു ഗോളിന് റയോ വയെക്കാനോയെ തോൽപിച്ചു. എഴുപത്തിനാലാം മിനിറ്റിൽ അന്റോയ്ൻ ഗ്രീസ്മാനാണ് നിർണായക ഗോൾ നേടിയത്. 47 പോയിന്റുമായി ലീഗിൽ രണ്ടാം സ്ഥാനത്ത് തുടരുകയാണ് അത്ലറ്റിക്കോ മാഡ്രിഡ്. 20 പോയിന്റുമായി തരംതാഴ്ത്തൽ ഭീഷണിയിലാണ് റയോ.