സ്റ്റാര്ലിങ്കിന് എന്താണ് മറ്റ് ഇന്റര്നെറ്റ് പ്രൊവൈഡര്മാരില് നിന്നുള്ള വ്യത്യാസം, വിശദമായി അറിയാം
തിരുവനന്തപുരം: ടെക്ക് ലോകത്ത് സജീവ ചർച്ചയാണ് സ്റ്റാർലിങ്ക് ഉപഗ്രഹ ഇന്റര്നെറ്റ് സേവനത്തിന്റെ ഇന്ത്യയിലേക്കുള്ള വരവ്. ലോക കോടീശ്വരനായ ഇലോൺ മസ്കിന്റെ കമ്പനിയായ സ്പേസ് എക്സ് ആണ് സ്റ്റാർലിങ്ക് വികസിപ്പിച്ചെടുത്തത്. സ്റ്റാർലിങ്ക് മറ്റുള്ള ഇന്റര്നെറ്റ് സേവനദാതാക്കളിൽ നിന്ന് എങ്ങനെ വ്യത്യാസപ്പെട്ടിരിക്കുന്നു എന്ന് പലരും ചിന്തിക്കുന്നുണ്ടാകും.
എന്താണ് സ്റ്റാര്ലിങ്ക്
റിലയന്സ് ജിയോ, ഭാരതി എയർടെൽ, ബിഎസ്എന്എല് തുടങ്ങിയ കമ്പനികൾ ഫൈബർ ഒപ്റ്റിക്സ്, മൊബൈൽ ടവറുകൾ വഴിയാണ് ഇന്ത്യയില് ഇന്റർനെറ്റ് നൽകുന്നത്. അതേസമയം, സ്റ്റാർലിങ്ക് ഇന്റര്നെറ്റ് ഉപഗ്രഹ ശൃംഖലയെ അടിസ്ഥാനമാക്കിയുള്ളതാണ്. ചെറിയ ഉപഗ്രഹങ്ങൾ, ഗ്രൗണ്ട് സ്റ്റേഷനുകൾ, ഉപയോക്തൃ ടെർമിനലുകൾ എന്നിവയിലൂടെയാണ് സ്റ്റാർലിങ്ക് പ്രവർത്തിക്കുന്നത്.
ഉപഗ്രഹ അധിഷ്ഠിത അതിവേഗ ബ്രോഡ്ബാന്ഡ് ഇന്റർനെറ്റ് സേവന ദാതാവാണ് സ്റ്റാര്ലിങ്ക്. ഇതിനായി മൊബൈൽ ടവർ സ്ഥാപിക്കേണ്ട ആവശ്യമില്ല. ഭൂമിയുടെ താഴ്ന്ന ഭ്രമണപഥത്തിലെ ആയിരക്കണക്കിന് ചെറിയ ഉപഗ്രഹങ്ങളുടെ ഒരു കൂട്ടം വഴിയാണ് സ്റ്റാർലിങ്ക് ഇന്റർനെറ്റ് സേവനം നൽകുന്നത്. അതായത് പരമ്പരാഗത ബ്രോഡ്ബാൻഡ് സേവനങ്ങളിൽ നിന്ന് വ്യത്യസ്തമായി, സ്റ്റാർലിങ്ക് കേബിളുകളെയോ വലിയ ഉപഗ്രഹങ്ങളെയോ ആശ്രയിക്കുന്നില്ല. പകരം, ഉപഗ്രഹങ്ങൾക്കിടയിൽ ആശയവിനിമയം നടത്താൻ ഇത് ലേസർ ഉപയോഗിക്കുന്നു, ഗ്രൗണ്ട് സ്റ്റേഷനുകളെ ആശ്രയിക്കുന്നത് കുറയ്ക്കുകയും കുറഞ്ഞ ലേറ്റൻസിയും ഉയർന്ന വേഗതയും ഉറപ്പാക്കുകയും ചെയ്യുന്നു.
ലോകമെമ്പാടും അതിവേഗ ഇന്റർനെറ്റ് നൽകാൻ സ്റ്റാർലിങ്ക് ശ്രമിക്കുന്നു, പ്രത്യേകിച്ച് വയർഡ് ബ്രോഡ്ബാൻഡ് ലഭ്യമല്ലാത്ത പ്രദേശങ്ങളിൽ. ഭൂമിയിൽ നിന്ന് ഏകദേശം 550 കിലോമീറ്റർ ഉയരത്തിലുള്ള ആയിരക്കണക്കിന് താഴ്ന്ന ഭൂഭ്രമണപഥ (LEO) ഉപഗ്രഹങ്ങൾ സ്റ്റാർലിങ്കിൽ ഉൾപ്പെടുന്നു. ഈ ഉപഗ്രഹങ്ങൾ ലേസർ ലിങ്കുകളുടെ സഹായത്തോടെ പരസ്പരം ബന്ധിപ്പിക്കുകയും ഡാറ്റ വേഗത്തിൽ കൈമാറുകയും ചെയ്യുന്നു.
സ്റ്റാർലിങ്ക് ടെർമിനൽ, റൂട്ടര്
സ്റ്റാർലിങ്ക് ഉപയോക്താക്കൾക്ക് ഒരു ചെറിയ സാറ്റ്ലൈറ്റ് ഡിഷും ('ഡിഷി മക്ഫ്ലാറ്റ്ഫേസ്' എന്നും അറിയപ്പെടുന്നു). ഇതിനെ സ്റ്റാർലിങ്ക് ടെർമിനൽ എന്നും വിളിക്കുന്നു. ഒപ്പം ഒരു റൂട്ടറും നൽകുന്നു. ഇത് ഉപഗ്രഹങ്ങളിൽ നിന്നുള്ള സിഗ്നലുകൾ സ്വീകരിക്കുകയും ഇന്റർനെറ്റ് കണക്റ്റിവിറ്റി നൽകുകയും ചെയ്യുന്നു. ഇതിനുപുറമെ, സ്റ്റാർലിങ്ക് ഇപ്പോൾ ഡയറക്ട്-ടു-സെയിൽ സേവനത്തിലും പ്രവർത്തിക്കുന്നു, ഇത് മൊബൈൽ ഫോണുകളെ യാതൊരു മാറ്റങ്ങളുമില്ലാതെ ഉപഗ്രഹവുമായി ബന്ധിപ്പിക്കാൻ അനുവദിക്കുന്നു. സ്റ്റാർലിങ്കിന്റെ ശൃംഖല ലോകമെമ്പാടും വ്യാപിച്ചുകിടക്കുന്നു, നൂറിലധികം രാജ്യങ്ങളിൽ ഇത് സേവനം നൽകുന്നു.
പരമ്പരാഗത ഉപഗ്രഹ ഇന്റർനെറ്റ് സേവനങ്ങളേക്കാൾ സ്റ്റാർലിങ്കിന്റെ ഉപഗ്രഹങ്ങൾ ഭൂമിയോട് (550KM) അടുത്താണ്. ഇക്കാരണത്താൽ, നെറ്റ്വർക്കിന്റെ ലേറ്റൻസി മികച്ചതാണ്. സ്റ്റാർലിങ്ക് വഴി 220MBPS വരെ വേഗത ലഭ്യമാണെന്നാണ് കമ്പനി അവകാശപ്പെടുന്നത്. ഇത് ഫൈബർ ബ്രോഡ്ബാൻഡിനേക്കാൾ കുറവാണ്. പക്ഷേ, പരമ്പരാഗത സാറ്റ്ലൈറ്റ് ഇന്റർനെറ്റിനേക്കാൾ മികച്ചതുമാണ്..
നിലവിലുള്ള കമ്പനികളെ സ്റ്റാർലിങ്ക് വെല്ലുവിളിക്കുമോ?
സ്റ്റാർലിങ്കും മറ്റ് സാറ്റ്കോം സേവനങ്ങളും പരമ്പരാഗത ഇന്റർനെറ്റ് കമ്പനികൾക്ക് മത്സരമാകില്ല എന്നാണ് ഇപ്പോഴത്തെ അനുമാനം. മറിച്ച് അവ പരസ്പര പൂരകങ്ങളാണ്. എങ്കിലും, സ്റ്റാര്ലിങ്ക് ഉപഗ്രഹ ഇന്റര്നെറ്റ് സേവനത്തിന്റെ വില വളരെ ഉയർന്നതാണ്. നിലവിലുള്ള ബ്രോഡ്ബാൻഡ് പ്ലാനുകളേക്കാൾ 7 മുതൽ 18 മടങ്ങ് വരെ ചെലവേറിയതാണ് സ്റ്റാർലിങ്കിന്റെ പ്ലാനുകൾ.
