ദില്ലി: മോട്ടോ ഇ3 പവർ ഇന്ത്യയില് ഇറങ്ങി, കഴിഞ്ഞ ദിവസം മുതല് ഫ്ലിപ്പ്കാര്ട്ട് വഴി ഫോണ് വിതരണം തുടങ്ങി, 7,999 രൂപയാണ് ഫോണിന്റെ വില. മോട്ടേ ഇ ത്രീയെ അപേക്ഷിച്ച് കൂടിയ ബാറ്ററി ശേഷിയാണ് ഇ3 പവറിന്റെ പ്രത്യേകത. 3500 എംഎഎച്ചാണ് ഈ ഫോണിന്റെ ബാറ്ററി ശേഷി. 2ജിബിയാണ് പവറിന്റെ റാം ശേഷി. 16 ജിബിയാണ് ഇന്റേണല് മെമ്മറി ശേഷി. 32 ജിബിവരെ മെമ്മറി വര്ദ്ധിപ്പിക്കാം.
5-ഇഞ്ച് എച്ച്ഡി സ്ക്രീന് ആണ് പവറിനുള്ളത്. 720x1280 പിക്സലാണ് സ്ക്രീന് റെസല്യൂഷന്. 64-ബിറ്റ് വണ് ജിഗാഹെര്ട്സ് ക്വാഡ്–കോർ മീഡിയടെക് പ്രൊസസ്സറാണ് ഫോണിന്റെ ശേഷി നിര്ണ്ണയിക്കുന്നത്, എല്ഇഡി ഫ്ലാഷോടു കൂടിയ 8-മെഗാപിക്സൽ പിന്ക്യാമറയും, 5 മെഗാപിക്സൽ സെൽഫി ക്യാമറ പവറിലുണ്ട്.
ജലത്തെ പ്രതിരോധിക്കുന്ന നാനോ കോട്ടിങ്, 4G കണക്ടിവിറ്റി, വോയ്സ് എല്ഇടി സപ്പോർട്ട് എന്നിവയുമുള്ള മോട്ടോ ഇ ത്രീ പവറിനുണ്ട്. വെറും പതിനഞ്ചു മിനിറ്റുകള് ചാര്ജ് ചെയ്താല് അഞ്ചു മണിക്കൂര് വരെ ഉപയോഗിക്കാമെന്നാണ് മോട്ടറോളയുടെ അവകാശവാദം.
