കാത്തിരിപ്പിനൊടുവില് അവന് എത്തി! 2.23 മിനിറ്റില് ലിജോ മാജിക്; 'വാലിബന്' ട്രെയ്ലര്
അഡ്വാന്സ് ബുക്കിംഗ് തുടങ്ങി
![malaikottai vaaliban trailer mohanlal lijo jose pellissery Shibu Baby John nsn malaikottai vaaliban trailer mohanlal lijo jose pellissery Shibu Baby John nsn](https://static-ai.asianetnews.com/images/01hmegzp4wg2yjym08vvdtz6qw/befunky-collage_363x203xt.jpg)
മോഹന്ലാലിനെ നായകനാക്കി ലിജോ ജോസ് പെല്ലിശ്ശേരി സംവിധാനം ചെയ്യുന്ന മലൈക്കോട്ടൈ വാലിബന്റെ ട്രെയ്ലര് എത്തി. ഇന്ന് വൈകിട്ട് മാത്രമാണ് ട്രെയ്ലര് ഉടന് എത്തുമെന്ന വിവരം മോഹന്ലാല് സോഷ്യല് മീഡിയയിലൂടെ അറിയിച്ചത്. മലയാളി സിനിമാപ്രേമികള് ഏറ്റവും ആകാംക്ഷയോടെ കാത്തിരിക്കുന്ന ചിത്രത്തിന്റെ പുറത്തെത്തിയ ട്രെയ്ലറിന് 2.23 മിനിറ്റ് ദൈര്ഘ്യമുണ്ട്. ചിത്രത്തിലെ ലോക സൃഷ്ടിയെക്കുറിച്ച് കൗതുകമുണര്ത്തുന്ന, എന്നാല് കഥാപശ്ചാത്തലത്തെക്കുറിച്ച് വലിയ സൂചനകളൊന്നുമില്ലാത്ത ട്രെയ്ലര് കട്ട് ആണ് വാലിബന്റേത്.
മോഹന്ലാലിനൊപ്പം സൊണാലി കുല്ക്കര്ണി, മനോജ് മോസസ്, കഥ നന്ദി, ഡാനിഷ് സേഠ്, മണികണ്ഠന് ആചാരി തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു. 130 ദിവസങ്ങളിൽ രാജസ്ഥാന്, ചെന്നൈ, പോണ്ടിച്ചേരി എന്നീ സ്ഥലങ്ങളിലാണ് മലൈക്കോട്ടൈ വാലിബന്റെ ചിത്രീകരണം നടന്നത്. ചിത്രത്തിന്റെ തിരക്കഥ ഒരുക്കിയിരിക്കുന്നത് പി എസ് റഫീക്ക് ആണ്. 'ചുരുളി'ക്ക് ശേഷം മധു നീലകണ്ഠന് വീണ്ടും ലിജോയ്ക്ക് വേണ്ടി ക്യാമറ ചലിപ്പിക്കുന്ന ചിത്രവുമാണ് ഇത്. ഷിബു ബേബി ജോൺ, അച്ചു ബേബി ജോൺ എന്നിവരുടെ നേതൃത്വത്തിലുള്ള ജോൺ ആൻഡ് മേരി ക്രിയേറ്റീവ്സ്, കൊച്ചുമോന്റെ ഉടമസ്ഥതയിലുള്ള സെഞ്ച്വറി ഫിലിംസ്, അനൂപിന്റെ മാക്സ് ലാബ്, വിക്രം മെഹ്റ, സിദ്ധാർഥ് ആനന്ദ് കുമാർ എന്നിവരുടെ ഉടമസ്ഥയിലുള്ള സരിഗമ ഇന്ത്യാ ലിമിറ്റഡ് എന്നിവരാണ് ചിത്രത്തിന്റെ നിർമ്മാതാക്കൾ.
ഇന്ത്യയ്ക്ക് പുറത്തും മികച്ച റിലീസ് ആണ് ചിത്രത്തിന്. റെക്കോര്ഡ് റിലീസ് ആണ് ചിത്രത്തിന് യൂറോപ്പില് ലഭിക്കുക. അര്മേനിയ, ബെല്ജിയം, ചെക്ക് റിപബ്ലിക്, ഡെന്മാര്ക്, എസ്റ്റോണിയ, ഫിന്ലന്ഡ്, ജോര്ജിയ, ഹംഗറി തുടങ്ങി 35 ല് അധികം യൂറോപ്യന് രാജ്യങ്ങളില് വാലിബന് എത്തും. യുകെയില് 175 ല് അധികം സ്ക്രീനുകളാണ് ചിത്രം റിലീസ് ചെയ്യപ്പെടുക.