ത്രസിപ്പിക്കുന്ന ആക്ഷനുമായി ബോണ്ട് വീണ്ടും; 'നോ ടൈം റ്റു ഡൈ' ഫൈനല് ട്രെയ്ലര്
കൊവിഡ് സാഹചര്യത്തില് റിലീസ് ഒരു വര്ഷത്തിലേറെ വൈകിയ ചിത്രം
ഏറ്റവും പുതിയ ജെയിംസ് ബോണ്ട് ചിത്രം 'നോ ടൈം ടു ഡൈ'യുടെ ഫൈനല് ഇന്റര്നാഷണല് ട്രെയ്ലര് അണിയറക്കാര് പുറത്തുവിട്ടു. ഒരു ജെയിംസ് ബോണ്ട് ചിത്രത്തില്നിന്ന് പ്രേക്ഷകര് പ്രതീക്ഷിക്കുന്ന എല്ലാത്തരം ഘടകങ്ങളും കാലത്തിനനുസൃതമായി അവതരിപ്പിക്കുന്നതാണ് പുതിയ സിനിമയെന്നാണ് ട്രെയ്ലര് നല്കുന്ന പ്രതീക്ഷ. ജെയിംസ് ബോണ്ട് സിരീസിലെ 25-ാം ചിത്രവും ഡാനിയല് ക്രെയ്ഗ് ബോണ്ട് വേഷത്തിലെത്തുന്ന അഞ്ചാം ചിത്രവുമാണ് ഇത്. 2.23 മിനിറ്റ് ദൈര്ഘ്യമുള്ളതാണ് പുതിയ ട്രെയ്ലര്.
കാരി ജോജി ഫുക്കുനാഗയാണ് സംവിധാനം. ക്രിസ്റ്റോഫ് വാള്ട്ട്സ്, റമി മാലിക്, അന ഡെ അര്മാസ്, ലഷാന ലിഞ്ച്, ഡേവിഡ് ഡെന്സിക്, ബില്ലി മഗ്നുസ്സെന് തുടങ്ങിയവരാണ് മറ്റ് അഭിനേതാക്കള്. കൊവിഡ് സാഹചര്യത്തില് റിലീസ് ഒരു വര്ഷത്തിലേറെ വൈകിയ ചിത്രമാണിത്. 2020 ഏപ്രിലിലായിരുന്നു റിലീസ് തീരുമാനിച്ചിരുന്നത്. 250 ബില്യണ് ഡോളര് നിര്മ്മാണച്ചെലവുള്ള ചിത്രത്തിന്റെ തിയറ്റര് റിലീസ് അനിശ്ചിതമായി നീളുന്നത് നിര്മ്മാതാക്കളെ ആശയക്കുഴപ്പത്തിലാക്കിയിരിക്കുകയാണെന്നും അതിനാല് ഡയറക്റ്റ് ഒടിടി സാധ്യതകള് പരിഗണിക്കുകയാണെന്നും നേരത്തെ റിപ്പോര്ട്ടുകള് പുറത്തെത്തിയിരുന്നു. എന്നാല് ചിത്രം തിയറ്ററുകളില് തന്നെയാണ് എത്തുക. സെപ്റ്റംബര് 30 ആണ് പുതിയ റിലീസ് തീയതി.
കൊവിഡ് മഹാമാരിയുടെ രണ്ടാംവരവിന്റെ ഈ കാലത്ത്, എല്ലാവരും മാസ്ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്സിന് എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യര്ത്ഥിക്കുന്നു. ഒന്നിച്ചു നിന്നാല് നമുക്കീ മഹാമാരിയെ തോല്പ്പിക്കാനാവും. #BreakTheChain #ANCares #IndiaFightsCorona