'ജീവിതത്തിൽ ഇത്രയും വലിയൊരു അത്ഭുതം... എനിക്ക് ഇതിലേക്ക് നോക്കിനിൽക്കാൻ മാത്രമേ കഴിയുന്നുള്ളൂ. സ്വപ്നത്തിൽ പോലും ഞാൻ ഇത് കണ്ടിട്ടില്ല.'
80 -ാം വയസ്സിൽ ജീവിതത്തിൽ ആദ്യമായി കടൽ കാണാനെത്തിയ ഒരു വയോധികന്റെ വികാരനിർഭരമായ വീഡിയോ സോഷ്യൽ മീഡിയയുടെ ഹൃദയം കവരുകയാണ്. ഒഡീഷയിലെ കൊണാർക്കിലുള്ള ചന്ദ്രഭാഗ ബീച്ചിൽ നിന്നുള്ളതാണ് ഈ ദൃശ്യങ്ങൾ. തിരമാലകൾ അരികിലേക്ക് വരുമ്പോൾ, അത്ഭുതത്തോടെ നോക്കിനിന്ന് കടലിനെ തൊഴുത് വണങ്ങുന്ന അച്ഛന്റെ ദൃശ്യങ്ങൾ മകനാണ് ക്യാമറയിൽ പകർത്തിയത്.
'ഭുക്കഡ് മുസാഫിർ' (@bhukkhad_musafir) എന്ന ഇൻസ്റ്റാഗ്രാം പേജിലൂടെ ശ്രീകാന്ത് എന്ന യുവാവാണ് ഈ വീഡിയോ പങ്കുവെച്ചത്. 'എന്റെ അച്ഛൻ ജീവിതത്തിൽ ഇതുവരെ കടൽ കണ്ടിട്ടില്ല. അദ്ദേഹത്തിന്റെ ആദ്യ പ്രതികരണം എന്താണെന്ന് നമുക്ക് കാണാം' എന്ന് പറഞ്ഞുകൊണ്ടാണ് ശ്രീകാന്ത് വീഡിയോ ആരംഭിക്കുന്നത്. കടലിനു മുന്നിൽ തൊഴുത് വണങ്ങി തീരത്തോടടുക്കുമ്പോൾ തന്നെ കൈകൂപ്പി ആദരവോടെ സമുദ്രത്തിനു മുന്നിൽ വണങ്ങുകയാണ് ഈ അച്ഛൻ.
തിരമാലകൾ കാലിൽ തൊടുമ്പോൾ, 'അച്ഛാ, എന്താണ് തോന്നുന്നത്?' എന്ന് മകൻ ചോദിക്കുന്നുണ്ട്. വികാരഭരിതനായി അദ്ദേഹം നൽകിയ മറുപടി ഇതായിരുന്നു: 'ജീവിതത്തിൽ ഇത്രയും വലിയൊരു അത്ഭുതം... എനിക്ക് ഇതിലേക്ക് നോക്കിനിൽക്കാൻ മാത്രമേ കഴിയുന്നുള്ളൂ. സ്വപ്നത്തിൽ പോലും ഞാൻ ഇത് കണ്ടിട്ടില്ല.'
'80 -ാം വയസ്സിൽ അദ്ദേഹം ആദ്യമായി കടൽ കണ്ടു. ആ മുഖത്ത് ഒരു പുഞ്ചിരിയും കണ്ണുകളിൽ ബാല്യത്തിന്റെ നിഷ്കളങ്കതയും ഉണ്ടായിരുന്നു. ചില സന്തോഷങ്ങൾക്ക് പ്രായമൊരു തടസ്സമല്ല. അവ ശരിയായ നിമിഷത്തിനായി കാത്തിരിക്കുക മാത്രം ചെയ്യുന്നു. എന്റെ അച്ഛന്റെ മുഖത്തെ ഈ പുഞ്ചിരിയാണ് ഞങ്ങളുടെ ഏറ്റവും വലിയ നിധി' എന്ന് ശ്രീകാന്ത് വീഡിയോയ്ക്കൊപ്പം കുറിച്ചു. നൂറുകണക്കിന് ആളുകളാണ് ഇതിനോടകം ഈ വീഡിയോ കണ്ടത്. 'സോഷ്യൽ മീഡിയയുടെ സ്വാധീനമില്ലാത്ത, മണ്ണിനോടും പ്രകൃതിയോടും ചേർന്നുനിൽക്കുന്ന തലമുറയുടെ പ്രതീകമാണിത്' എന്നാണ് ഒരാൾ വീഡിയോയ്ക്ക് താഴെ കുറിച്ചത്.
