വിജയിച്ചോ എന്ന് സംശയിക്കുന്ന ഗെയിം ടിക്കറ്റുമായി കടന്നുകളഞ്ഞു, കടയുടമ പൊലീസ് പിടിയിൽ
ഫലം പരിശോധിക്കാൻ അവൾ കടയിലെ ജീവനക്കാരനോട് ആവശ്യപ്പെട്ടു. അന്തിമ പരിശോധനയ്ക്കായി ജീവനക്കാരൻ കടയുടെ ഉടമകളിൽ ഒരാൾക്ക് കാർഡ് കൈമാറി.
വിജയിച്ചോയെന്ന് സംശയം തോന്നിയ ഗെയിം ടിക്കറ്റ് മോഷ്ടിച്ച് കടന്നയാള്‍ പൊലീസ് പിടിയില്‍. നേപ്പിളിലെ ഒരു ടൊബാക്കോ ഷോപ്പ് ഉടമയെയാണ് റോമിലെ പ്രധാന എയര്‍പോര്‍ട്ടില്‍ വച്ച് ബോര്‍ഡര്‍ പൊലീസ് പിടികൂടിയത്. ഒരു കസ്റ്റമറുടെ വിജയിച്ചുവെന്ന് സംശയിക്കുന്ന ഗെയിം ടിക്കറ്റുമായി കാനറി ദ്വീപിലേക്ക് പറക്കാന്‍ ശ്രമിക്കുകയായിരുന്നു ഇയാള്‍ എന്നാണ് പറയുന്നത്. എന്നാൽ, ആ വ്യക്തിയുടെ കൈവശം 500,000 യൂറോ (580,000 ഡോളർ) വിലമതിക്കുന്ന കാർഡ് ഇല്ലായിരുന്നു. എന്നാൽ, സ്പെയിനിലെ കാനറി ദ്വീപുകളിലൊന്നായ ഫ്യൂർടെവെൻതുറയ്ക്കുള്ള വിമാന ടിക്കറ്റ് അയാളുടെ കൈവശമുണ്ടായിരുന്നു എന്ന് ലാപ്രെസ് വാർത്താ ഏജൻസി പറഞ്ഞു.
ഇയാളെ കുറിച്ചുള്ള പൂര്‍ണവിവരങ്ങള്‍ ലഭ്യമായിട്ടില്ല. മോഷ്ടിച്ചുവെന്ന സംശയത്തിലാണ് ഇയാളെ പിടികൂടിയിരിക്കുന്നത്. ഇയാള്‍, വിജയി എന്ന് കരുതുന്ന സ്ത്രീയുടെ കയ്യില്‍ നിന്നും ടിക്കറ്റ് തട്ടിപ്പറിക്കുകയും മോട്ടോര്‍ സ്കൂട്ടറിൽ കടന്നു കളയുകയും ചെയ്യുകയായിരുന്നു എന്നാണ് പറയുന്നത്. വെള്ളിയാഴ്ചയാണ് തൊഴിലാളികള്‍ താമസിക്കുന്ന സ്ഥലത്ത് വച്ച് സംഭവം നടന്നത്. പ്രായമായ ഒരു സ്ത്രീ രണ്ട് "സ്ക്രാച്ച് ആൻഡ് വിൻ" കാർഡുകൾ വാങ്ങിയിരുന്നു. ഫലം പരിശോധിക്കാൻ അവൾ കടയിലെ ജീവനക്കാരനോട് ആവശ്യപ്പെട്ടു. അന്തിമ പരിശോധനയ്ക്കായി ജീവനക്കാരൻ കടയുടെ ഉടമകളിൽ ഒരാൾക്ക് കാർഡ് കൈമാറി. എന്നാൽ, അയാൾ കാർഡ് തിരിച്ചു കൊടുക്കാതെ കൈവശം സൂക്ഷിക്കുകയും നേപ്പിൾസ് വഴി തന്റെ മോട്ടോർ സ്കൂട്ടര്‍ ഓടിച്ച് പോവുകയും ചെയ്തുവെന്നാണ് പരാതി.
ഇയാളെ ഇപ്പോള്‍ സ്വന്തം ജാമ്യത്തില്‍ വിട്ടിരിക്കുകയാണ്. ഏതായാലും സംഭവത്തെ തുടര്‍ന്ന് ആരും നിയമവിരുദ്ധമായി പണം നേടാതിരിക്കാന്‍, "സ്ക്രാച്ച് ആൻഡ് വിൻ" പ്രവർത്തനം നടത്തുന്ന ഇറ്റാലിയൻ ടാക്സ് ഓഫീസിലെ അധികാരികൾ പുകയില കടയിലേക്ക് വിതരണം ചെയ്തിരുന്ന കാർഡ് നമ്പറുകളുടെ മുഴുവൻ ബ്ലോക്കും മരവിപ്പിച്ചിരിക്കുകയാണ്. അന്വേഷണ ഉദ്യോഗസ്ഥര്‍ ഇപ്പോഴും ഈ കാര്‍ഡും തെരഞ്ഞ് നടക്കുകയാണ്.
