ബിഹാറിലെ ബെഗുസരായ് ജില്ലയിൽ ഗംഗാതീരത്താണ് ബറൗനി ഗ്രാമം. അവിടെയാണ് ഈ വ്യത്യസ്തമായ റെയിൽവേ സ്റ്റേഷനുള്ളത്.
യാത്രകൾക്ക് വേണ്ടി നാം പ്രധാനമായും ആശ്രയിക്കുന്ന ഒന്നാണ് റെയിൽവേ. എല്ലാ റെയിൽവേ സ്റ്റേഷനുകളിലും പല പ്ലാറ്റ്ഫോമുകളും കാണും അല്ലേ? അതിലൊന്ന് നിർബന്ധമായും ഒന്നാം നമ്പർ പ്ലാറ്റ്ഫോം ആയിരിക്കും. എന്നാൽ, ഒന്നാം നമ്പർ പ്ലാറ്റ്ഫോമേ ഇല്ലാത്ത ഒരു റെയിൽവേ സ്റ്റേഷനുണ്ടോ? അതേ, അങ്ങനെ ഒരു റെയിൽവേ സ്റ്റേഷനുണ്ട്. നമ്മുടെ രാജ്യത്ത് തന്നെ.
അത് ബറൗനി റെയിൽവേ സ്റ്റേഷനാണ്. അവിടെ ഒന്നാം നമ്പർ പ്ലാറ്റ്ഫോമും തേടി പോയാൽ നിങ്ങൾ എവിടേയും എത്താൻ പോകുന്നില്ല. കാരണം അങ്ങനെ ഒരു പ്ലാറ്റ്ഫോം ഇല്ല എന്നത് തന്നെ. അത് മാത്രമല്ല, ഇവിടെ ഒരു പ്ലാറ്റ്ഫോമിൽ നിന്നും മറ്റൊന്നിലേക്കുള്ള ദൂരം രണ്ട് കിലോമീറ്ററാണ്. ബിഹാറിലെ ബെഗുസരായ് ജില്ലയിൽ ഗംഗാതീരത്താണ് ബറൗനി ഗ്രാമം. അവിടെയാണ് ഈ വ്യത്യസ്തമായ റെയിൽവേ സ്റ്റേഷനുള്ളത്.
രാജ്യത്തെ തന്നെ ഏറ്റവും തിരക്കേറിയ റെയിൽവേ ഹബ്ബുകളിൽ ഒന്നാണ് ഇത്. ഈസ്റ്റ് സെൻട്രൽ റെയിൽവേയിലെ ഒരു പ്രധാന സ്റ്റേഷൻ കൂടിയാണ് ബറൗനി. ഈ സ്റ്റേഷനിൽ രണ്ട് പ്ലാറ്റ്ഫോമുകളാണ് ഉള്ളത്. എന്നിട്ടും എന്നിട്ടും ഇവിടെ ഒന്നാം നമ്പർ പ്ലാറ്റ്ഫോം ഇല്ല. ഇവിടെയുള്ള പ്ലാറ്റ്ഫോമുകളെ മുകളിലെ പ്ലാറ്റ്ഫോം, താഴത്തെ പ്ലാറ്റ്ഫോം എന്നിങ്ങനെയാണ് വിളിക്കുന്നത്. രണ്ട് ജംഗ്ഷനുകൾ ഉൾക്കൊള്ളുന്ന തരത്തിലാണ് പ്ലാറ്റ്ഫോമുകൾ.
1860 -ലാണ് ബെഗുസരായിലെ ഗധാര റെയിൽവേ സ്റ്റേഷൻ സ്ഥാപിക്കുന്നത്. ഇതിനുശേഷം 1883 -ൽ ഗധാര സ്റ്റേഷൻ അടച്ചുപൂട്ടി. തുടർന്ന്, മൂന്ന് കിലോമീറ്റർ വടക്കായി ബറൗനി റെയിൽവേ ജംഗ്ഷൻ നിർമ്മിക്കുകയും ചെയ്തു. ബ്രിട്ടീഷ് കാലം തൊട്ട് തന്നെ ഈ സ്റ്റേഷന് ഒന്നാം നമ്പർ പ്ലാറ്റ്ഫോം ഇല്ല. എന്നാൽ, അതിന് കൃത്യമായി എന്താണ് കാരണം എന്നത് ആർക്കും അറിയില്ല.
