തടാകക്കരയില്‍ ഒരൊറ്റ വരിയായിരുന്ന് വെള്ളം കുടിക്കുന്ന 20 സിംഹങ്ങളുടെ വീഡിയോ ഏറ്റെടുത്ത് നെറ്റിസണ്‍സ് !

ഒന്നിന് പുറകെ ഒന്നായി ഇറങ്ങിവന്നത് 20 ഓളം സിംഹങ്ങള്‍. എല്ലാവരും തങ്ങളുടെ വരി തെറ്റിക്കാതെ അടുത്തടുത്തെന്ന രീതിയില്‍ ഒരുമിച്ച് ഇരുന്ന് തടാകത്തിലെ വെള്ളം കുടിക്കുന്നു. 

സിംഹമെന്ന് കേള്‍ക്കുമ്പോള്‍ വലിയ ഭയമൊന്നും തോന്നുമില്ലെങ്കിലും തൊട്ട് മുന്നില്‍ ഒരു സിംഹത്തെ കണ്ടാല്‍ നമ്മളില്‍ പലരും നിന്നിടത്ത് നിന്ന് ഒന്ന് അനങ്ങാന്‍ പോലും മറന്ന മട്ടിലാകുമെന്നതില്‍ തര്‍ക്കമുണ്ടാകില്ല. അപ്പോള്‍ 20 സിംഹത്തെ ഒന്നിച്ച് കണ്ടാലോ? പിന്നെ ബോധം വീണിട്ട് വേണ്ടേ എന്നാകും പലരും ചിന്തിക്കുന്നത് തന്നെ. അതെ, 20 സിംഹങ്ങള്‍ ഒന്നിച്ച് ഒരു തടാകത്തില്‍ വെള്ളം കുടിക്കാനെത്തിയ വീഡിയോ സാമൂഹിക മാധ്യമങ്ങളില്‍ ഏറെ വൈറലാണിന്ന്. 

ദക്ഷിണാഫ്രിക്കയിലെ മലമാല ഗെയിം റിസർവിലെ നദീതീരത്താണ് സിംഹങ്ങളുടെ ഈ അപൂർവ്വ വെള്ളം കുടി ചിത്രീകരിക്കപ്പെട്ടത്. സിംഹങ്ങളെല്ലാം അല്പം പോലും നിരതറ്റാതെ ഒരേ നിരയിൽ വരിവരിയായി നിന്നാണ് വെള്ളം കുടിക്കുന്നത്. ഒരു സിംഹം മാത്രം വരിയില്‍ സ്ഥലം കിട്ടാതെ അല്പം മാറിയിരുന്ന് സ്വസ്ഥമായിരുന്ന് വെള്ളം കുടിക്കുന്നതും കാണാം. LatestSightings.com ന്‍റെ സ്ഥാപകനും സിഇഒയുമായ നദവ് ഒസെൻഡ്രൈവറാണ് ഈ ദൃശ്യങ്ങൾ പകർത്തിയത്. പ്രഭാത സവാരിക്ക് ഇടയിലാണ് ഈ അസാധാരണ നിമിഷം അദ്ദേഹത്തിന്‍റെ ക്യാമറയിൽ പതിഞ്ഞത്. തുടർന്ന് ഈ അസാധാരണ നിമിഷങ്ങളുടെ ദൃശ്യങ്ങൾ തന്‍റെ യൂട്യൂബ് ചാനലിലൂടെ അദ്ദേഹം പുറത്തുവിട്ടു. നാല് ദിവസം കൊണ്ട് 10 ലക്ഷത്തിനടുത്ത് ആളുകളാണ് വീഡിയോ കണ്ടത്. വീഡിയോ കണ്ട നിരവധി പേര്‍ തങ്ങളുടെ ആശ്ചര്യം പങ്കുവച്ചു. 

പ്രഭാത സവാരിക്ക് ശേഷം ക്യാമ്പിലേക്ക് മടങ്ങുമ്പോഴാണ് ഈ ദൃശ്യങ്ങൾ കാണാൻ ഇടയായത് എന്നാണ് അദ്ദേഹം വീഡിയോ പങ്കുവെച്ചുകൊണ്ട് കുറിച്ചത്. ആദ്യം കണ്ടത് പുഴയോരത്ത് ഒരു ആനക്കൂട്ടം വെള്ളം കുടിക്കുന്നത് ആയിരുന്നു. ആ കാഴ്ച കണ്ട് അൽപദൂരം കൂടി മുന്നോട്ടു സഞ്ചരിച്ചതിന് ശേഷമാണ് സിംഹങ്ങളുടെ അപൂർവ സംഗമം കാണാനിടയായത് എന്നാണ് അദ്ദേഹം പറയുന്നത്. ദൃശ്യങ്ങളിൽ ആദ്യം ഒരു സിംഹമാണ് വെള്ളം കുടിക്കാനായി എത്തുന്നത്. അത് വെള്ളം കുടിച്ചു തുടങ്ങിയപ്പോഴേക്കും ഓരോരോ ചെറിയ കൂട്ടങ്ങളായി കൂടുതൽ സിംഹങ്ങൾ അവിടേക്ക് എത്തിത്തുടങ്ങി. തുടർന്ന് അവ ഓരോന്നും ഒന്നിനോട് ഒന്ന് ചേർന്ന് നിരനിരയായി നദീതീരത്ത് നിന്നുകൊണ്ട് വെള്ളം കുടിക്കാൻ തുടങ്ങി. അല്പം പോലും നിരതെറ്റാതെയാണ് അവ നിൽക്കുന്നത് എന്നതാണ് ഏറെ ആകർഷകമായ കാര്യം. ദൃശ്യങ്ങൾ സാമൂഹിക മാധ്യമങ്ങളിലൂടെ വൈറൽ ആയതോടെ സിംഹങ്ങളുടെ കൂട്ടായ്മയെയും അച്ചടക്ക ബോധത്തെയും പ്രശംസിച്ചുകൊണ്ട് നിരവധി സോഷ്യൽ മീഡിയ ഉപയോക്താക്കളാണ് തങ്ങളുടെ അഭിപ്രായങ്ങൾ രേഖപ്പെടുത്തിയത്.