50 -ാമത്തെ വയസ്സിൽ അമ്മയാവാമോ? സ്ത്രീയുടെ ചോദ്യത്തിന് പിന്നാലെ വൻചർച്ച 

ബ്രിട്ടീഷ് പാരന്റിം​ഗ് പ്ലാറ്റ്ഫോമാണ് മംമ്സ്‍നെറ്റ്. അടുത്തിടെ മംമ്‍സ്നെറ്റി(Mumsnet) -ൽ ഒരു സ്ത്രീ ചോദിച്ച ഒരു ചോദ്യം വൻചർച്ചകൾക്ക് കാരണമായിത്തീർന്നു. 50 -ാമത്തെ വയസ്സിൽ ഒരാൾ കുഞ്ഞിനെ വേണം എന്ന് തീരുമാനിക്കുന്നത് ശരിയാണോ എന്നായിരുന്നു ഇവരുടെ ചോദ്യം. 

ശരിക്കും എത്ര വയസ് വരെയുള്ളവർക്ക് കുട്ടികളാവാം. വയസ്സ് കൂടുന്തോറും കുട്ടികളാവുമ്പോഴുള്ള പ്രശ്നങ്ങൾ എന്തെല്ലാമാണ് തുടങ്ങി ഒരുപാട് ചർച്ചകൾ ഇതിന്റെ ഭാ​ഗമായി ഉയർന്നുവന്നു. "50 -ാം വയസ്സിൽ നിങ്ങൾക്കൊരു കുഞ്ഞുണ്ടാകുമോ? 40 -ാമത്തെ വയസ്സിൽ ഒരു കുഞ്ഞുണ്ടായാൽ നിങ്ങൾക്കതിൽ ഖേദം തോന്നുമോ?" എന്നതായിരുന്നു ചോദ്യം. അതോടൊപ്പംതന്നെ മാനസികമായും സാമ്പത്തികമായും അതിന് സാധിച്ചാലും ശാരീരികമായ ബുദ്ധിമുട്ടുകളുണ്ടാകുമോ എന്ന ചർച്ചയും ഉയർന്നുവന്നു. 

50 -ാം വയസ്സിൽ ഒരു കുട്ടിയുണ്ടാകുന്നതിന് കുഴപ്പമില്ല. എന്നാൽ, 60 -ാമത്തെ വയസ്സിൽ ആ കുട്ടി കൗമാരക്കാരിയോ, കൗമാരക്കാരനോ ആയിരിക്കുന്നത് ആലോചിക്കുമ്പോൾ വിചിത്രമായി തോന്നും എന്നാണ് ഒരാൾ പറഞ്ഞിരിക്കുന്നത്. മറ്റൊരാൾ പറഞ്ഞത് 50 -ൽ ഓക്കേ, പക്ഷേ 54 ആയാൽ നടക്കില്ല എന്നാണ്. 

മറ്റൊരാൾ പറഞ്ഞത്, താൻ ഒരു കുഞ്ഞിന് വേണ്ടി വളരെക്കാലം ശ്രമിച്ചു. ഒരുപാട് ചികിത്സകൾ ചെയ്തു. ഫലം കണ്ടില്ല‌. തനിക്ക് ഇപ്പോൾ 45 വയസ്സായി പ്രായം. ഇപ്പോൾ ഒരു കുഞ്ഞിന് വേണ്ടി താൻ ഒരുപാട് ആ​ഗ്രഹിക്കുന്നുണ്ട്. അത് സാധ്യമാണെങ്കിൽ 50 -ാമത്തെ വയസ്സിലും ഒരു കുട്ടി ഉണ്ടാവുന്നതിന് താൻ തയ്യാറാണ് എന്നാണ്. 

മറ്റൊരാൾ പറഞ്ഞത്, തനിക്ക് കുട്ടികൾ വേണമെന്ന് തോന്നിയാൽ ഒരാൾ 40 -ലും മറ്റൊരാൾ 50 -ലും ആവുന്നതിൽ ഒരു പ്രശ്നവുമില്ല. പക്ഷേ, കുടുംബത്തിൽ എന്തെങ്കിലും ആരോ​ഗ്യപ്രശ്നങ്ങളോ, നേരത്തെ ഉള്ള മരണങ്ങളോ ഇല്ലെങ്കിൽ മാത്രമാണ് അങ്ങനെ ചെയ്യുക എന്നാണ്. 

എന്തായാലും കൂടുതൽ പേരും പറഞ്ഞിരിക്കുന്നത്, മാനസികവും ശാരീരികവുമായ ആരോ​ഗ്യവും മെച്ചപ്പെട്ട സാമ്പത്തികസ്ഥിതിയും ഉണ്ടെങ്കിൽ 50 -ലായാലും കുഞ്ഞുങ്ങൾ വേണമെന്ന് തീരുമാനിക്കുന്നതിൽ തെറ്റില്ല എന്നാണ്. അതേസമയം, ചുരുക്കം ചിലർ അതിലെ ആരോ​ഗ്യപരമായ പ്രയാസങ്ങളും ചൂണ്ടിക്കാട്ടി. നിങ്ങൾക്കെന്താണ് തോന്നുന്നത്? 

ഏഷ്യാനെറ്റ് ന്യൂസ് ലൈവ് കാണാം: 

ഏഷ്യാനെറ്റ് ന്യൂസ് വാർത്തകൾ തത്സമയം കാണാം

• motherhood