മുംബൈ ഛത്രപതി ശിവാജി മഹാരാജ് വിമാനത്താവളത്തിലെ ടെർമിനൽ 1 നവീകരിക്കുന്നതിന്റെ ഭാഗമായി ഇൻഡിഗോ, എയർ ഇന്ത്യ എക്സ്പ്രസ് വിമാനങ്ങൾ നവി മുംബൈയിലേക്ക് മാറ്റുന്നു. 2026 ഡിസംബർ മുതൽ ഘട്ടംഘട്ടമായാണ് ആഭ്യന്തര, രാജ്യാന്തര സർവീസുകൾ പുതിയ വിമാനത്താവളത്തിലേക്ക് മാറ്റുന്നത്.
മുംബൈയിൽ നിന്ന് വിമാനയാത്രയ്ക്ക് ഒരുങ്ങുന്നവർ ശ്രദ്ധിക്കുക. നഗരത്തിലെ വിമാനത്താവള ശൃംഖലയിൽ നിർണായക മാറ്റങ്ങൾ വരുന്നു. ഇൻഡിഗോയും എയർ ഇന്ത്യ എക്സ്പ്രസും തങ്ങളുടെ തിരഞ്ഞെടുത്ത വിമാന സർവീസുകൾ ഛത്രപതി ശിവാജി മഹാരാജ് രാജ്യാന്തര വിമാനത്താവളത്തിൽ നിന്ന് നവി മുംബൈ രാജ്യാന്തര വിമാനത്താവളത്തിലേക്ക് മാറ്റും. ഛത്രപതി ശിവാജി മഹാരാജ് വിമാനത്താവളത്തിലെ ടെർമിനൽ 1 നവീകരിക്കുന്നതിന്റെ ഭാഗമായാണ് ഈ നീക്കം.
2026 ഡിസംബർ മുതൽ എയർ ഇന്ത്യ എക്സ്പ്രസിന്റെ ചില ആഭ്യന്തര സർവീസുകൾ നവി മുംബൈയിൽ നിന്ന് ആരംഭിക്കും. 2027ൽ ഇൻഡിഗോയും കൂടുതൽ രാജ്യാന്തര സർവീസുകൾ പുതിയ വിമാനത്താവളത്തിലേക്ക് മാറ്റും. ഇതോടെ മുംബൈയിൽ നിന്ന് യാത്ര ചെയ്യുന്നവർ ടിക്കറ്റ് ബുക്ക് ചെയ്യുമ്പോഴും യാത്രയ്ക്ക് മുമ്പും വിമാനത്താവളത്തിന്റെ വിവരങ്ങൾ പ്രത്യേകം പരിശോധിക്കേണ്ടിവരും.
ഡിസംബർ മുതൽ എയർ ഇന്ത്യ എക്സ്പ്രസ് സർവീസുകൾ
2026 ഡിസംബർ മുതൽ നവി മുംബൈ രാജ്യാന്തര വിമാനത്താവളത്തിൽ നിന്ന് പ്രതിദിനം 4 ആഭ്യന്തര സർവീസുകൾ നടത്താനാണ് എയർ ഇന്ത്യ എക്സ്പ്രസിന്റെ തീരുമാനം. തുടർന്ന് 2027 ജനുവരി മുതൽ പശ്ചിമേഷ്യൻ രാജ്യങ്ങളിലേക്കുള്ള സർവീസുകളും ഘട്ടംഘട്ടമായി പുതിയ വിമാനത്താവളത്തിലേക്ക് മാറ്റും.
Related Articles
നിലവിലെ വിമാനത്താവളത്തിൽ നിന്ന് നവി മുംബൈയിലേക്ക് സർവീസുകൾ മാറ്റുന്നതോടെ യാത്രക്കാർക്ക് തങ്ങളുടെ വിമാനത്തിന്റെ പുറപ്പെടൽ കേന്ദ്രം കൃത്യമായി മനസിലാക്കേണ്ടത് പ്രധാനമാണ്. വിമാനത്താവളം മാറുന്നത് യാത്രാ ആസൂത്രണത്തെയും വിമാനത്താവളത്തിലേക്കുള്ള യാത്രാസമയത്തെയും ബാധിച്ചേക്കാം.
12 രാജ്യാന്തര ലക്ഷ്യസ്ഥാനങ്ങളിലേക്ക് ഇൻഡിഗോ
2027 ഫെബ്രുവരി മുതൽ ജൂലൈ വരെയുള്ള കാലയളവിൽ ഇൻഡിഗോയും രാജ്യാന്തര സർവീസുകൾ നവി മുംബൈയിലേക്ക് മാറ്റും. ബഹ്റൈൻ, റിയാദ്, ദമ്മാം, ജിദ്ദ, മദീന, കുവൈത്ത്, റാസ് അൽ ഖൈമ, ഫുജൈറ, മസ്കത്ത്, ധാക്ക, ജക്കാർത്ത എന്നിവിടങ്ങളിലേക്കുള്ള നിലവിലെ സർവീസുകളാണ് ഘട്ടംഘട്ടമായി മാറ്റുന്നത്.
ഇതിനുപുറമെ, 2027ൽ നവി മുംബൈയിൽ നിന്ന് കാഠ്മണ്ഡുവിലേക്ക് പ്രതിദിന സർവീസ് ആരംഭിക്കാനും ഇൻഡിഗോ പദ്ധതിയിടുന്നു. ജൂലൈയോടെ പുതിയ വിമാനത്താവളത്തിൽ നിന്ന് 12 രാജ്യാന്തര ലക്ഷ്യസ്ഥാനങ്ങളിലേക്ക് സർവീസ് നടത്തുകയാണ് കമ്പനിയുടെ ലക്ഷ്യം.
ടെർമിനൽ 1 നവീകരണം 2030ഓടെ പൂർത്തിയാക്കും
ഛത്രപതി ശിവാജി മഹാരാജ് രാജ്യാന്തര വിമാനത്താവളത്തിലെ ടെർമിനൽ 1 നവീകരിക്കുന്നതിനായി കൂടുതൽ ശേഷി ലഭ്യമാക്കുകയാണ് സർവീസുകൾ മാറ്റുന്നതിന്റെ പ്രധാന ലക്ഷ്യം. നവീകരണ പദ്ധതി 2030ഓടെ പൂർത്തിയാകുമെന്നാണ് പ്രതീക്ഷ.
നവീകരണത്തിന് ശേഷം ടെർമിനലിന്റെ വാർഷിക യാത്രക്കാരെ കൈകാര്യം ചെയ്യാനുള്ള ശേഷി 1.5 കോടിയിൽ നിന്ന് 2 കോടിയായി ഉയരും. യാത്രക്കാർക്കുള്ള സൗകര്യങ്ങൾ മെച്ചപ്പെടുത്തുന്നതിനും സുരക്ഷാ മാനദണ്ഡങ്ങൾ ശക്തിപ്പെടുത്തുന്നതിനുമാണ് പദ്ധതിയിൽ പ്രധാന പരിഗണന നൽകുന്നത്.
യാത്രക്കാർ ശ്രദ്ധിക്കേണ്ടത്
വിമാനത്താവളം മാറുന്നതിനാൽ ടിക്കറ്റിലെ പുറപ്പെടൽ വിമാനത്താവളത്തിന്റെ പേര് പരിശോധിക്കുന്നത് നിർണായകമാണ്. പഴയ വിമാനത്താവളത്തിലേക്ക് യാത്ര തിരിക്കുന്നതിന് മുമ്പ് വിമാനക്കമ്പനിയുടെ സന്ദേശങ്ങളും പുതുക്കിയ സമയക്രമവും പരിശോധിക്കണം. പ്രത്യേകിച്ച് 2026 ഡിസംബർ മുതൽ 2027 ജൂലൈ വരെയുള്ള കാലയളവിൽ യാത്ര ചെയ്യുന്നവർ വിമാനത്താവള വിവരങ്ങൾ ഉറപ്പാക്കിയ ശേഷം യാത്ര ആസൂത്രണം ചെയ്യുന്നതാണ് ഉചിതം.
