2025 അവസാനത്തോടെ ടാറ്റ സിയറ എസ്യുവി ഇന്ത്യൻ വിപണിയിൽ എത്താൻ സാധ്യത. ഹ്യുണ്ടായി ക്രെറ്റയെയും കിയ സെൽറ്റോസിനെയും വെല്ലുവിളിക്കാൻ ഒരുങ്ങുന്ന സിയറയിൽ അത്യാധുനിക ഫീച്ചറുകളും ഒന്നിലധികം എഞ്ചിൻ ഓപ്ഷനുകളും പ്രതീക്ഷിക്കാം.
2025 അവസാനത്തോടെ പുതിയ ടാറ്റ സിയറ എസ്യുവി ഇന്ത്യൻ റോഡുകളിൽ എത്തും. മിഡ്സൈസ് എസ്യുവി വിഭാഗത്തിൽ ഹ്യുണ്ടായി ക്രെറ്റ, മാരുതി ഗ്രാൻഡ് വിറ്റാര, കിയ സെൽറ്റോസ് എന്നിവയുടെ ആധിപത്യത്തെ ഇത് വെല്ലുവിളിക്കും. ഒന്നിലധികം പവർട്രെയിൻ ഓപ്ഷനുകൾ, നൂതന സാങ്കേതികവിദ്യ, ആധുനിക ഡിസൈൻ ഭാഷ എന്നിവയാൽ സിയറയ്ക്ക് ശക്തമായ സ്ഥാനം ലഭിക്കുമെന്ന് പ്രതീക്ഷിക്കുന്നു. മുമ്പ് പരാജയപ്പെട്ടെങ്കിലും, പ്രത്യേകിച്ച് 90-കളിലെ ആളുകൾക്കിടയിൽ, സിയറ നെയിംപ്ലേറ്റിന് ഒരു നൊസ്റ്റാൾജിയ മൂല്യം ഉണ്ട്. ഇതും വാഹനത്തിന് ഗുണകരമാകും എന്നാണ് കരുതുന്നത്. ഇതാ പുതിയ ടാറ്റ സിയറയെക്കുറിച്ചുള്ള ചില വിശേഷങ്ങൾ.
ഡിസൈൻ
പുതിയ കാലത്തെ സ്റ്റൈലിംഗ്, കമാൻഡിംഗ് ബോഡി ബിൽറ്റ്, ചതുരാകൃതിയിലുള്ള വീൽ ആർച്ച് ക്ലാഡിംഗ്, ഉയർത്തിയ ബോണറ്റ്, സിഗ്നേച്ചർ കർവ്ഡ്-ഓവർ റിയർ വിൻഡോകൾ തുടങ്ങിയ ഘടകങ്ങൾ എന്നിവയാൽ ഈ എസ്യുവി പലരെയും ആകർഷിക്കും. സിയറ ഐസിഇ പതിപ്പിന് ഗ്രില്ലിന്റെ മുകൾ ഭാഗത്ത് ഗ്ലോസ്-ബ്ലാക്ക് ഫിനിഷും ബമ്പറിൽ ബോഡി-കളർ ഫിനിഷും ഉണ്ട്. പുതിയ സിയറയ്ക്ക് വ്യത്യസ്തമായി രൂപകൽപ്പന ചെയ്ത അലോയ് വീലുകൾ ഉണ്ടാകും. ഫ്ലോട്ടിംഗ് റിയർ സ്പോയിലർ, ഫ്ലഷ് ഡോർ ഹാൻഡിലുകൾ, വേറിട്ട ബി-പില്ലർ, കൂറ്റൻ ഗ്ലോസ്-ബ്ലാക്ക് ക്ലാഡിംഗ്, നിവർന്നുനിൽക്കുന്ന പിൻഭാഗം, ഷാർപ്പായ റാക്ക്ഡ് വിൻഡ്സ്ക്രീൻ എന്നിവ ഇതിലുണ്ട്. ഫോക്സ് സിൽവർ സ്കിഡ് പ്ലേറ്റ്, സ്ലാബ്-സൈഡഡ് ടെയിൽഗേറ്റ്, ഫുൾ-വിഡ്ത്ത് ലൈറ്റ് ബാർ എന്നിവയുള്ള ഡ്യുവൽ-ടോൺ ബമ്പർ പിൻവശത്തെ പ്രൊഫൈൽ കൂടുതൽ മെച്ചപ്പെടുത്തും.
പവർട്രെയിൻ
പെട്രോൾ, ഡീസൽ, ഇലക്ട്രിക് എന്നിങ്ങനെ മൂന്ന് പവർട്രെയിനുകളിൽ ഈ പുതിയ ടാറ്റ എസ്യുവി ലഭ്യമാകും. സിയറ ഇവിയിൽ ഒന്നിലധികം ബാറ്ററി പായ്ക്ക് ഓപ്ഷനുകൾ ലഭ്യമായേക്കാം. ഉയർന്ന സ്പെക്ക് പതിപ്പിൽ 500 കിലോമീറ്ററിലധികം ദൂരം സഞ്ചരിക്കാൻ ഇത് സഹായിക്കും. എസ്യുവിയുടെ ഇലക്ട്രിക് പതിപ്പിൽ ഓപ്ഷണൽ 4X4 ഡ്രൈവ്ട്രെയിൻ സിസ്റ്റം വാഗ്ദാനം ചെയ്തേക്കാം. പെട്രോൾ, ഡീസൽ മോഡലുകളിൽ യഥാക്രമം 1.5 ലിറ്റർ ടർബോ, 2.0 ലിറ്റർ എഞ്ചിനുകൾ ഉൾപ്പെടുത്താം. മാനുവൽ, ഓട്ടോമാറ്റിക് ഗിയർബോക്സുകൾ എന്നിവ ലഭ്യമാകും.
ഇന്റീരിയർ
ടാറ്റ ഇതുവരെ പ്രൊഡക്ഷന് തയ്യാറായ ഇന്റീരിയറിന്റെ ചിത്രങ്ങൾ പുറത്തുവിട്ടിട്ടില്ല. 2023 ൽ അരങ്ങേറ്റം കുറിച്ച സിയറ ഇവി കൺസെപ്റ്റിൽ ഇൻഫോടെയ്ൻമെന്റ്, ഇൻസ്ട്രുമെന്റ് പ്രവർത്തനങ്ങൾക്കായി രണ്ട് പ്രത്യേക സ്ക്രീനുകൾ ഉണ്ടായിരുന്നു. ഈ വർഷം പ്രദർശിപ്പിച്ച എസ്യുവിയുടെ ക്ലോസ്-ടു-പ്രൊഡക്ഷൻ പതിപ്പിൽ (ICE) ഫ്ലോട്ടിംഗ് ട്രിപ്പിൾ സ്ക്രീൻ സജ്ജീകരണം, നാല് സ്പോക്ക് സ്റ്റിയറിംഗ് വീൽ, ഫങ്ഷണൽ എസി വെന്റുകൾ എന്നിവയുണ്ട്. സിയറ ഐസിഇ, ഇവി എന്നിവയുടെ ഔദ്യോഗിക വിവരങ്ങൾ ഇതുവരെ വെളിപ്പെടുത്തിയിട്ടില്ല. എങ്കിലും, പനോരമിക് സൺറൂഫ്, ലെവൽ 2 എഡിഎഎസ് സാങ്കേതികവിദ്യ, 360 ഡിഗ്രി ക്യാമറ, വയർലെസ് സ്മാർട്ട്ഫോൺ കണക്റ്റിവിറ്റി, ഓട്ടോ ഡിമ്മിംഗ് IRVM, വെന്റിലേറ്റഡ് സീറ്റുകൾ തുടങ്ങി നിരവധി സവിശേഷതകൾ ഇതിൽ ഉണ്ടാകുമെന്ന് പ്രതീക്ഷിക്കുന്നു.
