യൂറോപ്യന്‍ വിപണി കീഴടക്കി ഔഡി ഇ ട്രോൺ
ജര്‍മ്മന്‍ ആഡംബര വാഹന നിര്‍മ്മാതാക്കളായ ഔഡിയുടെ ആദ്യത്തെ ഇലക്ട്രോണിക് വാഹനമാണ് ഇ ട്രോൺ
ജര്‍മ്മന്‍ ആഡംബര വാഹന നിര്‍മ്മാതാക്കളായ ഔഡിയുടെ ആദ്യത്തെ ഇലക്ട്രോണിക് വാഹനമാണ് ഇ ട്രോൺ. രണ്ട് വര്‍ഷം മുമ്പ് വിപണിയിലെത്തിയ ഈ വാഹനത്തിന് യൂറോപ്പില്‍ മികച്ച വില്‍പ്പനയാണെന്നാണ് റിപ്പോര്‍ട്ടുകള്‍. ഈ വര്‍ഷം ആദ്യ ആറു മാസത്തിനിടെ 17,641 യൂണിറ്റ് വിൽപ്പനയാണ് ഇ ട്രോൺ നേടിയത്. മുൻ വർഷത്തെ അപേക്ഷിച്ച് ഇ ട്രോൺ വിൽപനയിൽ 87% വളർച്ചയുണ്ടെന്നും വൈദ്യുത എസ്‍യുവി വിഭാഗത്തിൽ ആഗോളതലത്തിൽ തന്നെ ഇ ട്രോൺ മുന്നിലാണെന്നും കമ്പനി വ്യക്തമാക്കുന്നു.
വിൽപന പരിഗണിച്ചാൽ നോർവേയാണ് ‘ഇ ട്രോണി’ന്റെ പ്രധാന വിപണി. രാജ്യത്തെ ഔഡി കാർ വിൽപനയിൽ 92 ശതമാനവും ഇ ട്രോൺ ആണ്. ഐസ്ലൻഡിൽ വിൽക്കുന്ന ഔഡികളിൽ 93% ആണ് ഇ ട്രോണിന്റെ വിഹിതം. സ്വീഡനിൽ വിൽക്കുന്ന ഔഡികളിൽ 12 ശതമാനവും ഇസ്രയേലിലെ ഔഡി വിൽപനയിൽ 14 ശതമാനവും ഇ ട്രോണിന്റെ സംഭാവനയാണ്. അടുത്ത വർഷം ഇ ട്രോൺ വൈദ്യുത വാഹന ശ്രേണിയിൽ ക്യു ഫോർ ഇ ട്രോൺ, ഇ ട്രോൺ ജി ടി എന്നിവ അവതരിപ്പിക്കാനാണ് ഔഡിയുടെ പദ്ധതി.
ഇ ട്രോൺ സ്പോർട് ബാക്ക്, ഇ ട്രോൺ എസ്, ഇ ട്രോൺ സ്പോർട് ബാക്ക് എസ് എന്നിങ്ങനെയാണ് ഇ ട്രോണ്‍ ശ്രേണി. മുന്തിയ വകഭേദമായ ഇ ട്രോൺ 55 ഒറ്റത്തവണ ചാർജ് ചെയ്താൽ 436 കിലോമീറ്റർ ഓടും. 446 കിലോമീറ്ററാണ് സ്പോർട്ബാക്കിന്റെ റേഞ്ച്.. ആക്സിലുകൾക്ക് ഇടയിൽ ഘടിപ്പിച്ച 95 കിലോവാട്ട് അവർ, ലിക്വിഡ് കൂൾഡ്, ലിതിയം അയോൺ ബാറ്ററിയാണ് ഇ ട്രോണിന്റെ ഹൃദയം. ഓരോ ആക്സിലിലുമായി രണ്ട് വൈദ്യുത മോട്ടോറാണ് ഓൾ വീൽ ഡ്രൈവ് ലേ ഔട്ടുള്ള കാറിലുള്ളത്. 265 കിലോവാട്ട് കരുത്തും 561 എൻ എം ടോർക്കുമാണ് ഈ മോട്ടോറുകൾ സൃഷ്ടിക്കുക.
6.6 സെക്കന്‍ഡില്‍ പൂജ്യത്തില്‍ നിന്ന് നൂറ് കിലോമീറ്റര്‍ വേഗം കൈവരിക്കാം. ബുസ്റ്റ് മോഡില്‍ ഈ വേഗത്തിലെത്താന്‍ 5.7 സെക്കന്‍ഡ് മതി. ഇ ട്രോണിന്റെ പരമാവധി വേഗം മണിക്കൂറിൽ 200 കിലോമീറ്ററാണ്. കാറിലെ ബൂസ്റ്റ് ഫംക്ഷൻ പ്രവർത്തനക്ഷമമാക്കിയാൽ പരമാവധി കരുത്ത് 300 കിലോവാട്ടായും ടോർക്ക് 664 എൻ എമ്മായും ഉയരും. ഇതോടെ വെറും 5.7 സെക്കൻഡിൽ കാർ 100 കിലോമീറ്റർ വേഗം കൈവരിക്കും. ഫോക്‌സ്‌വാഗണ്‍ വിഷന്‍ ഇ-കണ്‍സെപ്റ്റിന് സമാനമായി ഇ-ട്രോണിനും കണ്ണാടികളില്ല. ചുറ്റുമുളളതെല്ലാം ക്യാമറകള്‍ അകത്തളത്തിലെ സ്‌ക്രീനില്‍ ദൃശ്യമാക്കും. അഞ്ച് പേര്‍ക്ക് ഇരിക്കാന്‍ സാധിക്കുന്ന സീറ്റിംഗ് കപ്പാസിറ്റിയും 660 ലിറ്റര്‍ ലഗ്ഗേജ് കപ്പാസിറ്റിയും കമ്പനി നല്‍കിയിട്ടുണ്ട്.
സാന്‍ഫ്രാന്‍സിസ്‌കോയില്‍ നടന്ന 2018 ഓഡി ഗ്ലോബല്‍ സമ്മിറ്റിലാണ് ഈ വാഹനം ആദ്യമായി അരങ്ങിലെത്തിയത്. 2019 അവസാനത്തോടെ ഇന്ത്യയിലും ഇ - ട്രോണ്‍ എത്തുമെന്നും ഏകദേശം 66.92 ലക്ഷം രൂപ മുതലായിരിക്കും ഇന്ത്യയില്‍ വാഹനത്തിന്റെ പ്രാരംഭവില എന്നും നേരത്തെ റിപ്പോര്‍ട്ടുകളുണ്ടായിരുന്നു. എന്നാല്‍ നിലവില്‍ ഇക്കാര്യം സംബന്ധിച്ച് വ്യക്തമായ സ്ഥിരീകരണങ്ങളൊന്നും ഇല്ല.
