വെട്ടിച്ചു, ബ്രേക്കിട്ടു; എന്നിട്ടും ഇടറോഡില്‍ നിന്നെത്തിയ സ്‍കൂട്ടറിനെ കാര്‍ ഇടിച്ചിട്ടു!
ഇടറോഡുകളിൽ നിന്നും പ്രധാന റോഡുകളിലേക്ക് കയറുന്നവര്‍ തീര്‍ച്ചയായും ശ്രദ്ധേക്കേണ്ട ഒരു വീഡിയോ ആണ് ഇപ്പോള്‍ സോഷ്യല്‍ മീഡിയയില്‍ വൈറലാകുന്നത്.
അടുത്തകാലത്തായി നടക്കുന്ന പല അപകടങ്ങളും സിസിടിവി ക്യാമറകളില്‍ പതിയാറുണ്ട്. ട്രാഫിക് നിയമങ്ങള്‍ കൃത്യമായി പാലിക്കേണ്ടതിന്‍റെ ആവശ്യകതയെപ്പറ്റി ചിലരെയെങ്കിലും ബോധവാന്മാരാക്കുന്നതില്‍ ഇത്തരം വീഡിയോകള്‍ ഒരുപരിധി വരെ സഹായിച്ചേക്കും.
ശ്രദ്ധയില്ലാതെ ഇടറോഡുകളിൽ നിന്നും പ്രധാന റോഡുകളിലേക്ക് കയറുന്നവര്‍ തീര്‍ച്ചയായും ശ്രദ്ധേക്കേണ്ട ഒരു വീഡിയോ ആണ് ഇപ്പോള്‍ സോഷ്യല്‍ മീഡിയയില്‍ വൈറലാകുന്നത്. ഇടറോഡിൽ നിന്നും പ്രധാനറോഡിലൂടെ മുന്നോട്ടെടുത്ത സ്‍കൂട്ടറിനെ ഒരു കാര്‍ ഇടിച്ചു തെറിപ്പിക്കുന്ന ഞെട്ടിപ്പിക്കുന്ന ദൃശ്യങ്ങളാണ് ഈ വീഡിയോയില്‍.
തലശ്ശേരി പുന്നപ്പാലത്താണ് ഈ അപകടം നടന്നത്. ഡ്രൈവർക്ക് സംഭവിച്ച ചെറിയൊരു അശ്രദ്ധയാണ് അപകടകാരണം. മറ്റൊരു വാഹനം കടന്നു പോയതിന് ശേഷം വേറെ വാഹനങ്ങൾ ഒന്നും വരുന്നില്ല എന്നു കരുതി സ്‍കൂട്ടർ മുന്നോട്ട് എടുത്തപ്പോഴാണ് അപകടം. ഇരുവാഹനങ്ങളും കൂട്ടിയിടി ഒഴിവാക്കാൻ ശ്രമിച്ചെങ്കിലും നടന്നില്ല എന്നത് വീഡിയോയില്‍ വ്യക്തമാണ്.
സ്‍കൂട്ടർ കയറി വരുന്നതുകണ്ട് കാര്‍ വലത്തേക്ക് വെട്ടിക്കുന്നതും വീഡിയോയില്‍ കാണാം. പക്ഷേ എന്നിട്ടും അപകടം ഒഴിവാക്കാൻ സാധിച്ചില്ല. ഇടിയുടെ ആഘാതത്തിൽ സ്‍കൂട്ടർ യാത്രികര്‍ വായുവിൽ ഉയർന്നു പൊങ്ങുന്നതും താഴേക്ക് വീഴുന്നതും വീഡിയോയിൽ കാണാം. അപകടത്തിൽ സ്‍കൂട്ടർ യാത്രികരായ ദമ്പതിമാർക്ക് പരിക്കേറ്റു എന്നാണ് റിപ്പോര്‍ട്ടുകള്‍.
പ്രധാന റോഡുകളിലേക്ക് പ്രവേശിക്കും മുമ്പ് ഇക്കാര്യങ്ങള്‍ ശ്രദ്ധിക്കുക
- പ്രധാന റോഡിലേക്ക് പ്രവേശിക്കും മുൻപ് ഇരുവശത്തു നിന്നും മറ്റു വാഹനങ്ങള്‍ വരുന്നില്ലെന്ന് ഉറപ്പുവരുത്തുക
- പ്രധാന റോഡിലൂടെ പോകുന്ന വാഹനങ്ങൾക്ക് മുൻഗണന നൽകണം.
- പ്രധാന റോഡിലൂടെ പോകുന്ന വാഹനങ്ങളുടെ വേഗം നമ്മുടെ കണക്കൂട്ടിലിൽ ആയിരിക്കില്ല. അതുകൊണ്ട് വാഹനം പോയതിന് ശേഷം മാത്രം തിരിയാൻ ശ്രമിക്കുക.
- നാലു വരിപാതയാണെങ്കിലും നമ്മുടെ സുരക്ഷയെക്കരുതി ഇടതു വശവും വലതു വശവും നോക്കി വേണം റോഡിലേക്ക് പ്രവേശിക്കാൻ.
- മീഡിയനിൽ നിന്ന് തിരിഞ്ഞ് പെട്ടെന്ന് വാഹനത്തിന്റെ മുമ്പിലേക്ക് ചെന്നാൽ ഡ്രൈവർക്ക് പ്രതികരിക്കാൻ പോലും സമയം കിട്ടിയെന്ന് വരില്ല. അതുകൊണ്ട് സുരക്ഷിതമെന്ന് തോന്നിയാൽ മാത്രമേ തിരിയാവൂ.
ഓവര്‍ടേക്ക് ചെയ്യുമ്പോള്‍ ശ്രദ്ധിക്കേണ്ട കാര്യങ്ങള്‍
1. വലതുവശം
മുന്നിലെ വാഹനത്തിന്റെ വലതുവശത്തുകൂടിയല്ലാതെ ഓവര്‍ടേക്ക് ചെയ്യരുത്. മാത്രമല്ല മുന്നിലെ വാഹനത്തിന് ഒരു തരത്തിലും അസൗകര്യമുണ്ടാക്കാതെ വേണം മറികടക്കാന്‍
2. റോഡ് കാണാന്‍ കഴിയണം
മുന്നിലുള്ള വാഹനത്തെ മറികടക്കുന്നതിനു മുമ്പ് സുരക്ഷിതമായി ഓവര്‍ടേക്കു ചെയ്യാന്‍ സാധിക്കുന്നവിധം റോഡ് കാണാമെന്ന് ഉറപ്പാക്കണം
3. വളവുകളില്‍ അരുതേയരുത്
വളവുകളിലും റോഡ് കാണാന്‍ പറ്റാത്ത അവസ്ഥകളിലും ഓവര്‍ടേക്കിങ് ഒരിക്കലും പാടില്ല
4. പിന്നിലെ വാഹനങ്ങള്‍
പിന്നില്‍നിന്നു വാഹനങ്ങള്‍ തന്നെ ഓവര്‍ടേക്ക് ചെയ്യാന്‍ ശ്രമിക്കുന്നില്ലെന്നും ഉറപ്പുവരുത്തണം
5. എതിര്‍ദിശയിലെ വാഹനങ്ങള്‍
എതിര്‍ദിശയില്‍നിന്നു വരുന്ന വാഹനത്തെ വ്യക്തമായി കാണാന്‍ സാധിക്കാത്ത സന്ദര്‍ഭങ്ങളില്‍ ഓവര്‍ടേക്ക് ചെയ്യരുത്.
6. കണക്കുകൂട്ടല്‍ പിഴച്ചാല്‍
ഓവര്‍ടേക്കിങ് വളരെയധികം ശ്രദ്ധ വേണ്ട കാര്യമാണ്. അമിതമായ ആത്മവിശ്വാസം വേണ്ടേ വേണ്ട. കാരണം കണക്കുകൂട്ടല്‍ അല്‍പമൊന്നു പിഴച്ചാല്‍ മതി വന്‍ ദുരന്തം സംഭവിക്കാന്‍.
