Electric Scooters 2021 : 2021-ൽ ഇന്ത്യ കണ്ട ചില ഇലക്ട്രിക് സ്‍കൂട്ടറുകൾ

രാജ്യം ഇലക്ട്രിക്ക് വാഹന വിപ്ലവത്തിന് സാക്ഷ്യം വഹിക്കുകയാണ്. നിരവധി കമ്പനികളാണ് ഈ മേഖലയിലേക്ക് എത്തിക്കൊണ്ടിരിക്കുന്നത്. ഇതാ 2021ലെ ചില സുപ്രധാന ഇലക്ട്രിക്ക് വാഹന ലോഞ്ചുകളെ പരിചയപ്പെടാം

ഇന്ത്യയിൽ വാഹന മേഖലയില്‍ വൈദ്യുതീകരണം (Electric Vehicles) വളരെ ഊർജ്ജസ്വലമായി തീര്‍ന്ന വര്‍ഷമാണ് 2021. ഈ വർഷം നാലുചക്ര ഇലക്ട്രിക് വാഹന വിഭാഗത്തിൽ ചില സുപ്രധാന ലോഞ്ചുകൾക്കൊപ്പം ഇലക്ട്രിക്കിലേക്ക് ചുവട് വയ്ക്കുന്ന പ്രമുഖ ഇരുചക്രവാഹന നിര്‍മ്മാതാക്കളെയും രാജ്യം കണ്ടു. നിരവധി പുതിയ കമ്പനികളും ഈ മേഖലയിലേക്ക് കടന്നുവന്നു കഴിഞ്ഞു. ഇതാ 2021ലെ ചില സുപ്രധാന ഇലക്ട്രിക്ക് വാഹന ലോഞ്ചുകളെ പരിചയപ്പെടാം

ഒല ഇലക്ട്രിക്ക്
ഇന്ത്യന്‍ വാഹന ലോകം ഏറെനാളായി കൊതിയോടെ കാത്തിരുന്ന ഓണ്‍ലൈന്‍ ടാക്സി സേവനദാതാക്കളായ ഒലയുടെ ഇലക്ട്രിക് സ്‌കൂട്ടര്‍ 2021ലെ സ്വാതന്ത്ര്യ ദിനത്തിലാണ് വിപണിയില്‍ അവതരിപ്പിക്കുന്നത്. രാജ്യത്ത് ഇലക്ട്രിക്ക് വാഹന വിപ്ലവത്തിന് വേഗത കൂട്ടി, ഒല എസ്-1, എസ്-1 പ്രോ എന്നീ രണ്ട് വേരിയന്റുകളില്‍ എത്തിയിട്ടുള്ള ഈ ഇലക്ട്രിക് സ്‌കൂട്ടറിന് യഥാക്രമം 99,999 രൂപയും 1.29 ലക്ഷം രൂപയുമാണ് എക്‌സ്‌ഷോറും വില. ജനപ്രിയ മോഡലായ ഹോണ്ട ആക്ടിവായെക്കാള്‍ വിലക്കുറവിലാണ് ഒലയുടെ സ്‍കൂട്ടര്‍ എത്തിയിരിക്കുന്നതെന്നാണ് റിപ്പോര്‍ട്ടുകള്‍. 10 നിറങ്ങളിലാണ് ഒല സ്‍കൂട്ടറുകള്‍ എത്തുന്നത്. പുറം കാഴ്‍ചയില്‍ ഒരുപോലെ ഇരിക്കുന്ന ഈ രണ്ട് വേരിയന്‍റുകള്‍ക്കു ഫീച്ചറുകള്‍, റേഞ്ച്, റൈഡിങ്ങ് മോഡുകള്‍ എന്നിവയില്‍ വ്യത്യാസമുണ്ട്. എസ്-1 പ്രോയാണ് ഒല സ്‌കൂട്ടര്‍ നിരയിലെ ഉയര്‍ന്ന വകഭേദം. അടിസ്ഥാന വേരിയന്‍റായ എസ് 1ല്‍ നിന്ന് വ്യത്യസ്‍തമായി വോയിസ് കണ്‍ട്രോള്‍, ഹില്‍ ഹോര്‍ഡ്, ക്രൂയിസ് കണ്‍ട്രോള്‍ തുടങ്ങിയ ഫീച്ചറുകളാണ് എസ്-1 പ്രോയില്‍ നല്‍കിയിട്ടുള്ളത്. 3 സെക്കൻഡിനുള്ളിൽ 0 മുതൽ 40 കിലോമീറ്റർ വേഗതയും ഏഴ് സെക്കൻഡിൽ 0 മുതൽ 60 കിലോമീറ്റർ വരെ വേഗതയും എസ് 1 പ്രോ മോഡൽ കൈവരിക്കും. മണിക്കൂ‌റിൽ 115 കിലോമീറ്ററാണ് വാഹനത്തിന്റെ പരമാവധി വേ​ഗത. നോർമൽ, സ്പോർട്സ്, ഹൈപ്പർ എന്നീ മൂന്ന് റൈഡിങ് മോഡുകളാണ് എസ് 1 പ്രോയിലുള്ളത്. 

സിംപിള്‍ വണ്‍
ഓല ഇലക്ട്രിക് പുറത്തിറക്കിയതിന് പിന്നാലെ, ബെംഗളൂരു ആസ്ഥാനമായുള്ള ഇലക്ട്രിക് വെഹിക്കിൾ (ഇവി) സ്റ്റാർട്ടപ്പ് സിമ്പിൾ എനർജി അതിന്റെ ഇലക്ട്രിക് സ്‌കൂട്ടർ സിമ്പിൾ വൺ പുറത്തിറക്കി. ഈ ഇലക്ട്രിക് സ്കൂട്ടറിന്റെ സവിശേഷത 4.8 kWh ബാറ്ററി പായ്ക്ക് ആണ്, അത് പോർട്ടബിൾ ആണ്. അതിനാൽ, ഒരാൾക്ക് ഇവിയിൽ നിന്ന് ലിഥിയം-അയൺ ബാറ്ററി പാക്ക് വേർപെടുത്താനും വീട്ടിൽ ചാർജ് ചെയ്യാനും കഴിയും. ഒരു തവണ ചാർജ് ചെയ്താൽ ഇക്കോ മോഡിൽ 203 കിലോമീറ്ററും ഇന്ത്യൻ ഡ്രൈവ് സൈക്കിൾ (ഐഡിസി) അവസ്ഥയിൽ 236 കിലോമീറ്ററും റേഞ്ചാണ് ഇലക്ട്രിക് സ്കൂട്ടർ ഉപയോക്താവിന് വാഗ്ദാനം ചെയ്യുന്നത്. 

പരസ്യ കോലാഹലങ്ങളോ അവകാശവാദങ്ങളോ ഇല്ലാതെയാണ് സിമ്പിള്‍ വണ്‍ നിരത്തിലെത്തിയത്. അതുകൊണ്ടു തന്നെ സീറോ മാര്‍ക്കറ്റിംഗിലൂടെ ലഭിച്ച ഈ ജനപ്രിയതയെ ഏറെ വിലമതിക്കുന്നുവെന്നാണ് കമ്പനി വ്യക്തമാക്കുന്നത്. സ്വാതന്ത്ര്യദിനത്തില്‍ ബെംഗലുരുവിലാണ് സ്‌കൂട്ടറിന്റെ പുറത്തിറക്കല്‍ ചടങ്ങ് നടന്നത്. 1.10 ലക്ഷം രൂപയാണ് വാഹനത്തിന് വില. 1,947 രൂപ നല്‍കി വാഹനം ബുക്ക് ചെയ്യാം. രാജ്യത്തിന് സ്വാതന്ത്ര്യം ലഭിച്ച വര്‍ഷത്തിന്റെ സ്മരണയിലാണ് ബുക്കിംഗ് തുക 1947 ആയി നിശ്ചയിച്ചിരിക്കുന്നത്.

നിലവില്‍ വിപണിയിലുള്ള ഇലക്ട്രിക് മോഡലുകളില്‍ നിന്ന് വ്യത്യസ്തമായി ഒട്ടേറെ ഫീച്ചറുകളും, സവിശേഷതകളും സിമ്പിള്‍ വണ്‍ സ്‌കൂട്ടറിനുണ്ടായിരിക്കും. ഈ മോഡല്‍ രൂപകല്‍പന ചെയ്തിരിക്കുന്നത് ക്ലൗഡിലെ ഡസ്സോള്‍ട്ട് സിസ്റ്റംസിന്റെ ത്രിഡി എക്‌സ്പീരിയന്‍സ് പ്ലാറ്റ്ഫോം ഉപയോഗിച്ചാണ്. രാജ്യത്തെ ഏറ്റവും വേഗതയേറിയ ഇലക്ട്രിക് സ്‌കൂട്ടറായി സിമ്പിള്‍ വണ്‍ മാറുമെന്നും കമ്പനി അവകാശപ്പെടുന്നു.

ഈവി സോൾ
ഒഡീഷ ആസ്ഥാനമായുള്ള ഇലക്ട്രിക് ഇരുചക്ര വാഹന നിർമ്മാതാക്കളായ ഈവി ഇന്ത്യ ഈവി ഇന്ത്യ അതിന്റെ പുതിയ ഇലക്ട്രിക് സ്കൂട്ടർ സോൾ പുറത്തിറക്കിയത് 1.39 ലക്ഷം രൂപ എക്സ്-ഷോറൂം വിലയിലാണ്. യൂറോപ്യൻ ടെക്‌നോളജി നിലവാരത്തിലാണ് ഇലക്‌ട്രിക് സ്‌കൂട്ടർ നിർമ്മിച്ചിരിക്കുന്നതെന്ന് കമ്പനി അവകാശപ്പെടുന്നു. IOT പ്രവർത്തനക്ഷമമാക്കിയ, ആന്റി-തെഫ്റ്റ് ലോക്ക് സിസ്റ്റം, ജിപിഎസ് നാവിഗേഷൻ, യുഎസ്ബി പോർട്ട്, സെൻട്രൽ ബ്രേക്കിംഗ് സിസ്റ്റം ജിയോ-ടാഗിംഗ്, കീലെസ്സ് അനുഭവം, റിവേഴ്സ് മോഡ്, ജിയോ ഫെൻസിങ് തുടങ്ങിയ സൗകര്യങ്ങളോടെയാണ് ഇവി വരുന്നത്. പൂർണ്ണമായി ചാർജ് ചെയ്താൽ, ഈ സ്കൂട്ടർ ഉപയോക്താവിന് 120 കിലോമീറ്ററിലധികം റേഞ്ച് വാഗ്ദാനം ചെയ്യുന്നു.

അടുത്ത രണ്ട് വർഷത്തിനുള്ളിൽ 50,000 യൂണിറ്റ് വിൽപ്പന ലക്ഷ്യം കൈവരിക്കാനും ഇലക്ട്രിക് ഇരുചക്ര വാഹന വിഭാഗത്തിൽ 10 ശതമാനം വിപണി വിഹിതം നേടാനും കമ്പനി ലക്ഷ്യമിടുന്നു. നിലവിൽ ഈവിക്ക് രാജ്യത്തുടനീളം 150 ഡീലർഷിപ്പുകളും 300 സബ് ഡീലർമാരുമുണ്ട്. കമ്പനിയുടെ ഒഡീഷ ആസ്ഥാനമായുള്ള സ്ഥാപനത്തിന് 3 ലക്ഷം യൂണിറ്റ് വാർഷിക ഉൽപ്പാദന ശേഷിയുണ്ട്. വരും വർഷങ്ങളിൽ ഇത് പ്രതിവർഷം 5 ലക്ഷം യൂണിറ്റായി ഉയർത്തും. നിലവിൽ, കുറഞ്ഞ വേഗതയുള്ള മോഡലുകൾ ഉൾപ്പെടെ 6 ഇലക്ട്രിക് ഇരുചക്ര വാഹനങ്ങളാണ് EeVe ഇന്ത്യയിൽ വിൽക്കുന്നത്.

ബൗൺസ് ഇൻഫിനിറ്റി
ഇലക്‌ട്രിക് വെഹിക്കിൾ സ്റ്റാർട്ടപ്പ് ബൗൺസിന്റെ പുതിയ ഇൻഫിനിറ്റി ഇലക്ട്രിക് സ്‌കൂട്ടർ അടുത്തിടെ പുറത്തിറക്കി. ബാറ്ററിയും ചാർജറും ഉൾപ്പെടെ 68,999 രൂപയ്ക്ക് ഈ ഈവി ലഭിക്കും. എന്നിരുന്നാലും, ബാറ്ററിയില്ലാതെ സ്‌കൂട്ടറിന്റെ വില 36,000 രൂപ ആണ്. ഓപ്ഷണൽ ബാറ്ററിയിൽ വാഗ്ദാനം ചെയ്യുന്ന വിപണിയിലെ ആദ്യത്തെ ഇലക്ട്രിക് സ്കൂട്ടറാണിത്. ബാറ്ററിയില്ലാതെ വാഹനം തിരഞ്ഞെടുക്കാൻ ഉപഭോക്താക്കളെ അനുവദിക്കുന്ന 'ബാറ്ററി ആസ് എ സർവീസ്' ഓപ്ഷനുള്ള ഇ-സ്‌കൂട്ടർ കമ്പനിക്കുണ്ട്. ഇതിന്റെ രണ്ട് കിലോവാട്ട് മണിക്കൂർ ലിഥിയം അയൺ ബാറ്ററി ഒറ്റ ചാർജിൽ സ്‍കൂട്ടറിന് 85 കിലോമീറ്റർ റേഞ്ച് നൽകുന്നു.

ഈ ഇലക്ട്രിക് സ്‍കൂട്ടർ ബാറ്ററി പാക്കിനൊപ്പം അല്ലെങ്കിൽ അല്ലാതെയും സ്വന്തമാക്കാം എന്നാണ് റിപ്പോര്‍ട്ടുകള്‍. സ്റ്റാൻഡേർഡ് ലിഥിയം-അയൺ സ്വാപ്പ് ചെയ്യാവുന്ന ബാറ്ററി പാക്കുള്ള മോഡലിന് 68,999 രൂപയും ബാറ്ററിയില്ലാതെ 45,099 രൂപയുമാണ് വില. രണ്ട് വിലകളും ദില്ലി എക്സ്-ഷോറൂം വിലകളാണ്. സംസ്ഥാന സർക്കാരുകളിൽ നിന്നുള്ള FAME II സബ്‌സിഡികളും ഈ മോഡലിന് ലഭിക്കും. ഇതോടെ വില അല്‍പ്പം കൂടി കുറയാനാണ് സാധ്യത.

ബാറ്ററി ഇല്ലാത്ത മോഡൽ, പ്ലാൻ അനുസരിച്ച്, 850 രൂപ മുതൽ 1,250 രൂപ വരെ അധിക ചിലവ് വരുന്ന 'ബാറ്ററി-ആസ്-എ-സർവീസ്' പ്രതിമാസ സബ്‌സ്‌ക്രിപ്‌ഷൻ സ്‍കീമിനൊപ്പം ലഭ്യമാണ്. സാധാരണ സ്‌കൂട്ടറുകളെ അപേക്ഷിച്ച് ഓഫർ ഉടമസ്ഥാവകാശത്തിന്റെ വില ഏകദേശം 40 ശതമാനം കുറയ്ക്കുമെന്ന് കമ്പനി പറയുന്നു. ബൗൺസ് ഇലക്ട്രിക് സ്‍കൂട്ടറിന്റെ ഡെലിവറി 2022 മാർച്ചിൽ ആരംഭിക്കും. ഇത് ഓൺലൈനായോ കമ്പനിയുടെ ഡീലർഷിപ്പ് നെറ്റ്‌വർക്ക് വഴിയോ വാങ്ങാം. താൽപ്പര്യമുള്ള ഉപഭോക്താക്കൾക്ക് 499 രൂപ അടച്ച് വാഹനം മുൻകൂട്ടി ബുക്ക് ചെയ്യാം, അത് തിരികെ ലഭിക്കും.

കൊമാകി
കൊമാകി TN95, SE, M5 എന്നിങ്ങനെ മൂന്ന് ബാറ്ററിയിൽ പ്രവർത്തിക്കുന്ന ഇരുചക്രവാഹനങ്ങൾ പുറത്തിറക്കി. TN95, SE എന്നിവ ഇലക്‌ട്രിക് സ്‌കൂട്ടറുകളാണ്, അവയുടെ വില യഥാക്രമം 98,000 രൂപ, 96,000 രൂപ എന്നിങ്ങനെയാണ്. അതേസമയം M5 മോഡലിന് ₹99,000 വിലയുള്ള ഇലക്ട്രിക് മോട്ടോർസൈക്കിളാണ് (എല്ലാ വിലകളും ഡൽഹി എക്‌സ്‌ഷോറൂം ആണ്). വേർപെടുത്താവുന്ന ലിഥിയം-അയൺ ബാറ്ററിയാണ് TN95 ഇലക്ട്രിക് സ്‌കൂട്ടറിൽ വരുന്നത്, ഫുൾ ചാർജിൽ ഉപയോക്താവിന് 100 കിലോമീറ്റർ മുതൽ 150 കിലോമീറ്റർ വരെ സഞ്ചരിക്കാനാകും. എന്നിരുന്നാലും, ഈ നിർദ്ദിഷ്ട മോഡലിന്റെ മുഴുവൻ സാങ്കേതിക വിശദാംശങ്ങളും കമ്പനി ഇതുവരെ വെളിപ്പെടുത്തിയിട്ടില്ല.