ഇന്ത്യയിലെ ആദ്യത്തെ മെഴ്സിഡീസ് ബെൻസ് സ്റ്റുഡിയോ ഗുരുഗ്രാമിൽ പ്രവർത്തനം ആരംഭിച്ചു. വാഹനങ്ങൾക്കൊപ്പം ജീവിതശൈലി, ഡിസൈൻ, ഭക്ഷണ അനുഭവങ്ങൾ എന്നിവ ഒരുക്കുന്ന ഈ കേന്ദ്രത്തിൽ കൺസെപ്റ്റ് എഎംജി ജിടി എക്സ് എക്സ്, എഫ്1 ടീം ഇ-ബൈക്കുകൾ എന്നിവയും അവതരിപ്പിച്ചു.
ഇന്ത്യയിലെ ആദ്യ മെഴ്സിഡീസ് ബെൻസ് സ്റ്റുഡിയോ ഗുരുഗ്രാമിൽ പ്രവർത്തനം ആരംഭിച്ചു. ഡൽഹി എൻസിആറിലെ ഡിഎൽഎഫ് വൺ ഹൊറൈസൺ സെന്ററിലാണ് പുതിയ സ്റ്റുഡിയോ തുറന്നത്. മെഴ്സിഡീസ് ബെൻസിന്റെ ആഗോള സ്റ്റുഡിയോ പദ്ധതിയുടെ ഭാഗമായാണ് ഇന്ത്യയിലും ഈ പുതിയ സംവിധാനത്തിന് തുടക്കമായത്. നാല് ഭൂഖണ്ഡങ്ങളിലെ 14 വിപണികളിലേക്കാണ് കമ്പനി ഈ സ്റ്റുഡിയോ ആശയം വ്യാപിപ്പിക്കുന്നത്. സാധാരണ മെഴ്സിഡീസ് ബെൻസ് ഡീലർഷിപ്പുകളിൽ നിന്ന് വ്യത്യസ്തമായി, വാഹനങ്ങൾ കാണുന്നതിനൊപ്പം ജീവിതശൈലി, ഡിസൈൻ, ഭക്ഷണ അനുഭവങ്ങൾ എന്നിവയും ഒരുമിച്ച് ലഭിക്കുന്ന തുറന്ന ഇടമായാണ് സ്റ്റുഡിയോ ഒരുക്കിയിരിക്കുന്നത്.
ഡിസൈനും ലൈഫ് സ്റ്റൈലും ഒരിടത്ത്
സ്റ്റുഡിയോയിൽ ഡിസൈൻ, മെറ്റീരിയൽ ലൈബ്രറി, മെഴ്സിഡീസ് ബെൻസ് കളക്ഷൻ ഉൽപ്പന്നങ്ങൾ, മെഴ്സിഡീസ് എഎംജി പെട്രോണാസ് എഫ്1 ടീം, അഡിഡാസ് ഉൽപ്പന്നങ്ങൾ എന്നിവ പ്രദർശിപ്പിച്ചിട്ടുണ്ട്. ഉപഭോക്താക്കൾക്ക് ഇവിടെ നിന്ന് ടെസ്റ്റ് ഡ്രൈവ് ബുക്ക് ചെയ്യാനും സാധിക്കും. വാഹനങ്ങൾ കാണുന്നതിനപ്പുറം ബ്രാൻഡുമായി ഉപഭോക്താക്കൾക്ക് കൂടുതൽ അടുത്തിടപഴകാനുള്ള വേദിയായാണ് സ്റ്റുഡിയോ വിഭാവനം ചെയ്തിരിക്കുന്നത്.
പ്രത്യേക കഫേയും
സ്റ്റുഡിയോയ്ക്കുള്ളിൽ ലാവോൺ കഫേയും പ്രവർത്തിക്കുന്നുണ്ട്. ഈ കേന്ദ്രത്തിനായി പ്രത്യേകം തയ്യാറാക്കിയ മെനുവാണ് കഫേയിൽ ഒരുക്കിയിരിക്കുന്നത്. മെഴ്സിഡീസ് ബെൻസിന്റെ ഡിസൈൻ ശൈലിയിൽ നിന്ന് പ്രചോദനം ഉൾക്കൊണ്ട 16 വിഭവങ്ങളാണ് മെനുവിലുള്ളത്. 8 പെറ്റിറ്റ് ഗറ്റോ, 8 വിയന്നോസറി, ബേക്ക്ഡ് വിഭവങ്ങൾ എന്നിവ ഇതിൽ ഉൾപ്പെടുന്നു.
Related Articles
എഎംജി ജിടി എക്സ് എക്സ് ഇന്ത്യയിൽ
ഇന്ത്യയിലെ ആദ്യ പ്രദർശനത്തോടെ ശ്രദ്ധ നേടുകയാണ് കൺസെപ്റ്റ് എഎംജി ജിടി എക്സ് എക്സ്. ഗുരുഗ്രാമിലെ മെഴ്സിഡീസ് ബെൻസ് സ്റ്റുഡിയോയിലാണ് വാഹനത്തിന്റെ ഇന്ത്യയിലെ അരങ്ങേറ്റം. മൂന്ന് ആക്സിയൽ ഫ്ലക്സ് ഇലക്ട്രിക് മോട്ടോറുകളാണ് വാഹനത്തിന് കരുത്തേകുന്നത്. മുന്നിൽ ഒരു മോട്ടോറും പിന്നിൽ രണ്ട് മോട്ടോറുകളുമാണുള്ളത്. 1,000 കിലോവാട്ടിൽ കൂടുതൽ, അതായത് 1,360 എച്ച്പിയിൽ അധികം, പരമാവധി കരുത്താണ് വാഹനത്തിനുള്ളത്. എഎംജിയുടെ ഉയർന്ന പ്രകടന ശേഷിയുള്ള എഎംജി ഇഎ ഇലക്ട്രിക് ആർക്കിടെക്ചറും എഎംജി പെർഫോമൻസ് 4മാറ്റിക് പ്ലസ് ഓൾ വീൽ ഡ്രൈവ് സംവിധാനവും വാഹനത്തിലുണ്ട്.
360 കിലോമീറ്ററിന് മുകളിൽ വേഗം
360 കിലോമീറ്റർ/മണിക്കൂറിന് മുകളിലാണ് എഎംജി ജിടി എക്സ് എക്സിന്റെ പരമാവധി വേഗതയെന്ന് മെഴ്സിഡീസ് എഎംജി അവകാശപ്പെടുന്നു. 0.198 ആണ് വാഹനത്തിന്റെ ഡ്രാഗ് കോഫിഷ്യന്റ്. 800 വോൾട്ട് പ്ലസ് ഇലക്ട്രിക്കൽ സംവിധാനമാണ് വാഹനത്തിൽ ഉപയോഗിച്ചിരിക്കുന്നത്. 850 കിലോവാട്ടിൽ കൂടുതൽ ശരാശരി ഡിസി ചാർജിങ് ശേഷിയും വാഹനത്തിനുണ്ട്. ഏകദേശം 5 മിനിറ്റ് ചാർജിങ്ങിലൂടെ 400 കിലോമീറ്ററോളം ഡബ്ല്യുഎൽടിപി റേഞ്ച് കൂട്ടിച്ചേർക്കാൻ കഴിയുമെന്നാണ് കമ്പനിയുടെ അവകാശവാദം.
എഫ്1 ഇ-ബൈക്കുകൾക്കും തുടക്കം
മെഴ്സിഡീസ് ബെൻസ് ഇന്ത്യ, ഇമോട്ടോറാഡുമായി സഹകരിച്ച് മെഴ്സിഡീസ് എഎംജി പെട്രോണാസ് എഫ്1 ടീം ഇ-ബൈക്ക് ശ്രേണിയും അവതരിപ്പിച്ചു. സിറ്റി, ട്രാക്ക്, റാലിയെ എന്നീ മൂന്ന് പതിപ്പുകളിലാണ് ഇ-ബൈക്കുകൾ എത്തുന്നത്. മൂന്ന് മോഡലുകൾക്കും 250 വാട്ട് റിയർ ഹബ് മോട്ടോറാണ് നൽകിയിരിക്കുന്നത്. കംഫർട്ട്, സ്പോർട്ട്, സ്പോർട്ട് പ്ലസ് എന്നീ റൈഡിങ് മോഡുകൾ ലഭിക്കും. മണിക്കൂറിൽ 25 കിലോമീറ്ററാണ് പരമാവധി സഹായ വേഗത. അധിക ബാറ്ററി ഉപയോഗിച്ചാൽ 100 കിലോമീറ്റർ വരെ റേഞ്ച് ലഭിക്കുമെന്നാണ് കമ്പനി പറയുന്നത്. 5.5 ഇഞ്ച് സംയോജിത കളർ ഡിസ്പ്ലേ, അലുമിനിയം ഫ്രെയിം, ഹൈഡ്രോളിക് ഡിസ്ക് ബ്രേക്കുകൾ എന്നിവയും ഇ-ബൈക്കുകളുടെ പ്രത്യേകതകളാണ്. സിറ്റി എഡിഷന് 4.20 ലക്ഷം, ട്രാക്ക് എഡിഷന് 5.70 ലക്ഷം, റാലിയെ എഡിഷന് 7.60 ലക്ഷം എന്നിങ്ങനെയാണ് വില. ജിഎസ്ടി ഉൾപ്പെടെയുള്ള വിലയാണിത്. പ്രീ-ബുക്കിങ് ആരംഭിച്ചുകഴിഞ്ഞു. 2026 സെപ്റ്റംബർ മധ്യത്തോടെ വിതരണം ആരംഭിക്കാനാണ് കമ്പനിയുടെ പദ്ധതി.
