ഒറ്റദിവസം വിറ്റത് ഇത്രയും ബുള്ളറ്റുകള്, റോയല് എൻഫീല്ഡിനിത് ഓണം ബമ്പര്!
ഓണക്കാലത്താണ് കമ്പനിയുടെ ഈ റെക്കോഡ് നേട്ടം.
ഒരു ദിവസം 1000 ബൈക്കുകള് ഉപയോക്താക്കള്ക്ക് കൈമാറി റെക്കോഡ് സൃഷ്ടിച്ച് ഐക്കണിക്ക് ഇരുചക്ര വാഹന നിര്മ്മാതാക്കളായ റോയല് എന്ഫീല്ഡ്. ഓണക്കാലത്താണ് കമ്പനിയുടെ ഈ റെക്കോഡ് നേട്ടം. ഓണാഘോഷങ്ങളുടെ ഭാഗമായി ഓഗസ്റ്റ് 30-നാണ് 1000 ബൈക്കുകള് ഉപയോക്താക്കള്ക്ക് നല്കിയത് എന്നാണ് റിപ്പോര്ട്ടുകള്.
റോയല് എന്ഫീല്ഡ് ക്ലാസിക് 350, ഹിമാലയന്, കോണ്ടിനെന്റല് ജിടി 650, ഇന്റര്സെപ്റ്റര്, തണ്ടര്ബേഡ് എക്സ്, സ്റ്റാന്റേഡ് തുടങ്ങിയ മോഡലുകള് ഉള്പ്പെടുന്നതാണ് ഈ ആയിരം ബൈക്കുകള്. അതേസമയം ഒരോരോ മോഡലിന്റെയും കൃത്യമായ നമ്പറുകള് റോയല് എന്ഫീല്ഡ് വെളിപ്പെടുത്തിയില്ല.
കേരളത്തിലുടനീളം റോയല് എന്ഫീല്ഡിന് 59 ഡീലര്ഷിപ്പുകളും 25 സ്റ്റുഡിയോ സ്റ്റോറുകളുമുണ്ടെന്നാണ് റിപ്പോര്ട്ട്. ഈ ഷോറുമുകളില് നിന്നെല്ലാമായാണ് ഒറ്റ ദിവസം 1000 ബൈക്കുകള് നിരത്തുകളിലെത്തിയത്. കോവിഡ് പ്രതിസന്ധിക്ക് ശേഷമുള്ള വലിയ തിരിച്ചുവരവായാണ് റോയല് എന്ഫീല്ഡ് ഈ നേട്ടത്തെ വിലയിരുത്തുന്നത്.
കൂടുതല് ബൈക്കുകള് എത്തിച്ച് ഇന്ത്യയില് റോയല് എന്ഫീല്ഡിന്റെ ബൈക്ക് നിര വികസിപ്പിക്കുന്നതിനുള്ള നീക്കത്തിലാണ് കമ്പനി.