Tata Motors to increase prices : വണ്ടി വില കൂട്ടുമെന്ന് പ്രഖ്യാപിച്ചു, പിന്നാലെ ടാറ്റയുടെ ഓഹരിവിലയും കുതിച്ചു
വാഹന വില വര്‍ദ്ധനവ് പ്രഖ്യാപിച്ചതിന് തൊട്ടുപിന്നാലെ ടാറ്റാ മോട്ടോഴ്സിന്റെ ഓഹരവിലയും കൂടി
ദില്ലി: ടാറ്റ മോട്ടോഴ്സ് (Tata Motors) 2022 ജനുവരി മുതൽ വാണിജ്യ വാഹന ശ്രേണിയുടെ വില പരിഷ്‌കരണം പ്രഖ്യാപിച്ചിരിക്കുകയാണ്. വർദ്ധിച്ചുവരുന്ന ഇൻപുട്ട് ചെലവ് നികത്താനാണ് ടാറ്റ മോട്ടോഴ്സ് (Tata Motors) പാസഞ്ചർ കാറുകൾക്ക് 2022-ൽ വില കൂട്ടുന്നത് എന്നാണ് റിപ്പോര്‍ട്ടുകള്‍. ഈ വില വര്‍ദ്ധന പ്രഖ്യാപനം നിലവില്‍ വന്നതോടെ ടാറ്റ മോട്ടോഴ്സിന്റെ ഓഹരികൾ തിങ്കളാഴ്‍ച തുടക്ക വ്യാപാരത്തിൽ രണ്ട് ശതമാനം വർദ്ധിച്ചതായി ഇക്കണോമിക്ക് ടൈംസ് ഓട്ടോ റിപ്പോര്‍ട്ട് ചെയ്യുന്നു. ദേശീയ സ്‌റ്റോക്ക് എക്‌സ്‌ചേഞ്ചിൽ 494.45 രൂപയിൽ നിന്ന് സ്‌ക്രിപ്‌റ്റ് 506.40 രൂപയിലേക്ക് ഉയർന്നു.
ടാറ്റ നെക്‌സോൺ ഹൈബ്രിഡ് പതിപ്പ് പരീക്ഷണയോട്ടത്തില്‍
“ചരക്കുകളുടെയും അസംസ്‍കൃത വസ്‍തുക്കളുടെയും മറ്റ് ഇൻപുട്ട് ചെലവുകളുടെയും വിലകൾ വർദ്ധിച്ചുകൊണ്ടിരിക്കുന്നു. വർധിച്ചുവരുന്ന ചെലവ് സമ്മർദങ്ങൾ നികത്താൻ 2022 ജനുവരി മുതൽ പാസഞ്ചർ വാഹനങ്ങളുടെ വില വർധിപ്പിക്കാൻ കമ്പനി നിർബന്ധിതരാകുന്നു.. ” ടാറ്റ മോട്ടോഴ്സിന്റെ പാസഞ്ചർ വെഹിക്കിൾസ് യൂണിറ്റ് പ്രസിഡന്റ് ശൈലേഷ് ചന്ദ്രയെ ഉദ്ധരിച്ച് പിടിഐ പറഞ്ഞതായി ഇക്കണോമിക്ക് ടൈംസ് ഓട്ടോ റിപ്പോര്‍ട്ട് ചെയ്യുന്നു.
ഇൻപുട്ട് ചെലവുകളുടെ കാഠിന്യത്തിൽ നിന്ന് മാർജിൻ സംരക്ഷിക്കുന്നതിനായി വാണിജ്യ വാഹന വിഭാഗത്തിൽ വില വർധിപ്പിക്കാനുള്ള കമ്പനിയുടെ സമീപകാല തീരുമാനത്തിന്റെ പശ്ചാത്തലത്തിലാണ് ഈ നീക്കം. വില വർദ്ധനയുടെ ഔദ്യോഗിക പ്രഖ്യാപനത്തിന് മുമ്പ്, ടാറ്റ മോട്ടോഴ്സ് അവരുടെ എസ്‌യുവി സഫാരിയുടെ ചില വകഭേദങ്ങളുടെ വിലകൾ ഇതിനകം തന്നെ ഉയർത്തിയിരുന്നു, ട്രിമ്മുകളിൽ ലഭ്യമായ ഓട്ടോമാറ്റിക് വേരിയന്റുകൾക്ക് കമ്പനി 7,000 രൂപ വരെ വില വർധിപ്പിച്ചതായി റിപ്പോർട്ടുകൾ പറയുന്നു. XMA, XTA+, XZA, XZA+ 6-സീറ്റർ, XZA+, XZA+ 6-സീറ്റർ അഡ്വഞ്ചർ എഡിഷൻ, XZA+ അഡ്വഞ്ചർ എഡിഷൻ, XZA+ ഗോൾഡ് 6-സീറ്റർ, XZA+ ഗോൾഡ് എന്നിങ്ങനെയാണ് സഫാരി വേരിയന്‍റുകള്‍.
ടാറ്റ സഫാരി ഓട്ടോമാറ്റിക് വില കൂടും
കഴിഞ്ഞ ഏതാനും ആഴ്ചകളായി, മാരുതി സുസുക്കി, മെഴ്‌സിഡസ് ബെൻസ്, ഔഡി എന്നിവയുൾപ്പെടെ നിരവധി ഓട്ടോ കമ്പനികൾ ആഭ്യന്തരവും ആഗോളവുമായ ഘടകങ്ങളുടെ സംയോജനം ഇൻപുട്ടുകളുടെ വിലയിൽ കുത്തനെ വർദ്ധനവിന് കാരണമായതിനാൽ വില വർദ്ധനവ് പ്രഖ്യാപിച്ചു.
അഹമ്മദാബാദ് ജൻമാർഗ് ലിമിറ്റഡിന് 60 ബസുകൾ വിതരണം ചെയ്‍ത് ടാറ്റ
ജൂലൈ-സെപ്റ്റംബർ പാദത്തിൽ കമ്പനി 4,441 കോടി രൂപയുടെ ഏകീകൃത വാർഷിക അറ്റാദായമാണ് റിപ്പോർട്ട് ചെയ്‍തത്. കഴിഞ്ഞ വർഷം ഇതേ കാലയളവിൽ 314 കോടി രൂപയും നടപ്പു സാമ്പത്തിക വർഷത്തിന്റെ ആദ്യ പാദത്തിൽ 4,451 കോടി രൂപയുമാണ് ടാറ്റ മോട്ടോഴ്‌സിന് നഷ്‍ടമായത്. ജൂലൈ-സെപ്റ്റംബറിൽ, പ്രവർത്തനങ്ങളിൽ നിന്നുള്ള വരുമാനം മുൻ സാമ്പത്തിക വർഷത്തിന്റെ ആദ്യ പാദത്തിൽ 53,530 കോടി രൂപയിൽ നിന്ന് 14 ശതമാനം ഉയർന്ന് 61,378 കോടി രൂപയായി എന്നാണ് കണക്കുകള്‍.
വാണിജ്യ വാഹന ബിസിനസിൽ വമ്പന്‍ നിക്ഷേപവുമായി ടാറ്റ
അതേസമയം രാജ്യത്തെ മറ്റ് പ്രമുഖ വാര്ഹ നിര്‍മ്മാതാക്കളും 2022 ജനുവരി മുതല്‍ വില വര്‍ദ്ധനയ്ക്ക് തയ്യാറെടുക്കുകയാണ്. ചരക്ക് വിലയിലെ വർദ്ധനവ് മൂലം ഇൻപുട്ട് ചെലവിനെ ഗുരുതരമായി ബാധിക്കുമെന്നതിനാൽ ഹോണ്ട കാർസ് ഇന്ത്യയും സമീപഭാവിയിൽ വില വർദ്ധന പരിഗണിക്കുന്നുണ്ട്. ഇക്കാര്യത്തെക്കുറിച്ച് പഠിച്ചുകൊണ്ടിരിക്കുകയാണെന്ന് കമ്പനിയുടെ വക്താവ് പിടിഐയോട് നേരത്തെ പറഞ്ഞു.
2022 ജനുവരി മുതൽ മോഡൽ ശ്രേണിയില്‍ ഉടനീളം ഗണ്യമായ വില വർദ്ധനവ് പ്രതീക്ഷിക്കുന്നതായി ഫ്രഞ്ച് വാഹന നിര്‍മ്മാതാക്കളായ റെനോ ഇന്ത്യയും പറഞ്ഞു. ക്വിഡ്, ട്രൈബർ, കിഗർ തുടങ്ങിയ മോഡലുകളാണ് ഇന്ത്യൻ വിപണിയിൽ വിൽക്കുന്നത്.
രാജ്യത്തെ ഒന്നാമത്തെ വാഹന നിര്‍മ്മാതാക്കളായ മാരുതി സുസുക്കി, ആഡംബര വാഹന നിർമാതാക്കളായ ഔഡി, മെഴ്‌സിഡസ് ബെൻസ് തുടങ്ങിയ ചില കാർ നിർമ്മാതാക്കളും അടുത്ത മാസം മുതൽ വാഹന വിലയിൽ വർധനവ് പ്രഖ്യാപിച്ചിട്ടുണ്ട്.
രാജ്യത്തെ ഏറ്റവും വലിയ കാർ നിർമ്മാതാക്കളായ മാരുതി സുസുക്കി 2022 ജനുവരിയിൽ ആസൂത്രണം ചെയ്‍തിരിക്കുന്ന വില വർദ്ധന വ്യത്യസ്‍ത മോഡലുകൾക്ക് അനുസരിച്ച് വ്യത്യാസപ്പെടും എന്നാണ് റിപ്പോര്‍ട്ടുകള്‍. അതേസമയം ഫീച്ചർ മെച്ചപ്പെടുത്തലും ഇൻപുട്ട് ചെലവും കാരണം തിരഞ്ഞെടുത്ത മോഡലുകളിൽ രണ്ട് ശതമാനം വരെ വർദ്ധനവ് ഉണ്ടാകുമെന്ന് മെഴ്‌സിഡസ് ബെൻസ് അറിയിച്ചു. വർദ്ധിച്ചുവരുന്ന ഇൻപുട്ടും പ്രവർത്തന ചെലവും കാരണം ഔഡി അതിന്റെ മുഴുവൻ മോഡൽ ശ്രേണിയിലും മൂന്നു ശതമാനം വരെ വില വർദ്ധിപ്പിക്കാനാണ് തയ്യാറെടുക്കുന്നത്.
