ആഗോള വിപണിയിലെ വെല്ലുവിളികളെ നേരിടാൻ ജാപ്പനീസ് വാഹന ഭീമനായ ഹോണ്ട, ടാറ്റ ടെക്നോളജീസുമായി സഹകരിക്കുന്നു. ഈ കൂട്ടുകെട്ടിലൂടെ പെട്രോൾ, ഹൈബ്രിഡ്, ഇലക്ട്രിക് വാഹനങ്ങൾക്ക് അനുയോജ്യമായ ഒരു പുതിയ മോഡുലാർ പ്ലാറ്റ്ഫോം വികസിപ്പിക്കാനാണ് ലക്ഷ്യമിടുന്നത്. ഇത് വാഹന വികസന ചെലവ് കുറയ്ക്കാനും പുതിയ മോഡലുകൾ വേഗത്തിൽ വിപണിയിലെത്തിക്കാനും ഹോണ്ടയെ സഹായിക്കും.
ആഗോള വാഹന വിപണിയിൽ കടുത്ത വെല്ലുവിളികൾ നേരിടുന്ന ജാപ്പനീസ് വാഹന നിർമാതാക്കളായ ഹോണ്ട പുതിയ നീക്കവുമായി രംഗത്ത്. ഭാവിയിലെ വാഹനങ്ങൾക്കായി പുതിയൊരു വാഹന പ്ലാറ്റ്ഫോം വികസിപ്പിക്കുന്നതിനായി ഹോണ്ട ടാറ്റ ടെക്നോളജീസുമായി സഹകരിക്കുന്നതായി റിപ്പോർട്ട്. ചൈനയിലെ വൈദ്യുത വാഹന വിപണിയിലെ കടുത്ത മത്സരം, അമേരിക്കയിലെ ഇറക്കുമതി തീരുവ, വടക്കേ അമേരിക്കയിലെ മാറിക്കൊണ്ടിരിക്കുന്ന വൈദ്യുത വാഹന നയങ്ങൾ എന്നിവ ഹോണ്ടയ്ക്ക് വെല്ലുവിളി സൃഷ്ടിക്കുന്ന സാഹചര്യത്തിലാണ് പുതിയ നീക്കം.
ഇന്ത്യൻ വിപണിയിലും ഹോണ്ടയ്ക്ക് മത്സരം ശക്തമാകുകയാണ്. വിവിധ വാഹന വിഭാഗങ്ങളിൽ ആഭ്യന്തര, ആഗോള വാഹന നിർമാതാക്കൾ കൂടുതൽ സജീവമായതോടെ വിപണിയിലെ സ്ഥാനം ശക്തിപ്പെടുത്തുന്നതിനുള്ള നടപടികളുടെ ഭാഗമായാണ് പുതിയ സഹകരണം വിലയിരുത്തപ്പെടുന്നത്.
പുതിയ വാഹന പ്ലാറ്റ്ഫോം വികസിപ്പിക്കാൻ ടാറ്റ ടെക്നോളജീസ്
ആഗോള വാഹന നിർമാതാക്കൾക്കായി ഉൽപ്പന്ന എൻജിനീയറിങ്, ഡിജിറ്റൽ പരിവർത്തന സേവനങ്ങൾ നൽകുന്ന പ്രമുഖ സ്ഥാപനമാണ് ടാറ്റ ടെക്നോളജീസ്. ഹോണ്ടയ്ക്കായി പുതിയ മോഡുലാർ വാഹന ഘടന വികസിപ്പിക്കുന്നതിന്റെ പ്രധാന ചുമതല ടാറ്റ ടെക്നോളജീസിനായിരിക്കുമെന്നാണ് റിപ്പോർട്ടുകൾ. ഒന്നിലധികം വാഹന രൂപകൽപ്പനകൾക്കും വിവിധ എൻജിൻ സംവിധാനങ്ങൾക്കും ഉപയോഗിക്കാവുന്ന തരത്തിലായിരിക്കും പുതിയ പ്ലാറ്റ്ഫോം വികസിപ്പിക്കുകയെന്നാണ് സൂചന.
Related Articles
പെട്രോൾ, ഹൈബ്രിഡ്, വൈദ്യുത വാഹനങ്ങൾക്കും ഉപയോഗിക്കാം
പെട്രോൾ, ഹൈബ്രിഡ്, വൈദ്യുത വാഹനങ്ങൾക്കെല്ലാം അനുയോജ്യമായ രീതിയിലായിരിക്കും പുതിയ പ്ലാറ്റ്ഫോം രൂപകൽപ്പന ചെയ്യുകയെന്നാണ് റിപ്പോർട്ട്. ആഗോള വാഹന വ്യവസായം കൂടുതൽ പരിസ്ഥിതി സൗഹൃദമായ ഗതാഗത സംവിധാനങ്ങളിലേക്ക് മാറുന്ന സാഹചര്യത്തിൽ ഇത്തരമൊരു വഴക്കമുള്ള പ്ലാറ്റ്ഫോം ഹോണ്ടയ്ക്ക് നിർണായകമാകും. ഇന്ത്യ ഉൾപ്പെടെയുള്ള പ്രധാന വിപണികളിൽ വൈദ്യുത വാഹനങ്ങളിലേക്കുള്ള മാറ്റം വേഗത്തിലാക്കാനും പുതിയ വാഹന ഘടന സഹായിക്കുമെന്നാണ് വിലയിരുത്തൽ.
വാഹന വികസന ചെലവ് കുറയ്ക്കാം
ഹോണ്ടയും ടാറ്റ ടെക്നോളജീസും തമ്മിലുള്ള സഹകരണം വാഹന വികസന ചെലവ് കുറയ്ക്കുന്നതിനും പുതിയ മോഡലുകൾ വിപണിയിലെത്തിക്കുന്നതിനുള്ള സമയം ചുരുക്കുന്നതിനും സഹായിക്കുമെന്നാണ് പ്രതീക്ഷ. എൻജിനീയറിങ് മേഖലയിലെ ഹോണ്ടയുടെ ജോലിഭാരവും ഇതുവഴി കുറയ്ക്കാനാകും. അതേസമയം, ആഗോള വാഹന നിർമാണ രംഗത്ത് ഇന്ത്യയുടെ എൻജിനീയറിങ്, വാഹന വികസന ശേഷികൾ വളരുന്നതിന്റെ മറ്റൊരു ഉദാഹരണം കൂടിയാണ് ഈ സഹകരണം.
ഏതൊക്കെ ഹോണ്ട മോഡലുകൾക്ക് പുതിയ പ്ലാറ്റ്ഫോം?
പുതിയ ടാറ്റ ടെക്നോളജീസ് പ്ലാറ്റ്ഫോം ഉപയോഗിക്കുന്ന ഹോണ്ട മോഡലുകൾ ഏതൊക്കെയാണെന്ന കാര്യത്തിൽ നിലവിൽ ഔദ്യോഗിക സ്ഥിരീകരണമില്ല. നേരത്തെയുള്ള റിപ്പോർട്ടുകൾ പ്രകാരം ഹോണ്ടയുടെ വരാനിരിക്കുന്ന 7 സീറ്റർ എസ്യുവി, കോംപാക്ട് എസ്യുവി, അടുത്ത തലമുറ സിറ്റി സെഡാൻ തുടങ്ങിയ മോഡലുകൾ കമ്പനിയുടെ പുതിയ പി.എഫ്.2 എന്ന പേരിൽ അറിയപ്പെടുന്ന പ്ലാറ്റ്ഫോമിനെ അടിസ്ഥാനമാക്കിയേക്കുമെന്നാണ് സൂചന. ചെറുതും ഇടത്തരവുമായ വാഹനങ്ങൾക്കായി വികസിപ്പിക്കുന്ന ഈ മോഡുലാർ പ്ലാറ്റ്ഫോം ഹൈബ്രിഡ് സാങ്കേതികവിദ്യയ്ക്ക് അനുയോജ്യമായ രീതിയിലായിരിക്കുമെന്നും റിപ്പോർട്ടുകളുണ്ട്. ഹോണ്ടയുടെ നിലവിലെ ഹൈബ്രിഡ് പ്ലാറ്റ്ഫോമിനെക്കാൾ ഏകദേശം 90 കിലോഗ്രാം ഭാരം കുറവായിരിക്കും പുതിയ ഘടനയെന്നും അവകാശപ്പെടുന്നു.
ടാറ്റ ടെക്നോളജീസ് വികസിപ്പിക്കുന്ന പുതിയ മോഡുലാർ പ്ലാറ്റ്ഫോം ഭാവിയിൽ ഹോണ്ടയുടെ പി.എഫ്.2 പ്ലാറ്റ്ഫോമിന് പകരമാകുമോ എന്നത് വ്യക്തമല്ല. ഇക്കാര്യത്തിൽ ഹോണ്ടയുടെ ഭാഗത്തുനിന്ന് ഇതുവരെ ഔദ്യോഗിക സ്ഥിരീകരണം ഉണ്ടായിട്ടില്ല.
