ലംബോർഗിനി തങ്ങളുടെ ഫ്ലാഗ്ഷിപ്പ് ഹൈബ്രിഡ് സൂപ്പർകാറായ റെവൽറ്റോയുടെ കൂടുതൽ കരുത്തുറ്റ എസ്വി പതിപ്പ് അവതരിപ്പിച്ചു. 1,065 എച്ച്പി കരുത്തും മെച്ചപ്പെടുത്തിയ എയറോഡൈനാമിക്സുമുള്ള ഈ ട്രാക്ക്-ഫോക്കസ്ഡ് മോഡലിന്റെ 1,963 യൂണിറ്റുകൾ മാത്രമാണ് നിർമിക്കുക. പുതിയ പൈലോട്ട ഡ്രൈവ് മോഡ്, കാർബൺ-സെറാമിക് ബ്രേക്കുകൾ, ആക്രമണാത്മകമായ ഡിസൈൻ എന്നിവയാണ് പ്രധാന ആകർഷണങ്ങൾ.
ഫ്ലാഗ്ഷിപ്പ് വി12 ഹൈബ്രിഡ് സൂപ്പർകാർ റെവൽറ്റോയുടെ കൂടുതൽ കരുത്തുറ്റതും ട്രാക്ക് പ്രകടനത്തിന് പ്രാധാന്യം നൽകുന്നതുമായ എസ്വി പതിപ്പ് അവതരിപ്പിച്ച് ലംബോർഗിനി. റെവൽറ്റോ സൂപ്പർ വെലോസ് എന്ന പേരിലെത്തുന്ന പുതിയ സൂപ്പർകാറിന്റെ 1,963 യൂണിറ്റുകൾ മാത്രമാണ് കമ്പനി നിർമിക്കുക. പ്രത്യേക ഉപഭോക്താക്കളെയും കാർ കളക്ടർമാരെയും ലക്ഷ്യമിട്ടുള്ള ഈ മോഡലിൽ സ്റ്റാൻഡേർഡ് റെവൽറ്റോയേക്കാൾ കൂടുതൽ കരുത്തും കുറഞ്ഞ ഭാരവും മെച്ചപ്പെടുത്തിയ എയറോഡൈനാമിക്സും ലഭിക്കും.
1,065 എച്ച്പി കരുത്ത്
6.5 ലിറ്റർ നാച്ചുറലി ആസ്പിറേറ്റഡ് വി12 എൻജിനാണ് റെവൽറ്റോ എസ്വിയിലും ഉപയോഗിക്കുന്നത്. 9,500 ആർപിഎം വരെ 825 എച്ച്പി കരുത്ത് ഈ എൻജിൻ നൽകും. മൂന്ന് ഇലക്ട്രിക് മോട്ടോറുകളുടെ സംയുക്ത ശേഷി 190 എച്ച്പിയിൽ നിന്ന് 299 എച്ച്പിയായി ഉയർത്തിയിട്ടുണ്ട്. ഇതോടെ വാഹനത്തിന്റെ ആകെ കരുത്ത് 1,065 എച്ച്പിയായി. സാധാരണ റെവൽറ്റോയേക്കാൾ 50 എച്ച്പി അധിക കരുത്താണ് എസ്വിക്ക് ലഭിക്കുന്നത്. 8 സ്പീഡ് ഡ്യുവൽ ക്ലച്ച് ഓട്ടോമാറ്റിക് ഗിയർബോക്സും ഓൾവീൽ ഡ്രൈവ് സംവിധാനവും തുടരുന്നു.
6.7 സെക്കൻഡിൽ 200 കിലോമീറ്റർ
പെർഫോമൻസിന്റെ കാര്യത്തിൽ റെവൽറ്റോ എസ്വി ഞെട്ടിക്കുന്ന വേഗമാണ് നൽകുന്നത്. 0ൽ നിന്ന് 100 കിലോമീറ്റർ വേഗതയിലെത്താൻ വെറും 2.4 സെക്കൻഡ് മതി. 200 കിലോമീറ്റർ വേഗത കൈവരിക്കാൻ 6.7 സെക്കൻഡ് മാത്രം മതിയെന്നാണ് ലംബോർഗിനിയുടെ അവകാശവാദം. പരമാവധി വേഗത മണിക്കൂറിൽ 345 കിലോമീറ്ററിൽ കൂടുതലാണ്.
Related Articles
പുതിയ പൈലോട്ട ഡ്രൈവ് മോഡ്
മോട്ടോർസ്പോർട്ടിൽ നിന്ന് പ്രചോദനം ഉൾക്കൊണ്ട പുതിയ പൈലോട്ട ഡ്രൈവ് മോഡാണ് റെവൽറ്റോ എസ്വിയിലെ പ്രധാന മാറ്റങ്ങളിലൊന്ന്. 5 ഘട്ട ട്രാക്ഷൻ കൺട്രോൾ സംവിധാനവും വാഹനത്തിലുണ്ട്. ജി.ടി.3 റേസിങ് കാറുകളിൽ നിന്ന് പ്രചോദനം ഉൾക്കൊണ്ട മാനുവലായി ക്രമീകരിക്കാവുന്ന ഡാംപറുകളും ചേസിസിൽ നൽകിയിട്ടുണ്ട്. ഈ പരിഷ്കരണങ്ങളിലൂടെ വാഹനത്തിന്റെ ചടുലത 17 ശതമാനവും ലാറ്ററൽ ഗ്രിപ്പ് 10 ശതമാനവും മെച്ചപ്പെട്ടതായി ലംബോർഗിനി അവകാശപ്പെടുന്നു.
പുതിയ കാർബൺ-സെറാമിക് ബ്രേക്കുകൾ
ട്രാക്കിലെ പ്രകടനം മെച്ചപ്പെടുത്തുന്നതിനായി പുതിയ സി.സി.എം-ആർ കാർബൺ-സെറാമിക് ബ്രേക്കിങ് സംവിധാനവും വാഹനത്തിലുണ്ട്. മുന്നിൽ 420 മില്ലിമീറ്റർ ഡിസ്കുകളും പിന്നിൽ 410 മില്ലിമീറ്റർ ഡിസ്കുകളുമാണ് ഉപയോഗിക്കുന്നത്. ഉയർന്ന വേഗതയിൽ വാഹനത്തെ നിയന്ത്രിക്കുന്നതിൽ ഈ ബ്രേക്കിങ് സംവിധാനത്തിന് നിർണായക പങ്കുണ്ട്.
കൂടുതൽ ആക്രമണാത്മക രൂപം
സാധാരണ റെവൽറ്റോയേക്കാൾ കൂടുതൽ ആക്രമണാത്മകമായ രൂപകൽപ്പനയാണ് എസ്വിക്ക് നൽകിയിരിക്കുന്നത്. ചുവന്ന ആക്സന്റുകളുള്ള പുതിയ ഫ്രണ്ട് ഡിഫ്യൂസർ, പുതുക്കിയ റിയർ ഡിഫ്യൂസർ, വലിയ ഫിക്സഡ് റിയർ വിങ് എന്നിവ പ്രധാന മാറ്റങ്ങളാണ്. പ്രത്യേക ലിവറി, എസ്വി ബാഡ്ജിങ്, കോൺട്രാസ്റ്റ് ആക്സന്റുകൾ, നിരവധി കാർബൺ ഫൈബർ ഘടകങ്ങൾ എന്നിവയും വാഹനത്തിന്റെ രൂപഭാവത്തിന് കൂടുതൽ സ്പോർട്ടി ലുക്ക് നൽകുന്നു. 20 ഇഞ്ച് മുൻ അലോയ് വീലുകളും 21 ഇഞ്ച് പിൻ അലോയ് വീലുകളുമാണ് നൽകിയിരിക്കുന്നത്. ഭാരം കുറഞ്ഞ സെന്റർ ലോക്ക് വീലുകൾ പ്രത്യേകം രൂപകൽപ്പന ചെയ്തവയാണ്. ഇവയിൽ ബ്രിഡ്ജ്സ്റ്റോൺ പൊട്ടൻസ റേസ് ആർ ടയറുകളാണ് ഘടിപ്പിച്ചിരിക്കുന്നത്.
റേസിങ് സീറ്റുകളുമായി അകത്തളം
അടിസ്ഥാന ഇന്റീരിയർ ലേഔട്ട് സാധാരണ റെവൽറ്റോയോട് സാമ്യമുള്ളതാണെങ്കിലും എസ്വി പതിപ്പിൽ കൂടുതൽ സ്പോർട്ടി അന്തരീക്ഷമാണ് ഒരുക്കിയിരിക്കുന്നത്. പുതിയ റേസിങ് ബക്കറ്റ് സീറ്റുകൾ, എസ്വി സ്പെഷ്യൽ ബാഡ്ജിങ്, കൂടുതൽ അപ്ഹോൾസ്റ്ററി ഓപ്ഷനുകൾ, വിവിധ നിറങ്ങളിലുള്ള ഇന്റീരിയർ കോമ്പിനേഷനുകൾ എന്നിവ ലഭിക്കും. കൂടുതൽ കരുത്ത്, കുറഞ്ഞ ഭാരം, മെച്ചപ്പെടുത്തിയ എയറോഡൈനാമിക്സ്, മികച്ച ഗ്രിപ്പ് എന്നിവയിലൂടെ സാധാരണ റെവൽറ്റോയേക്കാൾ കൂടുതൽ ട്രാക്ക് കേന്ദ്രീകൃതമായ ഡ്രൈവിങ് അനുഭവം നൽകുകയാണ് പുതിയ റെവൽറ്റോ എസ്വിയുടെ ലക്ഷ്യം. വെറും 1,963 യൂണിറ്റുകൾ മാത്രം നിർമിക്കുന്നതിനാൽ, പ്രകടനത്തിനൊപ്പം അപൂർവതയും ഈ ലംബോർഗിനി സൂപ്പർകാറിന്റെ പ്രധാന പ്രത്യേകതയായിരിക്കും.
