ഇന്ത്യൻ വാഹന വിപണിയിൽ കൂടുതൽ കരുത്തുറ്റ സാന്നിധ്യം ഉറപ്പാക്കാൻ 40,000 കോടി രൂപയുടെ വൻ നിക്ഷേപത്തിനൊരുങ്ങി ടാറ്റ മോട്ടോഴ്‌സ്. 2028 സാമ്പത്തിക വർഷത്തോടെ പ്രതിമാസം ഒരു ലക്ഷം കാറുകൾ നിർമ്മിക്കാനും പുതിയ മോഡലുകൾ പുറത്തിറക്കാനുമാണ് കമ്പനി ലക്ഷ്യമിടുന്നത്. ഇതിലൂടെ 2031-ഓടെ വിപണിയുടെ 20 ശതമാനം സ്വന്തമാക്കാനും ടാറ്റ പദ്ധതിയിടുന്നു.
ഇന്ത്യൻ വാഹന വിപണിയിൽ കൂടുതൽ കരുത്തുറ്റ സാന്നിധ്യം ഉറപ്പാക്കാൻ വൻ പദ്ധതികളുമായി ടാറ്റ മോട്ടോഴ്‌സ്. പാസഞ്ചർ വാഹനങ്ങളുടെ ഉൽപ്പാദന ശേഷി ഗണ്യമായി ഉയർത്താനാണ് കമ്പനി ഒരുങ്ങുന്നത്. ഇതിനായി വിതരണക്കാരോടും ഉൽപ്പാദന ശേഷി വർധിപ്പിക്കാൻ ടാറ്റ മോട്ടോഴ്‌സ് ആവശ്യപ്പെട്ടിട്ടുണ്ട്. 2028 സാമ്പത്തിക വർഷം മുതൽ പ്രതിമാസം 100,000 പാസഞ്ചർ വാഹനങ്ങൾ നിർമ്മിക്കാനാണ് കമ്പനിയുടെ ലക്ഷ്യമെന്നാണ് റിപ്പോർട്ട്. നിലവിൽ ടാറ്റ കാറുകൾക്കുള്ള ആവശ്യം കമ്പനിയുടെ ഉൽപ്പാദന ശേഷിയേക്കാൾ കൂടുതലായതിനാലാണ് ഉൽപ്പാദനം വർധിപ്പിക്കാനുള്ള നീക്കം.
പ്രതിമാസ ഉൽപ്പാദനം 75,000 കാറുകൾ
കഴിഞ്ഞ മൂന്ന് മാസമായി ടാറ്റ മോട്ടോഴ്‌സ് പ്രതിമാസം ഏകദേശം 75,000 കാറുകളാണ് നിർമ്മിക്കുന്നതെന്നാണ് റിപ്പോർട്ട്. എന്നാൽ ചില വിതരണക്കാരുടെ പരിമിതമായ ഉൽപ്പാദന ശേഷി കാരണം വാഹന നിർമ്മാണം പൂർണ ശേഷിയിൽ നടത്താൻ കഴിയാത്ത സാഹചര്യമുണ്ട്. ടാറ്റ മോട്ടോഴ്‌സ് കാറുകൾക്കുള്ള നിലവിലെ ആവശ്യം പ്രതിമാസ വിൽപ്പനയേക്കാൾ ഏകദേശം 7,000 മുതൽ 8,000 യൂണിറ്റ് വരെ കൂടുതലാണെന്നാണ് റിപ്പോർട്ടുകൾ. 2027 സാമ്പത്തിക വർഷത്തിന്റെ ആദ്യ പകുതിയിൽ കമ്പനി പ്രതിമാസം ശരാശരി 65,000 പാസഞ്ചർ വാഹനങ്ങളാണ് വിറ്റത്. ഇതിന്റെ അടിസ്ഥാനത്തിൽ പ്രതിമാസം 100,000 വാഹനങ്ങൾ നിർമ്മിക്കുക എന്നത് നിലവിലെ ശരാശരി വിൽപ്പനയേക്കാൾ ഏകദേശം 50% കൂടുതലായിരിക്കും. പൂനെയിൽ കഴിഞ്ഞ മാസം നടന്ന വിതരണക്കാരുടെ സമ്മേളനത്തിലാണ് കമ്പനി ശേഷി വർധിപ്പിക്കാനുള്ള പദ്ധതികൾ വ്യക്തമാക്കിയത്.
40,000 കോടി രൂപ വരെ നിക്ഷേപം
2027 സാമ്പത്തിക വർഷം മുതൽ 2031 സാമ്പത്തിക വർഷം വരെയുള്ള കാലയളവിൽ പാസഞ്ചർ വാഹന ബിസിനസിൽ 37,500 കോടി രൂപ മുതൽ 40,000 കോടി രൂപ വരെ നിക്ഷേപിക്കാനാണ് ടാറ്റ മോട്ടോഴ്‌സിന്റെ പദ്ധതി. 2031 സാമ്പത്തിക വർഷത്തോടെ ഇന്ത്യയിലെ പാസഞ്ചർ വാഹന വിപണിയിൽ 20% വിഹിതം നേടുകയാണ് കമ്പനിയുടെ പ്രധാന ലക്ഷ്യം. ഇതോടൊപ്പം പ്രതിവർഷം 1.2 ദശലക്ഷത്തിലധികം കാറുകൾ വിൽക്കാനും ടാറ്റ മോട്ടോഴ്‌സ് ലക്ഷ്യമിടുന്നു. പദ്ധതികൾ കൃത്യമായി നടപ്പായാൽ 2031 സാമ്പത്തിക വർഷത്തോടെ കമ്പനിയുടെ ഉൽപ്പാദന ശേഷി പ്രതിമാസം 1.3 ലക്ഷം യൂണിറ്റിലേക്ക് ഉയരാനും സാധ്യതയുണ്ട്.
Related Articles
പുതിയ മോഡലുകളുമായി ടാറ്റ
ഉൽപ്പാദന ശേഷി വർധിപ്പിക്കുന്നതിനൊപ്പം പുതിയ മോഡലുകളിലും ടാറ്റ മോട്ടോഴ്‌സ് ശ്രദ്ധ കേന്ദ്രീകരിക്കുന്നുണ്ട്. 2027ൽ പുതുതലമുറ നെക്‌സോൺ വിപണിയിലെത്തിക്കാനാണ് കമ്പനി ഒരുങ്ങുന്നത്. ഈ വർഷം അവസാനത്തോടെ അവിന്യ സീരീസിൽ നിന്നുള്ള വാഹനങ്ങളും അവതരിപ്പിച്ചേക്കുമെന്നാണ് റിപ്പോർട്ടുകൾ. 2031 സാമ്പത്തിക വർഷത്തോടെ 6 പുതിയ മോഡലുകൾ കൂടി പോർട്ട്‌ഫോളിയോയിലേക്ക് എത്തിക്കാനും ടാറ്റ മോട്ടോഴ്‌സ് പദ്ധതിയിടുന്നു. ഇതോടെ കമ്പനിയുടെ മൊത്തം മോഡൽ നിര 15 ആയി ഉയരും. പുതിയ എസ്‌യുവികൾക്കും ഇലക്ട്രിക് വാഹനങ്ങൾക്കും പുറമെ വിവിധ വിഭാഗങ്ങളിലേക്കും സാന്നിധ്യം വ്യാപിപ്പിക്കാനാണ് ടാറ്റയുടെ നീക്കം.
2031ഓടെ വിപണി 64 ലക്ഷം യൂണിറ്റാകുമെന്ന് പ്രതീക്ഷ
ഇന്ത്യയിലെ പാസഞ്ചർ വാഹന വിപണി 2026 സാമ്പത്തിക വർഷത്തിലെ 4.7 ദശലക്ഷം യൂണിറ്റിൽ നിന്ന് 2031 സാമ്പത്തിക വർഷത്തോടെ 6.4 ദശലക്ഷം യൂണിറ്റായി വളരുമെന്നാണ് ടാറ്റ മോട്ടോഴ്‌സിന്റെ വിലയിരുത്തൽ. വിപണിയിലെ പ്രതീക്ഷിക്കുന്ന വളർച്ചയും പുതിയ ഉൽപ്പന്ന പദ്ധതികളും കണക്കിലെടുത്ത് ഉൽപ്പാദന, വിതരണ ശൃംഖല ശേഷികൾ തുടർച്ചയായി വിലയിരുത്തുകയാണെന്ന് കമ്പനി വ്യക്തമാക്കി. അതേസമയം, കൃത്യമായ ഉൽപ്പാദന കണക്കുകളെക്കുറിച്ചോ നിർദിഷ്ട വിതരണക്കാരുടെ ശേഷിയെക്കുറിച്ചോ പ്രതികരിക്കാൻ ടാറ്റ മോട്ടോഴ്‌സ് തയ്യാറായിട്ടില്ല. എന്നാൽ ഉൽപ്പാദന ശേഷി വർധിപ്പിക്കാനുള്ള കമ്പനിയുടെ നീക്കം ഇന്ത്യൻ വാഹന വിപണിയിൽ ടാറ്റയുടെ അടുത്ത ഘട്ട വളർച്ചയ്ക്ക് നിർണായകമാകുമെന്നാണ് വിലയിരുത്തൽ.
