Royal Enfield : റോയൽ എൻഫീൽഡ് സൂപ്പർ മെറ്റിയർ 650 വീണ്ടും പരീക്ഷണത്തില്‍
ഇപ്പോഴിതാ ഒരിക്കൽ കൂടി സൂപ്പർ മെറ്റിയർ 650നെ റോഡ് ടെസ്റ്റുകൾക്ക് വിധേയമാക്കുന്നത് ക്യാമറയില്‍ പതിഞ്ഞതായി ബൈക്ക് വെയ്‍ല്‍ റിപ്പോര്‍ട്ട് ചെയ്യുന്നു.
ഐക്കണിക്ക് ഇരചക്ര വാഹന ബ്രാന്‍ഡായ റോയൽ എൻഫീൽഡ് (Royal Enfield) അതിന്റെ 650 സിസി പ്ലാറ്റ്‌ഫോമിനെ അടിസ്ഥാനമാക്കി ഒന്നിലധികം പുതിയ മോട്ടോർസൈക്കിളുകൾ പുറത്തിറക്കാൻ ഒരുങ്ങുകയാണ്. ഇവയിൽ ഏറെ പ്രതീക്ഷയോടെ കാത്തിരിക്കുന്ന ഓഫറുകളിലൊന്നാണ് സൂപ്പർ മെറ്റിയർ 650 ക്രൂയിസർ. വാഹനം ഇന്ത്യന്‍ നിരത്തുകളില്‍ പരീക്ഷണത്തിലാണ്. ഇപ്പോഴിതാ ഒരിക്കൽ കൂടി സൂപ്പർ മെറ്റിയർ 650നെ റോഡ് ടെസ്റ്റുകൾക്ക് വിധേയമാക്കുന്നത് ക്യാമറയില്‍ പതിഞ്ഞതായി ബൈക്ക് വെയ്‍ല്‍ റിപ്പോര്‍ട്ട് ചെയ്യുന്നു.
തുടർച്ചയായ ഓരോ സ്പൈ ഷോട്ടിലും, സൂപ്പർ മെറ്റിയോറിന്റെ പരീക്ഷണവാഹനം നിർമ്മാണ ഘട്ടത്തോട് അടുക്കുന്നതായി തോന്നുന്നു. അടുത്തിടെ പുറത്തുവന്ന ചിത്രങ്ങളിലെ മോഡലും വ്യത്യസ്‍തമല്ല. ബ്ലാക്ക്-ഔട്ട് എഞ്ചിൻ കേസിംഗ് മുതൽ ക്രോം-ഫിനിഷ്ഡ് എക്‌സ്‌ഹോസ്റ്റ് കാനിസ്റ്റർ വരെ, എല്ലാ ഘടകങ്ങളും പൂർത്തിയായ രൂപത്തിൽ കാണപ്പെടുന്നു. ഒരു ക്രൂയിസറില്‍ സാധാരണ, റൈഡർ തികച്ചും വിശ്രമിക്കുന്ന, ടൂറിംഗിന് അനുയോജ്യമായ ഭാവത്തിൽ ഇരിക്കുന്നതായി കാണാം. പിൻവലിച്ച ഹാൻഡിൽബാർ, ഫോർവേഡ്-സെറ്റ് ഫൂട്ട്പെഗുകൾ, റൂമി സ്പ്ലിറ്റ്-ടൈപ്പ് സീറ്റ് എന്നിവ മോട്ടോർസൈക്കിളിന് ഉണ്ട്.
നിലവിലുള്ള മോഡലുകളിലെ പരമ്പരാഗത ടെലിസ്‌കോപ്പിക് യൂണിറ്റുകളിൽ നിന്ന് വ്യത്യസ്തമായി, മുൻവശത്ത് തലകീഴായി ഫോർക്കുകൾ അവതരിപ്പിക്കുന്ന ആദ്യത്തെ റോയൽ എൻഫീൽഡ് ഓഫറായിരിക്കും സൂപ്പർ മെറ്റിയർ 650. ഈ ബൈക്കിന്, ഇന്റർസെപ്റ്റർ 650, കോണ്ടിനെന്റൽ GT 650 എന്നിവയിലെ 648cc, പാരലൽ-ട്വിൻ എഞ്ചിൻ നിലനിർത്തും. എന്നിരുന്നാലും, ട്യൂണിന്റെ അവസ്ഥ അല്പം വ്യത്യസ്‍തമായിരിക്കും. നിലവിലുള്ള മെറ്റിയോര് 350-ന് സമാനമായി, സൂപ്പർ മെറ്റിയോറിന് RE-യുടെ ട്രിപ്പർ നാവിഗേഷൻ സംവിധാനവും ലഭിക്കും.
വിലയുടെ കാര്യത്തിൽ, ഇന്റർസെപ്റ്ററിനും കോണ്ടിനെന്റൽ ജിടിക്കും മുകളിലായിരിക്കും സൂപ്പർ മെറ്റിയർ 650 ന്റെ സ്ഥാനം. കവാസാക്കി വൾക്കൻ എസ്, ബെനെല്ലി 502 സി എന്നിവയ്‌ക്കെതിരെ ഈ മോഡല്‍ മത്സരിക്കും.
അതേസമയം കമ്പനിയെ സംബന്ധിച്ച മറ്റ് വാര്‍ത്തകള്‍ പരിശോധിക്കുമ്പോള്‍ തങ്ങളുടെ ചില മുൻനിര മോഡലുകൾക്ക് ഇന്ത്യയിൽ വില വർധിപ്പിച്ചിരിക്കുകയാണ് റോയല്‍ എന്‍ഫീല്‍ഡ്. ക്ലാസിക് 350, മെറ്റിയർ 350, ഹിമാലയൻ മോട്ടോർസൈക്കിളുകൾ തുടങ്ങിയ ജനപ്രിയ മോഡലുകൾക്കും ഈ വില വര്‍ദ്ധനവ് ബാധകമാണ്. പുതുക്കിയ വിലകൾ ജനുവരി മുതൽ പ്രാബല്യത്തിൽ വരും.
ഏറ്റവും പുതിയ വർദ്ധനകൾ അനുസരിച്ച്, ബ്രാൻഡിൽ നിന്ന് ഏറ്റവും കൂടുതൽ വിറ്റഴിക്കപ്പെടുന്ന മോട്ടോർസൈക്കിളായ ക്ലാസിക് 350 മോഡലിന് അതിന്റെ ശ്രേണിയിലുടനീളം ഏറ്റവും കുറഞ്ഞ വർദ്ധനവ് ലഭിച്ചു. ഏറ്റവും വലിയ വർദ്ധനവ്, അതായത് 4,000 രൂപയിൽ കൂടുതൽ ഉള്ള വര്‍ദ്ധനവ് ലഭിക്കുന്നത് കമ്പനിയുടെ, ഹിമാലയൻ ശ്രേണിയിലുള്ള ബൈക്കുകള്‍ക്കാണെന്നാണ് റിപ്പോര്‍ട്ടുകള്‍.
ഇനി കമ്പനിയുടെ നിലവിലെ വില്‍പ്പന കണക്കുകള്‍ പരിശോധിക്കുയാണെങ്കില്‍, 2021 ഡിസംബറിൽ മൊത്തം 73,739 യൂണിറ്റുകൾ കമ്പനി വിറ്റു. 2020-ലെ ഇതേ മാസത്തിലെ 68,995 യൂണിറ്റുകളിൽ നിന്ന് വില്‍പ്പന കൂടി. എന്നാല്‍ ആഭ്യന്തര വിൽപ്പന നേരിയ തോതിൽ കുറഞ്ഞു. 0.47 ശതമാനമാണ് ഇടിവ്. അതേസമയം കയറ്റുമതിയിൽ വൻ കുതിച്ചുചാട്ടം ഉണ്ടായി. ജപ്പാനിലും തെക്കുകിഴക്കൻ ഏഷ്യൻ രാജ്യങ്ങളിലും ഉൾപ്പെടെ നിരവധി പ്രധാന ആഗോള വിപണികളിൽ റോയൽ എൻഫീൽഡ് മുന്നേറിക്കൊണ്ടിരിക്കുകയാണ്. 2020 ഡിസംബറിൽ വിദേശ വിപണികളിലേക്ക് അയച്ച 3,503 യൂണിറ്റുമായി താരതമ്യപ്പെടുത്തുമ്പോൾ 144.13 ശതമാനം വർധിച്ച് 8.552 യൂണിറ്റായിരുന്നു കഴിഞ്ഞ മാസത്തെ കയറ്റുമതി.
റോയൽ എൻഫീൽഡ് മെറ്റിയർ 350 ഫയർബോൾ ശ്രേണിയുടെ വില 2,511 രൂപ വർധിപ്പിച്ചു. ഈ ബൈക്കുകളുടെ വില ഇപ്പോൾ 2.01 ലക്ഷം (എക്സ്-ഷോറൂം) മുതൽ 2.03 ലക്ഷം (എക്സ്-ഷോറൂം) വരെയാണ്. മെറ്റിയോര് 350 ലൈനപ്പിലെ സ്റ്റെല്ലാർ ശ്രേണിയിലുള്ള ബൈക്കുകൾക്ക് ഓരോ വേരിയന്റിലും 2.601 രൂപയുടെ വർദ്ധനവ് ലഭിച്ചു. മെറ്റിയോര് 350-ന്റെ സ്റ്റെല്ലാർ ശ്രേണിയുടെ വില ഇപ്പോൾ 2.07 ലക്ഷം (എക്സ്-ഷോറൂം) മുതൽ 2.09 ലക്ഷം (എക്സ്-ഷോറൂം) വരെ ഉയരുന്നു.
