ഇലക്ട്രിക് ഇരുചക്ര വാഹന വിപണിയിൽ അൾട്രാവയലറ്റ് തങ്ങളുടെ പുതിയ മോഡലായ X-47 വെനം പുറത്തിറക്കി. കുറഞ്ഞ ഭാരവും 343 കിലോമീറ്റർ വരെ മികച്ച റേഞ്ചും നൽകുന്ന ഈ ബൈക്കിന്റെ പ്രാരംഭ വില 2.65 ലക്ഷം രൂപയാണ്. നൂതന സുരക്ഷാ ഫീച്ചറുകളും മികച്ച വേഗതയും ഈ ഇലക്ട്രിക് ബൈക്കിനെ കൂടുതൽ ആകർഷകമാക്കുന്നു.
ഇലക്ട്രിക് ഇരുചക്ര വാഹന വിപണിയിൽ പുതിയ മോഡലുമായി അൾട്രാവയലറ്റ്. കമ്പനിയുടെ പുതിയ X-47 വെനം ഇലക്ട്രിക് ബൈക്കാണ് പുറത്തിറക്കിയത്. കുറഞ്ഞ ഭാരം, കൂടുതൽ റേഞ്ച്, മികച്ച വേഗത, നൂതന സാങ്കേതികവിദ്യകൾ എന്നിവയാണ് പുതിയ മോഡലിന്റെ പ്രധാന ആകർഷണങ്ങൾ. ഒറ്റ ചാർജിൽ 343 കിലോമീറ്റർ വരെ സഞ്ചരിക്കാനാകുമെന്ന് കമ്പനി അവകാശപ്പെടുന്നു. ഏറ്റവും ഉയർന്ന വേരിയന്റിന് മണിക്കൂറിൽ 100 കിലോമീറ്റർ വേഗത കൈവരിക്കാൻ വെറും 5.9 സെക്കൻഡ് മതിയാകും.
വില 2.65 ലക്ഷം രൂപ മുതൽ
കമ്പനിയുടെ പുതിയ VX-100 പ്ലാറ്റ്‌ഫോമിലാണ് X-47 വെനം നിർമിച്ചിരിക്കുന്നത്. അടിസ്ഥാന വേരിയന്റിന് 2.65 ലക്ഷം രൂപയാണ് വില. 11kWh ബാറ്ററിയുള്ള ഉയർന്ന വേരിയന്റായ റീക്കോണിന് 4.12 ലക്ഷം രൂപയും വില വരും. പഴയ മോഡലിനെ അപേക്ഷിച്ച് ഭാരം കുറയ്ക്കാനും ബാറ്ററിയുടെ കാര്യക്ഷമത മെച്ചപ്പെടുത്താനും പുതിയ പ്ലാറ്റ്‌ഫോമിലൂടെ സാധിച്ചെന്നാണ് കമ്പനിയുടെ അവകാശവാദം.
ഭാരം കുറഞ്ഞു, റേഞ്ച് കൂടി
പുതിയ X-47 വെനത്തിന്റെ അടിസ്ഥാന വേരിയന്റിൽ 7.5kWh ബാറ്ററിയാണുള്ളത്. 180 കിലോഗ്രാമാണ് ഈ മോഡലിന്റെ ഭാരം. പഴയ 7kWh മോഡലിനേക്കാൾ 17 കിലോഗ്രാം കുറവാണിത്. ഒറ്റ ചാർജിൽ 227 കിലോമീറ്റർ വരെ സഞ്ചരിക്കാനാകുമെന്നും കമ്പനി പറയുന്നു. 11kWh ബാറ്ററിയുള്ള റീക്കോൺ വേരിയന്റിന് 195 കിലോഗ്രാമാണ് ഭാരം. പഴയ 10.3kWh പതിപ്പിനേക്കാൾ 13 കിലോഗ്രാം കുറവാണിത്. ഈ വേരിയന്റിന് 343 കിലോമീറ്റർ വരെ റേഞ്ച് ലഭിക്കുമെന്നാണ് അവകാശവാദം. ബാറ്ററി, മോട്ടോർ, മോട്ടോർ കൺട്രോളർ എന്നിവയുടെ ഭാരം കുറയ്ക്കുന്നതിനൊപ്പം കൂളിങ് സംവിധാനവും മെച്ചപ്പെടുത്തിയിട്ടുണ്ട്.
Related Articles
5.9 സെക്കൻഡിൽ 100 കിലോമീറ്റർ വേഗം
റീക്കോൺ വേരിയന്റിൽ 40 ബിഎച്ച്പി കരുത്തും 90 എൻഎം ടോർക്കും ലഭിക്കും. പൂജ്യത്തിൽനിന്ന് മണിക്കൂറിൽ 60 കിലോമീറ്റർ വേഗത്തിലെത്താൻ 2.7 സെക്കൻഡും 100 കിലോമീറ്റർ വേഗത്തിലെത്താൻ 5.9 സെക്കൻഡും മതിയെന്നാണ് കമ്പനിയുടെ കണക്ക്. ബാറ്ററി ചാർജ് 10 ശതമാനമായി കുറഞ്ഞാലും ബാലിസ്റ്റിക് റൈഡ് മോഡ് ഉപയോഗിക്കാം. പഴയ മോഡലിൽ ഈ സൗകര്യം 30 ശതമാനം ചാർജ് ശേഷിക്കുമ്പോൾ മാത്രമായിരുന്നു ലഭ്യമായിരുന്നത്. റീജനറേറ്റീവ് ബ്രേക്കിങ് സംവിധാനം 99 ശതമാനം ബാറ്ററി ചാർജിലും പ്രവർത്തിക്കുമെന്നും കമ്പനി വ്യക്തമാക്കുന്നു.
7 ഇഞ്ച് ടിഎഫ്ടി ഡിസ്‌പ്ലേയും ക്രൂയിസ് കൺട്രോളും
പുതിയ മോഡലിൽ 7 ഇഞ്ച് ടിഎഫ്ടി ഡിസ്‌പ്ലേ, ക്രൂയിസ് കൺട്രോൾ, ക്യാമറ പാർക്കിങ് അസിസ്റ്റ് എന്നിവയാണ് പ്രധാന ഫീച്ചറുകൾ. എന്നാൽ ഈ സൗകര്യങ്ങൾ ഉയർന്ന മൂന്ന് വേരിയന്റുകളിൽ മാത്രമേ ലഭ്യമാകൂ. ഡ്യുവൽ ചാനൽ എബിഎസ്, ട്രാക്ഷൻ കൺട്രോൾ, ഡൈനാമിക് സ്റ്റബിലിറ്റി കൺട്രോൾ എന്നിവ എല്ലാ വേരിയന്റുകളിലും ഉൾപ്പെടുത്തിയിട്ടുണ്ട്. ഉയർന്ന വേരിയന്റിൽ നാല് ലെവൽ ട്രാക്ഷൻ കൺട്രോൾ, റഡാർ അധിഷ്ഠിത യുവി ഹൈപ്പർസെൻസ് അസിസ്റ്റൻസ് സിസ്റ്റം, സംയോജിത ഡാഷ്‌ക്യാം എന്നിവയും ലഭിക്കും.
ഹാർഡ്‌വെയറിൽ മാറ്റമില്ല; ചാർജിങ്ങിന് കൂടുതൽ സമയം
പുതിയ മോഡലിന് 820 എംഎം സീറ്റ് ഉയരവും 200 എംഎം ഗ്രൗണ്ട് ക്ലിയറൻസും 1,385 എംഎം വീൽബേസുമുണ്ട്. മുന്നിൽ 320 എംഎം ഡിസ്‌ക് ബ്രേക്കും പിന്നിൽ 230 എംഎം ഡിസ്‌ക് ബ്രേക്കുമാണ് നൽകിയിരിക്കുന്നത്. 41 എംഎം പ്രീലോഡ് ക്രമീകരിക്കാവുന്ന യുഎസ്ഡി ഫ്രണ്ട് ഫോർക്കും പിന്നിൽ മോണോഷോക്കും സസ്പെൻഷൻ കൈകാര്യം ചെയ്യുന്നു. സ്റ്റീൽ ട്രെല്ലിസ് ഫ്രെയിമും 17 ഇഞ്ച് ഫ്രണ്ട്, റിയർ വീലുകളും നിലനിർത്തിയിട്ടുണ്ട്. അതേസമയം, ചാർജിങ് സമയത്തിൽ നേരിയ വർധനയുണ്ട്. കമ്പനിയുടെ 1.3kW പോർട്ടബിൾ ചാർജർ ഉപയോഗിച്ച് ബാറ്ററി 20 ശതമാനത്തിൽനിന്ന് 80 ശതമാനത്തിലെത്താൻ അഞ്ച് മണിക്കൂർ 30 മിനിറ്റ് വേണ്ടിവരും. പഴയ മോഡലിൽ ഇതിന് ഏകദേശം അഞ്ച് മണിക്കൂർ മതിയായിരുന്നു.
