2026 മാർച്ചിൽ യമഹ മോട്ടോർ ഇന്ത്യ 52.38% വളർച്ചയോടെ 76,909 യൂണിറ്റുകൾ വിറ്റഴിച്ച് ശ്രദ്ധേയമായ മുന്നേറ്റം നടത്തി. റേ ഇസെഡ് ആർ സ്കൂട്ടർ വിൽപ്പനയിൽ ഒന്നാമതെത്തിയപ്പോൾ, FZ സീരീസും മികച്ച പ്രകടനം കാഴ്ചവെച്ചു. ഈ വളർച്ച കമ്പനിയുടെ വിപണിയിലെ ശക്തമായ സ്ഥാനം ഉറപ്പിക്കുന്നു.

ഇന്ത്യൻ ഇരുചക്ര വാഹന വിപണിയിൽ ജാപ്പനീസ് ടൂവീലർ ബ്രാൻഡായ യമഹ മോട്ടോർ ഇന്ത്യ ശക്തമായ മുന്നേറ്റം തുടരുകയാണ്. 2026 മാർച്ച് മാസത്തിലെ വിൽപ്പന കണക്കുകൾ കമ്പനി ശ്രദ്ധേയമായ വളർച്ച കൈവരിച്ചതായി വ്യക്തമാക്കുന്നു. ഈ മാസം യമഹ ഇന്ത്യ ആഭ്യന്തര വിപണിയിൽ ആകെ 76,909 യൂണിറ്റുകൾ വിറ്റഴിച്ചു. കഴിഞ്ഞ വർഷം ഇതേ മാസത്തിൽ 50,473 യൂണിറ്റുകളായിരുന്നു വിൽപ്പന. ഇതോടെ 26,436 യൂണിറ്റുകളുടെ വർധനയും 52.38 ശതമാനം വളർച്ചയും രേഖപ്പെടുത്തി.

വളർച്ചയിൽ പ്രധാന പങ്കുവഹിച്ചത് റേ ഇസെഡ് ആർ സ്‍കൂട്ടറാണ്. 2025 മാർച്ചിൽ 14,510 യൂണിറ്റുകൾ മാത്രം വിറ്റഴിച്ചിരുന്ന ഈ മോഡൽ, 2026 മാർച്ചിൽ 25,798 യൂണിറ്റുകളായി ഉയർന്നു. ഒരുമാസത്തിനുള്ളിൽ തന്നെ 11,300 യൂണിറ്റുകളുടെ വർധനയാണിത്. വർഷാന്തര വളർച്ച 77.79 ശതമാനമാണ്. യമഹയുടെ പ്രധാന സ്‍കൂട്ടറായ റേ ഇസെഡ് ആർ വീണ്ടും വിപണിയിൽ ശക്തമായ സ്വാധീനം ചെലുത്തുന്നുവെന്ന് ഇതിലൂടെ വ്യക്തമാകുന്നു.

വിൽപ്പനയിൽ രണ്ടാം സ്ഥാനത്ത് FZ സീരീസാണ്. 17,227 യൂണിറ്റുകളാണ് ഈ മോഡൽ നേടിയിരിക്കുന്നത്. 2025 മാർച്ചിലെ 11,583 യൂണിറ്റുകളിൽ നിന്ന് 5,644 യൂണിറ്റുകളുടെ വർധനയാണ് ഉണ്ടായത്. 48.73 ശതമാനം വളർച്ചയാണ് രേഖപ്പെടുത്തിയിരിക്കുന്നത്. നഗര യുവാക്കൾക്കിടയിൽ ഏറെ ജനപ്രീതിയുള്ള ഈ സ്ട്രീറ്റ് ബൈക്ക് നിരന്തരമായ പ്രകടനമാണ് കാഴ്ചവെക്കുന്നത്.

മൂന്നാം സ്ഥാനത്ത് MT15 ആണ്. 2026 മാർച്ചിൽ 9,343 യൂണിറ്റുകൾ വിറ്റഴിച്ചു. കഴിഞ്ഞ വർഷം ഇതേ സമയത്ത് 9,074 യൂണിറ്റുകളായിരുന്നു വിൽപ്പന. 269 യൂണിറ്റുകളുടെ ചെറിയ വർധന മാത്രമാണുണ്ടായത്. 2.96 ശതമാനം വളർച്ചയാണിത്, എന്നാൽ സ്ഥിരതയുള്ള ആവശ്യകത തുടരുന്നുവെന്ന് ഇത് സൂചിപ്പിക്കുന്നു.

നാലാം സ്ഥാനത്ത് R15 ബൈക്കാണ്. 8,133 യൂണിറ്റുകൾ വിറ്റഴിച്ചതിലൂടെ കഴിഞ്ഞ വർഷത്തെ 6,622 യൂണിറ്റുകളിൽ നിന്ന് 1,511 യൂണിറ്റുകളുടെ വർധന കൈവരിച്ചു. 22.82 ശതമാനം വളർച്ചയാണ് രേഖപ്പെടുത്തിയിരിക്കുന്നത്. പ്രീമിയം പെർഫോമൻസ് ബൈക്ക് വിഭാഗത്തിൽ ഇത്രയും വളർച്ച നേടുന്നത് ശ്രദ്ധേയമാണ്.

XSR 155 മോഡൽ 6,948 യൂണിറ്റുകളോടെ അഞ്ചാം സ്ഥാനത്ത് എത്തി. വിപണിയിൽ പുതുതായി അവതരിപ്പിച്ച ഈ മോഡൽ ഉപഭോക്താക്കളുടെ ശ്രദ്ധ പിടിച്ചുപറ്റിയിട്ടുണ്ട്. അതേസമയം ഫാസിനോ സ്‍കൂട്ടർ 6,671 യൂണിറ്റുകൾ വിറ്റഴിച്ചു. കഴിഞ്ഞ വർഷം 6,634 യൂണിറ്റുകളായിരുന്നു വിൽപ്പന. വെറും 0.56 ശതമാനം വളർച്ച മാത്രമാണെങ്കിലും സ്ഥിരത നിലനിർത്തിയിട്ടുണ്ട്.

എയറോക്സ് സ്‍കൂട്ടർ 2,557 യൂണിറ്റുകളോടെ മുന്നേറുന്നു. 2025 മാർച്ചിലെ 1,991 യൂണിറ്റുകളിൽ നിന്ന് 566 യൂണിറ്റുകളുടെ വർധനയാണ് ഉണ്ടായത്. 28.43 ശതമാനം വളർച്ചയാണ് ഇത് സൂചിപ്പിക്കുന്നത്. പുതിയ EC06 ഇലക്ട്രിക് മോഡൽ 232 യൂണിറ്റുകൾ റിപ്പോർട്ട് ചെയ്തതും ശ്രദ്ധേയമാണ്. അതേസമയം R3, MT03 മോഡലുകൾ ഈ മാസം വിൽപ്പനയിൽ പൂർണമായും പിന്നോട്ടുപോയി. കഴിഞ്ഞ വർഷം 59 യൂണിറ്റുകൾ വിറ്റഴിച്ചിരുന്നപ്പോൾ, ഈ വർഷം വിൽപ്പന പൂജ്യമായി.

മൊത്തത്തിൽ, യമഹ ഇന്ത്യയുടെ മാർച്ച് 2026 പ്രകടനം കമ്പനിയുടെ വിപണിയിലെ സ്ഥാനം ശക്തിപ്പെടുത്തുന്നതായി വിലയിരുത്തപ്പെടുന്നു. സ്‍കൂട്ടറുകളും സ്ട്രീറ്റ് ബൈക്കുകളും ഒരുപോലെ മികച്ച പ്രകടനം കാഴ്ചവെച്ചതോടെ, വരും മാസങ്ങളിലും ഈ വളർച്ച തുടരുമെന്നാണ് പ്രതീക്ഷിക്കുന്നത്.