കേരള സർക്കാരിന് കീഴിലുള്ള ഐ.സി.ടി. അക്കാദമി ഓഫ് കേരള, ബിരുദധാരികൾക്കും പ്രൊഫഷണലുകൾക്കും കരിയർ വളർച്ചയ്ക്ക് സഹായിക്കുന്ന പുതിയ തൊഴിലധിഷ്ഠിത പ്രോഗ്രാമുകളിലേക്ക് അപേക്ഷ ക്ഷണിച്ചു.
തിരുവനന്തപുരം: ബിരുദധാരികൾക്കും പ്രൊഫഷണലുകൾക്കും കരിയർ വളർച്ചയ്ക്ക് സഹായിക്കുന്ന പുതിയ തൊഴിലധിഷ്ഠിത പ്രോഗ്രാമുകളിലേക്ക് കേരള സർക്കാരിന് കീഴിലുള്ള ഐ.സി.ടി. അക്കാദമി ഓഫ് കേരള അപേക്ഷ ക്ഷണിച്ചു. മൂന്ന് മാസം ദൈർഘ്യമുള്ള ഓൺലൈൻ അപ്സ്കില്ലിംഗ് പ്രോഗ്രാമുകളായ Mastering Digital Marketing with AI, DevOps with Azure, Certified Flutter Developer എന്നീ പ്രോഗ്രാമുകളിലേക്കാണ് ഇപ്പോൾ അഡ്മിഷൻ ആരംഭിച്ചിരിക്കുന്നത്. ബിരുദധാരികൾ, നിലവിൽ ജോലി ചെയ്യുന്നവർ എന്നിവർക്ക് അപേക്ഷിക്കാവുന്ന രീതിയിലാണ് ഈ പ്രോഗ്രാമുകളുടെ രൂപകൽപ്പന.
ഇതോടൊപ്പം, പുതിയതായി പ്രവർത്തനം ആരംഭിച്ച ഐസിടാക്കിന്റെ എറണാകുളം, കച്ചേരിപ്പടിയിലെ ലേണിംഗ് സെന്ററിൽ നടത്തുന്ന, ബിരുദധാരികളെ വ്യവസായ രംഗത്തേക്ക് സജ്ജമാക്കുന്ന ഓഫ്ലൈൻ ഇൻഡസ്ട്രി റെഡിനസ് സർട്ടിഫിക്കേഷൻ പ്രോഗ്രാമുകളായ Data Science & Analytics, Full Stack Development (MERN), Cyber Security, Artificial Intelligence & Machine Learning എന്നീ പ്രോഗ്രാമുകളിലേക്കും ഇപ്പോൾ അപേക്ഷിക്കാം. കൂടാതെ, Certified Specialist in SDET (Software Development Engineer in Test) എന്ന പ്രോഗ്രാം ഓൺലൈനായും തിരുവനന്തപുരം ടെക്നോപാർക്കിലെ ഐസിടാക് ക്യാമ്പസിൽ ഓഫ്ലൈനായും ലഭ്യമാണ്. അഞ്ച് മുതൽ ആറ് മാസം വരെ നീളുന്ന ഈ പ്രോഗ്രാമുകൾ വിജയകരമായി പൂർത്തിയാക്കുന്നവർക്ക് ഇന്റേൺഷിപ്പും ഉൾപ്പെടുത്തിയിട്ടുണ്ട്.
എഞ്ചിനീയറിംഗ്, സയൻസ് ബിരുദധാരികൾക്കും ത്രിവത്സര ഡിപ്ലോമക്കാർക്കും അപേക്ഷിക്കാം. മികവ് പുലർത്തുന്നവർക്ക് സ്കോളർഷിപ്പുകളും പ്ലേസ്മെന്റ് സഹായവും ഉണ്ടാകും. കൂടാതെ, സൗജന്യ ലിങ്ക്ഡ്ഇൻ ലേണിംഗ് ആക്സസ്, തൊഴിൽ നൈപുണ്യ പരിശീലനം, ഇൻഡസ്ട്രി വിദഗ്ദ്ധരുമായി സംവേദിക്കാനുള്ള അവസരം എന്നിവ ഇതോടൊപ്പം ലഭിക്കും. 2025 ജൂലൈ 20 വരെ ഈ പ്രോഗ്രാമുകളിലേക്ക് അപേക്ഷിക്കാം. പ്രോഗ്രാമുകളെക്കുറിച്ചുള്ള കൂടുതൽ വിവരങ്ങൾക്ക്, വിളിക്കൂ: +91 75 940 51437, 47 127 00 811. വെബ്സൈറ്റ്: https://ictkerala.org/interest
