ഏഷ്യാ കപ്പില് പാകിസ്ഥാനെതിരായ ആദ്യ മത്സരത്തിന് മുന്നോടിയായി കഠിന പരിശീലനം തുടരുകയാണ് രോഹിത് ശര്മ്മ
ദുബായ്: യുഎഇയിൽ ഏഷ്യാ കപ്പ് പരിശീലനത്തിനിടെയുള്ള ഇന്ത്യന് നായകന് രോഹിത് ശർമ്മയുടെ രസകരമായ വീഡിയോ പങ്കുവച്ച് ബിസിസിഐ. പരിശീലന സെഷന്റെ അവസാനത്തിലേക്ക് രോഹിത് നീങ്ങുന്നു എന്ന തലക്കെട്ടിലാണ് ബിസിസിഐയുടെ ട്വീറ്റ്. പ്രാക്ടീസ് സെഷനൊടുവില് കിക്ക് സ്കൂട്ടറില് മൈതാനത്ത് കറങ്ങുകയായിരുന്നു ഹിറ്റ്മാന്. പരിക്കുപറ്റാതെ സൂക്ഷിക്കണം എന്ന് ഉപദേശിക്കുന്നുണ്ട് രോഹിത്തിന്റെ വീഡിയോ കണ്ട് ആരാധകര്.
ഏഷ്യാ കപ്പില് പാകിസ്ഥാനെതിരായ ആദ്യ മത്സരത്തിന് മുന്നോടിയായി കഠിന പരിശീലനം തുടരുകയാണ് രോഹിത് ശര്മ്മയുടെ നേതൃത്വത്തില് ടീം ഇന്ത്യ. ദുബായില് ഇന്നലെയും ടീം പരിശീലനം നടത്തി. കൊവിഡ് ബാധിതനായ രാഹുല് ദ്രാവിഡിന്റെ അഭാവത്തില് വിവിഎസ് ലക്ഷ്മണിന്റെ മേല്നോട്ടത്തിലാണ് ടീമിന്റെ തയ്യാറെടുപ്പ്.
ദുബായില് ഞായറാഴ്ചയാണ്(ഓഗസ്റ്റ് 28) ബന്ധവൈരികളായ പാകിസ്ഥാനെതിരെ ഏഷ്യാ കപ്പില് ടീം ഇന്ത്യയുടെ ആദ്യ പോരാട്ടം. കഴിഞ്ഞ വര്ഷം ടി20 ലോകകപ്പില് ഇതേ വേദിയില് 10 വിക്കറ്റിന്റെ തോല്വി പാകിസ്ഥാനോട് നേരിട്ടതിന് പകരംവീട്ടാനാണ് രോഹിത്തും സംഘവും ഇക്കുറി ഇറങ്ങുന്നത്. അന്ന് മൂന്ന് വിക്കറ്റുമായി മത്സരത്തിലെ താരമായി തെരഞ്ഞെടുക്കപ്പെട്ട പേസര് ഷഹീന് ഷാ അഫ്രീദി പക്ഷേ ഇക്കുറി കളിക്കുന്നില്ല. ഇന്ത്യക്ക് പരിക്കേറ്റ ജസ്പ്രീത് ബുമ്ര, ഹര്ഷല് പട്ടേല് എന്നിവരുടെ അഭാവവുമുണ്ട്.
ഇന്ത്യന് സ്ക്വാഡ്: രോഹിത് ശര്മ്മ(ക്യാപ്റ്റന്), കെ എല് രാഹുല്(വൈസ് ക്യാപ്റ്റന്), വിരാട് കോലി, സൂര്യകുമാര് യാദവ്, ദീപക് ഹൂഡ, റിഷഭ് പന്ത്(വിക്കറ്റ് കീപ്പര്), ദിനേശ് കാര്ത്തിക്(വിക്കറ്റ് കീപ്പര്), ഹാര്ദിക് പാണ്ഡ്യ, രവീന്ദ്ര ജഡേജ, ആര് അശ്വിന്, യുസ്വേന്ദ്ര ചാഹല്, രവി ബിഷ്ണോയി, ഭുവനേശ്വര് കുമാര്, അര്ഷ്ദീപ് സിംഗ്, ആവേശ് ഖാന്. സ്റ്റാന്ഡ്ബൈ: ശ്രേയസ് അയ്യര്, അക്സര് പട്ടേല്, ദീപക് ചാഹര്.
ഏഷ്യാ കപ്പ്: പാക് പോരിന് മുമ്പ് പുതിയ ജേഴ്സി പുറത്തിറക്കി ടീം ഇന്ത്യ
