ഇരട്ട സെഞ്ചുറി നേടിയ ഡേവിഡ് വാര്ണറും പിന്നാലെ കാമറൂണ് ഗ്രീനും പരിക്കേറ്റ് റിട്ടയര്ഡ് ഹര്ട്ടായപ്പോള് സ്റ്റീവ് സ്മിത്ത് സെഞ്ചുറിക്കരികെ പുറത്തായി
മെല്ബണ്: ദക്ഷിണാഫ്രിക്കയ്ക്ക് എതിരായ ബോക്സിംഗ് ഡേ ടെസ്റ്റില് രണ്ടാം ദിനം മികച്ച ലീഡോടെ പിരിഞ്ഞ് ഓസ്ട്രേലിയ. രണ്ടാം ദിനം സ്റ്റംപ് എടുത്തപ്പോള് 91 ഓവറില് 386-3 എന്ന ശക്തമായ നിലയിലാണ് ഓസീസ്. ട്രാവിസ് ഹെഡും(48 പന്തില് 48*), അലക്സ് ക്യാരിയുമാണ്(22 പന്തില് 9*) ക്രീസില്. ദക്ഷിണാഫ്രിക്കയുടെ ഒന്നാം ഇന്നിംഗ്സ് സ്കോറായ 189 റണ്സ് പിന്തുടരുന്ന ഓസീസിനിപ്പോള് 197 റണ്സ് ലീഡുണ്ട്. ഇരട്ട സെഞ്ചുറി നേടിയ ഡേവിഡ് വാര്ണറും പിന്നാലെ കാമറൂണ് ഗ്രീനും പരിക്കേറ്റ് റിട്ടയര്ഡ് ഹര്ട്ടായപ്പോള് സ്റ്റീവ് സ്മിത്ത് സെഞ്ചുറിക്കരികെ പുറത്തായി.
പട നയിച്ച് വാര്ണര്-സ്മിത്ത് സഖ്യം
ഓസ്ട്രേലിയ 12 ഓവറില് ഒരു വിക്കറ്റിന് 45 റണ്സ് എന്ന നിലയിലാണ് രണ്ടാം ദിനം ആരംഭിച്ചത്. 11 പന്തില് ഒരു റണ്സ് നേടിയ ഉസ്മാന് ഖവാജയുടെ വിക്കറ്റ് ആതിഥേയര്ക്ക് ഇന്നലെ നഷ്ടമായിരുന്നു. ഓസീസ് സ്കോര് 6.4 ഓവറില് 21ല് നില്ക്കേ ഖവാജയെ റബാഡ പുറത്താക്കുകയായിരുന്നു. ഇന്ന് കളി പുനരാരംഭിക്കുമ്പോള് 51 പന്തില് 32 റണ്സുമായി ഡേവിഡ് വാര്ണറും 12 പന്തില് 5 റണ്സുമായി മാര്നസ് ലബുഷെയ്നുമായിരുന്നു ക്രീസില്. ഇന്ന് ഇന്നിംഗ്സിലെ 19-ാം ഓവറില് മാര്നസ് ലബുഷെയ്ന് റണ്ണൗട്ടായി. 35 പന്തില് 14 റണ്സാണ് താരം നേടിയത്. ഇതിന് പിന്നാലെ ക്രീസില് ഒന്നിച്ച വാര്ണര്-സ്മിത്ത് സഖ്യം 239 റണ്സിന്റെ മൂന്നാം വിക്കറ്റ് കൂട്ടുകെട്ടുമായി ഓസ്ട്രേലിയയെ നയിച്ചു.
വാട്ട് എ വാര്ണര്
തന്റെ നൂറാം ടെസ്റ്റില് സെഞ്ചുറി തികച്ച ഡേവിഡ് വാര്ണറായിരുന്നു മെല്ബണ് ക്രിക്കറ്റ് ഗ്രൗണ്ടിലെ ആകര്ഷണം. 144 പന്തില് 100 തികച്ച വാര്ണറെ പരിക്ക് പലകുറി തടസപ്പെടുത്തിയെങ്കിലും 150 തികച്ചതിന് പിന്നാലെ അതിവേഗം സ്കോറിംഗുമായി മുന്നേറി. എന്നാല് ആന്റിച്ച് നോര്ക്യയുടെ ബൗണ്സറില് പാളിയ സ്മിത്ത് 161 പന്തില് 85 റണ്സുമായി ഡി ബ്രൂയിന്റെ ക്യാച്ചില് സെഞ്ചുറിക്കരികെ മടങ്ങിയത് ഓസീസിന് അപ്രതീക്ഷിത തിരിച്ചടിയായി. 254 പന്തില് ഇരട്ട സെഞ്ചുറി തികച്ചതിന് പിന്നാലെയുള്ള പതിവ് പഞ്ച് ആഘോഷത്തിനിടെ കാലിലെ പരിക്ക് കലശലായതോടെ വാര്ണര് റിട്ടയര്ഡ് ഹര്ട്ടായി മടങ്ങി. പിന്നാലെ നോര്ക്യയുടെ പന്തില് കൈക്ക് പരിക്കേറ്റ് കാമറൂണ് ഗ്രീനും മടങ്ങി. രണ്ടാം ദിനം അവസാനിച്ചപ്പോള് ഏകദിന ശൈലിയില് കളിക്കുന്ന ട്രാവിസ് ഹെഡും അലക്സ് ക്യാരിയുമാണ് ക്രീസില്.
ഗ്രീനിഷ് ഗ്രീന്
നേരത്തെ ടോസ് നഷ്ടപ്പെട്ട് ബാറ്റിംഗിനെത്തിയ ദക്ഷിണാഫ്രിക്ക 68.4 ഓവറില് 189ന് എല്ലാവരും പുറത്തായി. അഞ്ച് വിക്കറ്റ് നേടിയ കാമറൂണ് ഗ്രീനാണ് സന്ദര്ശകരെ തകര്ത്തത്. 10.4 ഓവറില് 27 റണ്സിനാണ് ഗ്രീന് അഞ്ച് വിക്കറ്റ് വീഴ്ത്തിയത്. മിച്ചല് സ്റ്റാര്ക്ക് രണ്ടും സ്കോട്ട് ബോളണ്ടും നേഥന് ലിയോണും ഓരോ വിക്കറ്റും വീഴ്ത്തി. മാര്കോ ജാന്സന് (59), കെയ്ല് വെറെയ്നെ (52) എന്നിവര് മാത്രമാണ് ദക്ഷിണാഫ്രിക്കന് നിരയില് തിളങ്ങിയത്. നായകന് ഡീന് എല്ഗാര് 26 റണ്സില് പുറത്തായി. സ്കോര്ബോര്ഡില് 67 റണ്സ് മാത്രമുള്ളപ്പോള് അഞ്ച് വിക്കറ്റ് നഷ്ടമായ പ്രോട്ടീസിനെ വെറെയ്നും ജാന്സനും ചേര്ന്ന് 150 കടത്തുകയായിരുന്നു.
