കൊവിഡ് 19: ഇന്ത്യ-ദക്ഷിണാഫ്രിക്ക ഏകദിന പരമ്പരയും റദ്ദാക്കി
കൊവിഡ് 19 ഭീതിയെത്തുടര്‍ന്ന് ഐപിഎല്‍ ഏപ്രില്‍ 15വരെ മാറ്റിവെക്കാന്‍ തീരുമാനിച്ചതിന് പിന്നാലെയാണ് ഇന്ത്യ-ദക്ഷിണാഫ്രിക്ക ഏകദിന പരമ്പരയും റദ്ദാക്കിയിരിക്കുന്നത്.
മുംബൈ: കൊവിഡ് 19 മഹാമാരി പടരുന്ന പശ്ചാത്തലത്തില്‍ ഇന്ത്യ-ദക്ഷിണാഫ്രിക്ക ഏകദിന പരമ്പരയിലെ ശേഷിക്കുന്ന രണ്ട് മത്സരങ്ങളും റദ്ദാക്കി. 15ന് ലക്നൗവും 18ന് കൊല്‍ക്കത്തയിലും നടക്കേണ്ടിയിരുന്ന മത്സരങ്ങളാണ് റദ്ദാക്കിയത്. ധര്‍മശാലയില്‍ നടക്കേണ്ടിയിരുന്ന പരമ്പരയിലെ ആദ്യ ഏകദിനം മഴമൂലം ഒരു പന്ത് പോലും എറിയാതെ ഉപേക്ഷിച്ചിരുന്നു.
Read more: കൊവിഡ് 19 ലക്ഷണങ്ങള്‍; ഓസീസ് ക്രിക്കറ്റ് താരത്തിന് പരിശോധന, ക്വാറന്‍റൈന്‍
കൊവിഡ് 19 ഭീതിയെത്തുടര്‍ന്ന് ഐപിഎല്‍ ഏപ്രില്‍ 15വരെ മാറ്റിവെക്കാന്‍ തീരുമാനിച്ചതിന് പിന്നാലെയാണ് ഇന്ത്യ-ദക്ഷിണാഫ്രിക്ക ഏകദിന പരമ്പരയും റദ്ദാക്കിയിരിക്കുന്നത്. ആദ്യം പരമ്പരയിലെ ശേഷിക്കുന്ന രണ്ട് മത്സരങ്ങളും അടച്ചിട്ട സ്റ്റേഡിയത്തില്‍ നടത്താനായിരുന്നു ബിസിസിഐയുടെ തീരുമാനം. എന്നാല്‍ കൊവിഡ് 19 ദിവസംതോറും പടരുന്ന പശ്ചാത്തലത്തില്‍ പരമ്പരതന്നെ റദ്ദാക്കാന്‍ ബിസിസഐ ഒടുവില്‍ തീരുമാനിക്കുകയായിരുന്നു.
Read more; കൊവിഡ് -19, പുതിയ വാര്‍ത്തകളും സമ്പൂര്‍ണ്ണ വിവരങ്ങളും അറിയാന്‍ ഇവിടെ ക്ലിക്ക് ചെയ്യുക
ഇന്ത്യയില്‍ ഇതുവരെ 81 പേര്‍ക്കാണ് രോഗം സ്ഥിരീകരിച്ചത്. കൊവിഡ് ഭീതിയെത്തുടര്‍ന്ന് ഇംഗ്ലണ്ട്-ശ്രീലങ്ക ടെസ്റ്റ് പരമ്പരയും റദ്ദാക്കിയിരുന്നു. കൊവിഡ് ഭീതിയെത്തുടര്‍ന്ന് ഇന്ത്യ-ദക്ഷിണാഫ്രിക്ക ഏകദിന പരമ്പരയില്‍ കളിക്കാര്‍ പരസ്പരം ഹസ്തദാനം നടത്തില്ലെന്ന് നേരത്തെ തിരുമാനിച്ചിരുന്നു.
