ഇതില് 18ന് ഹൈദരാബാദിനെതിരായ മത്സരം ചെന്നൈക്ക് ഹോം മത്സരമാണെങ്കില് 21ന് ഗുജറാത്തിനെതിരായ അവസാന മത്സരം എവേ മത്സരമാണ്.
ചെന്നൈ: ഐപിഎല്ലില് പ്ലേ ഓഫ് പോരാട്ടം കടുക്കുന്നതിനിടെ ചെന്നൈ സൂപ്പര് കിംഗ്സ് പ്ലേ ഓഫിലെത്തുമോ എന്ന് തീരുമാനിക്കുക അവസാന രണ്ട് മത്സരങ്ങളാകും. മറ്റന്നാള് ചെന്നൈ സൂപ്പര് കിംഗ്സ് ലക്നൗ സൂപ്പര് ജയന്റ്സുമായി ഏറ്റുമുട്ടും. പ്ലേ ഓഫ് കാണാതെ പുറത്തായി കഴിഞ്ഞ ലക്നൗവിനെതിരെ ജയിച്ചാല് പിന്നെ ചെന്നൈക്ക് മുന്നിലുള്ളത് കടുപ്പമേറിയ എതിരാളികളാണ്. പ്ലേ ഓഫ് ഏതാണ്ട് ഉറപ്പിച്ച ശുഭ്മാന് ഗില്ലിന്റെ ഗുജറാത്ത് ടൈറ്റന്സും പ്ലേ ഓഫ് പ്രതീക്ഷയുള്ള സണ്റൈസേഴ്സ് ഹൈദരാബാദും.
ഇതില് 18ന് ഹൈദരാബാദിനെതിരായ മത്സരം ചെന്നൈക്ക് ഹോം മത്സരമാണെങ്കില് 21ന് ഗുജറാത്തിനെതിരായ അവസാന മത്സരം എവേ മത്സരമാണ്. മറ്റന്നാള് ലക്നൗവിനെതിരെ ജയിച്ചാല് ചെന്നൈക്കും ഹൈദരാബാദിനും 14 പോയിന്റ് വീതമാകും. ഇതോടെ ഹൈദരാബാദ്-ചെന്നൈ മത്സരത്തില് ജയിക്കുന്നവര്ക്ക് അവസാന മത്സരത്തിന് മുമ്പ് പ്ലേ ഓഫിലേക്ക് സാധ്യത കൂടും. ബാറ്റിംഗ് ദുഷ്കരമായ അഹമ്മദാബാദില് നടന്ന കഴിഞ്ഞ രണ്ട് മത്സരങ്ങളിലും എതിരാളികളായ രാജസ്ഥാന് റോയല്സിനെയും ഹൈദരാബാദിനെയും ഗുജറാത്ത് പേസ് നിര എറിഞ്ഞിട്ടത് ആലോചിക്കുമ്പോൾ ലക്നൗവിനും ഹൈദരാബാദിനുമെതിരായ അടുത്ത രണ്ട് മത്സരങ്ങളില് ജയിക്കുക എന്നതാണ് പ്ലേ ഓഫിലേക്കുള്ള ചെന്നൈയുടെ എളുപ്പവഴി.
ഈ മത്സരങ്ങളിലെല്ലാം ടോസും നിര്ണായക ഘടകമാകും. ഹൈദരാബാദിന് ഇനി രണ്ട് മത്സരങ്ങള് മാത്രമെ അവശേഷിക്കുന്നുള്ളു.ഇതില് ചെന്നൈക്കെതിരായ മത്സരം കഴിഞ്ഞാല് അടുത്ത മത്സരം റോയല് ചലഞ്ചേഴ്സ് ബെംഗളൂരുവിനെതിരെ ആണെന്നത് ചെന്നൈക്ക് അനുകൂല ഘടകമാണ്. ഗുജറാത്തിനാകട്ടെ വരുന്ന രണ്ട് മത്സരങ്ങളില് ചെന്നൈക്ക് പുറമെ കൊല്ക്കത്ത നൈറ്റ് റൈഡേഴ്സാണ് എതിരാളികള്. 16 പോയിന്റുള്ള ഗുജറാത്തിന് ഇതിലൊരു മത്സരം ജയിച്ചാലും ക്വാളിഫയര് ഉറപ്പിക്കാം.
13 പോയിന്റുമായി ചെന്നൈക്ക് തൊട്ടുമുന്നിലുള്ള പഞ്ചാബ് കിംഗ്സിന് അവസാന മൂന്ന് കളികളില് മുംബൈ ഇന്ത്യൻസും ആര്സിബിയും ലക്നൗവുമാണ് എതിരാളികള്. പ്ലേ ഓഫ് സ്വപ്നം കാണുന്ന രാജസ്ഥാന് റോയല്സിനാകട്ടെ അവസാന മൂന്ന് കളികളില് താരതമ്യേന ദുര്ബല ഏതിരാളികളാണെന്നതും ചെന്നൈക്ക് ആശങ്കയാണ്. ഡല്ഹിയും ലക്നൗവും മുംബൈയുമാണ് രാജസ്ഥാന്റെ അവസാന രണ്ട് കളികളിലെ എതിരാളികള്.
