ന്യൂസിലൻഡിനെതിരായ ടെസ്റ്റ് പരമ്പര, പുതിയ വൈസ് ക്യാപ്റ്റനെ പ്രഖ്യാപിച്ച് ഇംഗ്ലണ്ട്
മുമ്പ് ഏകദിനങ്ങളിൽ ഇംഗ്ലണ്ടിനെ നയിച്ചിട്ടുള്ള ബ്രോഡ് ഇതാദ്യമായാണ് ടെസ്റ്റ് ടീമിന്റെ വൈസ് ക്യാപ്റ്റനാവുന്നത്. 2011 മുതൽ 2014വരെ ഇംഗ്ലണ്ടിനെ 27 ടി20 മത്സരങ്ങളിലും മൂന്ന് ഏകദിനങ്ങളിലും ബ്രോഡ് ഇംഗ്ലണ്ടിനെ നയിച്ചിട്ടുണ്ട്.
ലണ്ടൻ: നാളെ തുടങ്ങുന്ന ന്യൂസിലൻഡിനെതിരായ ടെസ്റ്റ് പരമ്പരയിൽ സീനിയർ താരം സ്റ്റുവർട്ട് ബ്രോഡിനെ ഇംഗ്ലണ്ടിന്റെ വൈസ് ക്യാപ്റ്റനായി തെരഞ്ഞെടുത്തു. പരിക്കുമൂലം ബെൻ സ്റ്റോക്സ് കളിക്കാതിരിക്കുന്ന സാഹചര്യത്തിലാണ് ബ്രോഡിനെ വൈസ് ക്യാപ്റ്റനായി തെരഞ്ഞെടുത്തത്. ഐപിഎല്ലിൽ രാജസ്ഥാൻ റോയൽസിനായി കളിക്കുന്നതിനിടെയാണ് സ്റ്റോക്സിന്റെ വിരലിന് പരിക്കേറ്റത്. ജോ റൂട്ടാണ് ഇംഗ്ലണ്ടിനെ നയിക്കുന്നത്.
കഴിഞ്ഞ വർഷം റൂട്ടിന്റെ ആഭാവത്തിൽ വെസ്റ്റ് ഇൻഡീസിനെതിരെ സ്റ്റോക്സ് ഇംഗ്ലണ്ടിനെ നയിച്ചിരുന്നു. മുമ്പ് ഏകദിനങ്ങളിൽ ഇംഗ്ലണ്ടിനെ നയിച്ചിട്ടുള്ള ബ്രോഡ് ഇതാദ്യമായാണ് ടെസ്റ്റ് ടീമിന്റെ വൈസ് ക്യാപ്റ്റനാവുന്നത്. 2011 മുതൽ 2014വരെ ഇംഗ്ലണ്ടിനെ 27 ടി20 മത്സരങ്ങളിലും മൂന്ന് ഏകദിനങ്ങളിലും ബ്രോഡ് ഇംഗ്ലണ്ടിനെ നയിച്ചിട്ടുണ്ട്. സ്റ്റോക്സ് വൈസ് ക്യാപ്റ്റനാവും മുമ്പ് സീനിയർ താരമായ ജെയിംസ് ആൻഡേഴ്സണായിരുന്നു ഇംഗ്ലണ്ടി് ടീമിന്റെ വൈസ് ക്യാപ്റ്റനായിരുന്നത്.
നാളെ ലോർഡ്സിലാണ് ഇംഗ്ലണ്ട്-ന്യൂസിലൻഡ് ആദ്യ ടെസ്റ്റ്. 10ന് ബർമിംഗ്ഹാമിൽ രണ്ടാം ടെസ്റ്റ് നടക്കും. സ്റ്റോക്സിന് പുറമെ സൂപ്പർ താരങ്ങളായ ജോസ് ബട്ലർ, ജോഫ്ര ആർച്ചർ എന്നിവരില്ലാതെയാണ് ഇംഗ്ലണ്ട് ന്യൂസിലൻഡിനെതിരായ ആദ്യ ടെസ്റ്റിനിറങ്ങുന്നത്. പരിക്കുമൂലമാണ് ബട്ലർക്കും ആർച്ചർക്കും ടെസ്റ്റ് പരമ്പര നഷ്ടമായത്. ബട്ലറുടെ അഭാവത്തിൽ ജെയിംസ് ബ്രേസിയാണ് ആദ്യ ടെസ്റ്റിൽ ഇംഗ്ലണ്ടിന്റെ വിക്കറ്റ് കീപ്പറാകുക. ആദ്യ ടെസ്റ്റിൽ സ്റ്റേഡിയത്തിലേക്ക് 7000 കാണികളെ പ്രവേശിപ്പിക്കും.